లడ్డూ వివాదం...ఇక శాంతించిన‌ట్లే...!
ఎన్‌డిఏ ప్ర‌భుత్వం అధికారంలోకి వ‌చ్చి వంద రోజులైన సంద‌ర్భంగా ముఖ్య‌మంత్రి చంద్ర‌బాబునాయుడు జ‌గ‌న్ పాల‌న‌లో తిరుమ‌ల ల‌డ్డూలో కొవ్వులు క‌లిశాయ‌ని ఆరోపించారు. ఈ ఆరోప‌ణ దేశ‌వ్యాప్తంగా, ప్ర‌పంచ‌వ్యాప్తంగా ఉన్న హిందువుల్లో దిగ్బ్రాంతిని క‌ల్గించింది. క‌లియుగ దైవ‌మైన వేంక‌టేశ్వ‌ర‌స్వామికి జ‌గ‌న్ అప‌కారం చేశార‌ని, ఆయ‌న పాల‌న‌లో నెయ్యిని క‌ల్తీ చేశార‌ని, వాటిలో ప‌శువుల కొవ్వుల‌ను క‌లిపి స్వామివారికి ఇష్ట‌మైన లడ్డూ ప్ర‌సాదం త‌యారు చేశార‌ని, గ‌త ఐదేళ్ల‌ల నుంచి ఇది జ‌రిగింద‌న్న వార్త హిందువుల్లో తీవ్ర ఆందోళ‌న‌కు కార‌ణ‌మైంది. దేశ‌వ్యాప్తంగా ఉన్న హిందువులు జ‌గ‌న్‌పై తీవ్ర ఆగ్ర‌హాన్ని వ్య‌క్తం చేశారు. తిరుమ‌ల‌కు స‌ర‌ఫ‌రా అయ్యే నెయ్యి క‌ల్తీ జ‌ర‌గ‌లేద‌ని, కావాల‌నే చంద్ర‌బాబు త‌మ‌పై అభాండాలు వేస్తున్నార‌ని మాజీ ముఖ్య‌మంత్రి వై.ఎస్‌.జ‌గ‌న్మోహ‌న్‌రెడ్డి ల‌బోదిబోమ‌న్నారు. అయితే..ఆయ‌న గ‌త చ‌రిత్ర‌ను చూస్తోన్న హిందూ స‌మాజం ఆయ‌న మాట‌ల‌ను విశ్వ‌సించ‌లేదు. లడ్డూ క‌ల్తీకి కార‌ణ‌మైన జ‌గ‌న్‌ను అరెస్టుచేయాల‌ని, ఆయ‌న‌తో పాటు ఆయ‌న బాబాయి మాజీ టిటిడి ఛైర్మ‌న్ సుబ్బారెడ్డిని, మాజీ ఛైర్మ‌న్ క‌రుణాక‌ర్‌రెడ్డి, మాజీ ఇఒ ధ‌ర్మారెడ్డిని అరెస్టు చేయాల‌నే డిమాండ్‌లు ఊపందుకున్నాయి. అయితే..దీనిపై సుప్రీంకోర్టు సిట్టింగ్ జ‌డ్జితో విచార‌ణ జ‌రిపించాల‌ని వైకాపా నేత‌లు డిమాండ్ చేశారు. మాజీ టిటిడీ ఛైర్మ‌న్ సుబ్బారెడ్డి త‌న‌పై జ‌రుగుతోన్న విజిలెన్స్ విచార‌ణ‌ను ఆపాలంటూ హైకోర్టుకు వెళ్లారు. దేశ, రాష్ట్ర వ్యాప్తంగా లడ్డూ క‌ల్తీపై వాదోప‌వాద‌న‌లు జోరుగా సాగాయి. హిందువులందరూ ఒకేతాడిపైకి వ‌చ్చి జ‌గ‌న్ చ‌ర్య‌ను ఖండించారు. కాగా జ‌గ‌న్ చంద్ర‌బాబు చేస్తోంది..