లేటెస్ట్

‘వివేకా’ హంత‌కుల స‌మాచారం ఇస్తే రూ.5ల‌క్ష‌లు: సీబీఐ

మాజీ ముఖ్య‌మంత్రి, స్వ‌ర్గీయ వై.ఎస్.రాజ‌శేఖ‌ర్ రెడ్డి స్వంత త‌మ్ముడు, మాజీమంత్రి, మాజీ ఎంపి అయ‌న ‘వై.ఎస్.వివేకానంద‌రెడ్డి’ని హ‌త్య చేసిన వారి ఆచూకీ చెబితే రూ.5ల‌క్ష‌లు రివార్డు ఇస్తామ‌ని సీబీఐ ఈ రోజు ప‌త్రికా ప్ర‌క‌ట‌న‌ను విడుద‌ల చేసింది. 2019 సార్వ‌త్రిక ఎన్నిక‌ల‌కు ముందు ‘వివేకానంద‌రెడ్డి’ని ‘పులివెందుల‌’లోని ఆయ‌న స్వ‌గృహంలో గుర్తు తెలియ‌ని వ్య‌క్తులు హ‌త‌మార్చారు. హ‌త్య జ‌రిగిన రోజు ముందుగా ఆయ‌న గుండెపోటుతో చ‌నిపోయార‌ని వైకాపా నాయ‌కులు పేర్కొన్నారు. వైకాపా పార్టీ మీడియా కూడా ఇదే విష‌యాన్ని ప్ర‌చారం చేసింది. మ‌ధ్యాహ్నం త‌రువాత ఆయ‌న‌ను ఎవ‌రో గుర్తు తెలియ‌ని వ్య‌క్తులు హ‌త్య చేశార‌ని వైకాపా నాయ‌కులు ఆరోపించారు. ఎన్నిక‌ల‌కు ముందు జ‌రిగిన ఈ హ‌త్య అప్ప‌ట్లో పెను సంచ‌ల‌నం సృష్టించింది. వివేకానంద‌రెడ్డిని అప్ప‌టి ముఖ్య‌మంత్రి ‘చంద్ర‌బాబునాయు’డే హ‌త్య‌చేయించార‌ని అప్ప‌టి ప్ర‌తిప‌క్ష‌నాయ‌కుడు, ఇప్ప‌టి ముఖ్య‌మంత్రి వై.ఎస్.జ‌గ‌న్మోహ‌న్ రెడ్డి ఆరోపించారు. అప్ప‌ట్లో ఈ హ‌త్య‌పై సీఐడీ విచార‌ణ జ‌రిగింది. అయితే త‌న తండ్రి హంత‌కుల‌ను ప్ర‌భుత్వం ప‌ట్టుకోలేక‌పోతోంద‌ని సీబీఐ విచార‌ణ కావాల‌ని వివేకానంద‌రెడ్డి కుమార్తె హైకోర్టులో పిటీష‌న్ దాఖ‌లు చేసి, సీబీఐ విచార‌ణ‌కు అనుమ‌తి సాధించింది.


ఇక అప్ప‌టి నుంచి దాదాపు రెండేళ్ల నుంచి సీబీఐ విచార‌ణ సాగుతోంది. ఈ కేసులో ఇప్ప‌టి వ‌ర‌కు ఎలాంటి పురోగ‌తి ల‌భించ‌లేదు. త‌న తండ్రి త‌మ కుటుంబానికి చెందిన వారే హ‌త్య చేశార‌ని వివేకా కుమార్తె ఆరోపించారు. తాను అనుమానం వ్య‌క్తం చేసిన వారిని విచారించాల‌ని ఆమె సీబీఐని కోరింది. అయితే సీబీఐ ప‌లువురుని విచారించినా వారి వ‌ద్ద నుంచి ఎటువంటి స‌మాచారాన్ని రాబ‌ట్ట‌లేక‌పోయింది. ఈ కేసులో మొద‌టి నుంచీ సీబీఐ వివాదాస్ప‌దంగా వ్య‌వ‌హ‌రిస్తుంద‌నే అనుమానాలు వ్య‌క్తం అవుతున్నాయి. దాదాపు రెండేళ్ల‌పాటు విచార‌ణ చేసి చివ‌ర‌కు త‌మ‌కు ఎటువంటి క్లూస్ ల‌భించ‌లేద‌ని, ప్ర‌జ‌ల‌కు దీని గురించి తెలిస్తే త‌మ‌కు చెప్పాల‌ని అలా చెబితే రూ.5ల‌క్ష‌లు రివార్డు ఇస్తామ‌ని ప్ర‌క‌టించ‌డం ఆశ్చ‌ర్యానికి గురిచేస్తోంది. నిన్న మొన్న‌టి దాకా హ‌డావుడి చేసి, కొంద‌రిని అదుపులోకి తీసుకుని ఇప్పుడు త‌మ‌కు క్లూలు దొర‌క‌లేద‌ని చెప్ప‌డంపై ప‌లు విమ‌ర్శ‌లు వ‌స్తున్నాయి.

  • ( 0)
  • -
  • ( 0)

అభిప్రాయాలూ