లేటెస్ట్

'ప్రతిపక్షపాత్ర'లో 'బిజెపి'...!

ఆంధ్రప్రదేశ్‌లో తామే అసలైన ప్రతిపక్షమని బిజెపి నేతలు భావిస్తున్నారట. మొన్నటి ఎన్నికల్లో నోటాకు వచ్చినన్ని ఓట్లు కూడా రాని బిజెపి ప్రధాన ప్రతిపక్షంగా తాము ప్రజల కోసం పనిచేస్తామని గంభీరమైన ప్రకటనలు చేస్తున్నారు. ఈ నెల 6వ తేదీ నుంచి సభ్యత్వ కార్యక్రమాలు నమోదుతోనే తమ ప్రతిపక్ష పాత్ర ప్రారంభం అవుతుందని పార్టీకి చెందిన సీనియర్‌ నాయకులు చెబుతున్నారు. నిన్న మొన్నటి దాకా..అధికార వైకాపాతో స్నేహం కొనసాగించిన బిజెపి ఇప్పుడు వారికి వ్యతిరేకంగా పోరాటాలు చేయడానికి రంగం సిద్ధం చేసుకుంటున్నారట. ప్రస్తుతం సభ్యత్వ నమోదుపై దృష్టి కేంద్రీకరించి, తరువాత టిడిపి ఎమ్మెల్యేలను పార్టీలో చేర్చుకుని..అధికారపార్టీపై పోరాటం చేయడానికి రంగం సిద్ధం చేసుకుంటోంది. అధికార పార్టీపై పోరాటాలు చేయాలని ఢిల్లీ పెద్దలు ఇప్పటికే రాష్ట్ర నాయకత్వాన్ని ఆదేశించారని తెలుస్తోంది. దీనిలో భాగంగానే 'జగన్‌' ప్రభుత్వం తీసుకునే నిర్ణయాలను రాష్ట్ర నాయకులు తప్పుపడుతున్నారు. వాస్తవానికి బిజెపి రాష్ట్ర నాయకుల్లో చాలా మంది 'జగన్‌'కు అనుకూలురే. మొన్న మొన్నటి దాకా..'జగన్‌' కనుసన్నల్లో పనిచేసిన వీరంతా ఇప్పుడు 'వైకాపా'కు వ్యతిరేకంగా ప్రకటనలు చేస్తున్నారు. 

మాజీ ముఖ్యమంత్రి చంద్రబాబునాయుడు ఇంటి వద్దనున్న ప్రజావేదిక కూల్చివేత సరికాదంటూ..బిజెపి రాష్ట్ర అధ్యక్షుడు 'కన్నా లక్ష్మీనారాయణ' ప్రకటన చేయడం వెనుక ఢిల్లీ పెద్దల ఆదేశాలున్నాయని చెబుతున్నారు. అదే విధంగా పోలవరం ప్రాజెక్టు నిర్మాణం విషయంలో 'జగన్‌' వ్యవహరిస్తున్న తీరు, సాగునీటి ప్రాజెక్టుల విషయంలో తెలంగాణతో 'జగన్‌' వ్యవహరిస్తున్న తీరుపై బిజెపి నాయకులు విమర్శలు చేస్తున్నారు. అదే విధంగా పెన్షన్ల పంపిణీ, రైతులకు విత్తనాల పంపిణీలో వైకాపా ప్రభుత్వం ఘోరంగా విఫలమైందని వారు ఆరోపణలు గుప్పిస్తున్నారు. రాష్ట్రంలో ప్రధాన ప్రతిపక్షంగా టిడిపి ఉన్నా..ఆ పార్టీ కన్నా ముందే బిజెపి రాష్ట్ర నాయకులు ప్రభుత్వంపై దండెత్తుతున్నారు. టిడిపి కంటే ముందే ఉండడం ద్వారా..రాష్ట్రంలో తామే ప్రధాన ప్రతిపక్షమనే భావన ప్రజల్లో ఉండాలనే వ్యూహంలో భాగంగానే వారు..ఈ విధంగా చేస్తున్నారనే అభిప్రాయం రాజకీయ వర్గాల్లో వ్యక్తం అవుతోంది. అయితే...రాష్ట్రానికి ఇచ్చిన ప్రధాన హామీల్లో ఏదీ అమలు చేయని, రాష్ట్రానికి అన్యాయం చేసిన పార్టీగా 'బిజెపి'ని ప్రజలు గుర్తిస్తున్న సమయంలో వీరు ప్రధాన ప్రతిపక్షంగా ఎదగాలంటే ఎదగగలరా..? ప్రజలు వారిని ప్రధాన ప్రతిపక్షంగా గుర్తిస్తారా..అని కొందరు రాజకీయ విశ్లేషకులు ప్రశ్నిస్తున్నారు. మొత్తం మీద..రాబోయే ఎన్నికల్లో తమదే విజయమని, ఆంధ్రాలో బిజెపి జెండా ఎగురవేస్తామని చెబుతోన్న బిజెపి ఆమేరకు తన ప్రయత్నాలను తాను చేసుకుంటోంది. మరి ఆంధ్రా ప్రజలు ఆ పార్టీని ఎలా ఆదరిస్తారో..చూడాల్సి ఉంది.

(178)
  • (0)
  • -
  • (0)

అభిప్రాయాలూ