WWW.JANAMONLINE.COM

లేటెస్ట్

కందిపై ఫలించిన ఇక్రిశాట్‌ పరిశోధన

నూతన మేలురకం కంది వంగడాన్ని రూపొందించడానికి చేసిన పరిశోధన ఫలించింది. ప్రపంచంలోని తొమ్మిది ప్రముఖ సంస్థలకు చెందిన 19 మంది శాస్త్రవేత్తలు కంది-292 విత్తనాల జన్యు క్రమాన్ని మార్చడంలో విజయం సాధించారు. కంది పండించడానికి అనువుగా ఉన్న కొత్త ప్రాంతాలను, పంట ఎదుగుదలకు అవసరమైన సూర్యరశ్మి అధికంగా ఉండే ప్రదేశాలనూ గుర్తించారు. కంది పుట్టినిల్లు మధ్యప్రదేశ్‌ అని కూడా కనుగొన్నారు. ప్రఖ్యాత పరిశోధన పత్రిక నేచర్‌ జెనిటిక్స్‌లో ఈ వివరాలను ప్రచురించారు. హైదరాబాద్‌లోని ఇక్రిశాట్‌ సంస్థ ఆధ్వర్యంలో ఈ పరిశోధన జరగడం విశేషం. పరిశోధనలో పాల్గొన్న 9 సంస్థల్లో హైదరాబాద్‌లోని ప్రొఫెసర్‌ జయశంకర్‌ వ్యవసాయ విద్యాలయం కూడా ఉంది. 

  గత ఆరు దశాబ్దాలుగా దేశంలో కంది దిగుబడుల్లో పెద్దగా మార్పులు లేవు. ఇలా ఎందుకు జరిగిందో పరిశోధనలు చేసినట్టు ఇక్రిశాట్‌ రీసెర్చి ప్రోగ్రాం డైరెక్టర్‌ డాక్టర్‌ రాజీవ్‌ కె వార్షే్నయ్‌ తెలిపారు. ప్రస్తుతం ఉన్న మేలు రకం విత్తనాలు రూపొందించడానికి 8-10 ఏళ్లు పడుతుండగా, నూతన విధానం ద్వారా అది అయిదేళ్లకే తగ్గుతుందని చెప్పారు. ఇక్రిశాట్‌ ఆధ్వర్యంలోని అంతర్జాతీయ పరిశోధకుల బృందమే 2011లో కంది జన్యు క్రమాన్ని ఆవిష్కరించింది. కంది పంట దక్షిణాసియా నుంచి ఆఫ్రికా అనంతరం అమెరికా ఖండాలకు ఎలా విస్తరించిందీ పరిశీలించినట్టు సీనియర్‌ శాస్త్రవేత్త రచిత్‌ సక్సేనా తెలిపారు. ఆఫ్రికా, ఆసియా దేశాల్లోని చిన్న రైతులకు కందే ప్రధాన వాణిజ్య పంట అని, ఎగుమతి అవకాశాలు ఉన్నది కూడా ఇదేనని ఇక్రిశాట్‌ డైరెక్టర్‌ జనరల్‌ డేవిడ్‌ బెర్గ్‌విన్సన్‌ చెప్పారు. రైతుల ఆదాయం రెట్టింపు చేయాలన్న ప్రభుత్వ ఆశయానికి ఈ ప్రయోగం ఎంతో సహకరిస్తుందని కేంద్ర వ్యవసాయ శాఖ కార్యదర్శి ఎస్‌.కె.పట్నాయక్‌ ప్రశంసించారు.

(209)
  • (0)
  • -
  • (0)

అభిప్రాయాలూ