లేటెస్ట్

'ప్రజావేదిక' నిర్మాణ ఖర్చు....రూ.9కోట్లు కాదు..రూ.90లక్షలే...!

రాష్ట్ర రాజకీయాలన్నీ ఇప్పుడు 'ప్రజావేదిక' చుట్టూనే తిరుగుతున్నాయి. మాజీ ముఖ్యమంత్రి చంద్రబాబునాయుడు ఇంటి పక్కనే ఉన్న ఈ కట్టడం..అక్రమ కట్టడమని..దాన్ని కూలగొడతామని చెప్పిన ముఖ్యమంత్రి 'జగన్‌' చెప్పినట్లు వెంటనే కూలగొట్టారు. నదీ గర్భంలో 'ప్రజావేదిక' కట్టారని...అధికారంలో ఉన్నవారే తప్పులు చేస్తే ఎలా అని...? అక్రమ కట్టడాన్ని వెంటనే కూల్చివేస్తామని...ఆయన ప్రకటించి అపనిని అధికారులతో చేయించారు. కాగా ఈ వ్యవహారంలో 'జగన్‌' మంత్రులు...తీవ్ర ఆరోపణలు చేశారు. కోళ్ల ఫారమ్‌ వంటి నిర్మాణానికి రూ.9కోట్లు ఖర్చు చేశారని, రేకులతో వేసిన షెడ్‌కు అంత సొమ్ము కేటాయించుకుని దిగమింగేశారని సీనియర్‌ మంత్రి బత్స సత్యనారాయణతో పాటు..పలువురు మంత్రులు ఆరోపించారు. చిన్న షెడ్‌లోనే ఇంత అవినీతి జరిగితే..రాజధాని నిర్మాణంలో ఎంత అవినీతి జరిగిందో ఊహించుకోవచ్చునని..వారు తీవ్రంగా విమర్శించారు. 

రాజ్యసభ సభ్యుడు విజయసాయిరెడ్డి కూడా ఇది అక్రమ కట్టడమని, దీని కోసం రూ.9కోట్లు వెచ్చించారని, ప్రజల సొమ్మును దుర్వినియోగం చేశారని ఆరోపించారు. వైకాపా నాయకులు, మంత్రులు 'ప్రజావేదిక'ను తొమ్మిది కోట్లతో నిర్మించారని చెబుతుండగా...దానికి కేవలం రూ.90లక్షలు మాత్రమే అయిందని గత ప్రభుత్వం విడుదల చేసిన జీవో చెబుతోంది. 'ప్రజావేదిక' నిర్మాణం కోసం ఆర్‌ అండ్‌ బి శాఖ 4.4.2017న జీఓ నెం.ఆర్‌.టి.104ను విడుదల చేసింది. దీని ప్రకారం 'ప్రజావేదిక' నిర్మాణం కోసం రూ.90లక్షలు, పార్కింగ్‌ కోసం రూ.47లక్షలు, మట్టి చదును కోసం రూ.32లక్షలు, ప్రహారిగోడ కోసం రూ.14లక్షలు, సెక్యూరిటీ పోస్టు కోసం రూ.8లక్షలను విడుదల చేసింది. 'ప్రజావేదిక' నిర్మాణం, దాని చుట్టుపక్కల పార్కింగ్‌, సెక్యూరిటీపోస్టు, ఇతర మౌళికసదుపాయాల కల్పన కోసం అప్పటి ప్రభుత్వం వెచ్చించింది రూ.1.91లక్షలు. కాగా...ప్రస్తుత ప్రభుత్వం మాత్రం రూ.9కోట్లు ఖర్చు చేశారని, నిధులు దుబారా చేశారని, అవినీతికి పాల్పడ్డారని ఆరోపణలు గుప్పిస్తోంది. 

(743)
  • (0)
  • -
  • (0)

అభిప్రాయాలూ