దుర్మార్గ‌మ‌ని, త‌మ‌పై అభాండాలు వేస్తున్నార‌ని వాపోయారు. హిందువుల మ‌నోభావాల‌ను జ‌గ‌న్ తీవ్రంగా దెబ్బ‌తీశార‌ని, ఆయ‌న క్ష‌మాప‌ణ‌లు చెప్పాల‌ని డిమాండ్ చేశారు. అయితే..హిందువులందరూ సంఘ‌టితం కావ‌డంతో..హిందువుల‌ను వ్య‌తిరేకించే ఇత‌ర వ‌ర్గాలు జ‌గ‌న్‌కు మ‌ద్ద‌తుగా నిలిచాయి. ముఖ్యంగా లెఫ్ట్‌పార్టీలు, డిఎంకె వ‌ర్గాలు, హేతువాద సంఘాలు, క్రిస్టియ‌న్ సంఘాలు ఒక్కొక్క‌టిగా ఇదంతా బిజెపి ఆడిస్తున్న నాట‌క‌మ‌ని, ఓట్ల రాజ‌కీయం చేస్తున్నార‌నే వాదాన్ని తెర‌పైకి తెచ్చాయి. దీంతో..అప్ప‌టి వ‌ర‌కూ దూకుడుగా వెళ్లిన కూట‌మి ప్ర‌భుత్వం దీనిపై సిట్ వేసి..వివాదానికి పుల్‌స్టాప్ పెట్టాల‌నే అభిప్రాయానికి వ‌చ్చింది. అయితే..జ‌గ‌న్ తాను తిరుమ‌ల వెళ‌తాన‌ని, వేంక‌టేశ్వ‌రుని ద‌ర్శించుకుంటాన‌ని చెప్పారు. దీంతో..మ‌ళ్లీ హిందూ సంఘాలు..తీవ్ర ఆక్షేప‌న‌లు తెల‌ప‌డం, ఆయ‌న తిరుమ‌ల వెళితే..డిక్ల‌రేష‌న్ ఇవ్వాల‌ని డిమాండ్ చేయ‌డంతో...జ‌గ‌న్ ఆత్మ‌ర‌క్ష‌ణ‌లో ప‌డ్డారు. ఈ ప‌రిస్థితుల్లో ఆయ‌న తిరుమ‌ల ప‌ర్య‌ట‌న ఆపేసుకోవ‌డంతో..కొంత వ‌ర‌కూ లడ్డూ వివాదం..ఒక కొలిక్కి వ‌చ్చిన‌ట్లైంది. రాష్ట్ర ప్ర‌భుత్వం కూడా ఈ వివాదానికి ఇంత‌టితో పుల్‌స్టాప్ పెట్టాల‌నే భావ‌నతో ఉంది. క‌లియుగ‌దైవ‌మైన వేంక‌టేశ్వ‌రుని ప‌దే ప‌దే వివాదాల్లో ఉంచ‌డం ఇష్టం లేక రాష్ట్ర ప్ర‌భుత్వం దీన్ని పొడిగించాల‌ని భావించ‌డం లేదు. మ‌రోవైపు ఈ వివాదం నుంచి ఏదో విధంగా బ‌య‌ట‌ప‌డాల‌ని భావిస్తోన్న జ‌గ‌న్ రేపు దేవాల‌యాల్లో పూజ‌లు చేస్తామ‌ని చెప్పారు. రేపు ఆ పార్టీ ఆ తతంగాన్ని పూర్తి చేసి, త‌రువాత దీని గురించి పెద్ద‌గా ప్ర‌స్తావించ ద‌లుచుకోడం లేదు. దీంతో ఇరువైపుల నుంచి లడ్డూ యుద్ధం ఆగే సూచ‌న‌లు క‌నిపిస్తున్నాయి. మొత్తం మీద..ఇక ఈ వివాదానికి పుల్‌స్టాప్ ప‌డిన‌ట్లే...! భ‌విష్య‌త్తులో మ‌ళ్లీ అవ‌స‌ర‌మైన‌ప్పుడు..దీన్ని ఇరుపార్టీలు బ‌య‌ట‌కు తీస్తాయ‌న‌డంలో సందేహం లేదు.
