లేటెస్ట్

టిడిపి మాజీ మంత్రులకు పోటీ చేసే అవకాశం దక్కుతుందా...?

రాబోయే రోజుల్లో జరగబోయే సాధారణ ఎన్నికల్లో తెలుగుదేశం పార్టీకి చెందిన మాజీ మంత్రుల్లో ఎక్కువ మందికి మళ్లీ పోటీ చేసే అవకాశం ఇవ్వకూడదని ఆ పార్టీ అధినేత చంద్రబాబు భావిస్తున్నారని ప్రచారం జరుగుతోంది. కొందరు మాజీ మంత్రులు ఎన్నికల్లో పోటీ చేయమని బాహాటంగా చెబుతుండగా మరికొందరు తమ రాజకీయ వారసులుగా కుమారులతో నియోజకవర్గ పర్యటనలను జరుపుతున్నారు. ఎన్నికల్లో ఎవరెరికి మళ్లీ పోటీ చేసే అవకాశం ఇవ్వాలి..? ఎవరెవరిని ఎన్నికల బరి నుంచి పక్కన పెట్టాలి..ఎవరెవరు ఎన్నికల పోటీ నుంచి తప్పుకోబోతున్నారు..అనే వివరాల్లోకి వెళితే..మాజీ మంత్రి యనమల రామకృష్ణుడు మళ్లీ శాసనసభ్యునిగా పోటీ చేయనని బాహాటంగా చెప్పారు. అదే విధంగా మాజీ మంత్రి కళా వెంకటరావు తాను పోటీ చేయనని తన రాజకీయ వారసుడిగా కుమారుడు పోటీ చేస్తారంటున్నారు. ఇదే అభిప్రాయంతో మాజీ మంత్రి అయన్నపాత్రుడు ఉన్నారు. కానీ చంద్రబాబు అందుకు అంగీకరించరని, మళ్లీ అయ్యనే ఎన్నికల బరిలోకి దించుతారంటున్నారు పార్టీ ముఖ్యనేతలు. మాజీ మంత్రి పీతాని సత్యనారాయణ తన రాజకీయ వారసుడిగా కుమారుడిని ఎన్నికల బరిలోకి దించాలనుకుంటున్నారట. అదే విధంగా మాజీ మంత్రి పి.అశోక్‌గజపతిరాజును తన కుమార్తెను మాత్రమే ఎన్నికల బరిలోకి దింపి తాను ఎన్నికలకు దూరంగా ఉండాలనుకుంటున్నారు. 2019 ఎన్నికల్లో అశోక్‌ కుమార్తె విజయనగరం నుంచి పోటీ చేసి ఓడిపోయిన విషయం తెలిసిందే.


అదే విధంగా మాజీ మంత్రి పత్తిపాటి పుల్లారావుకు మళ్లీ ఎమ్మెల్యేగా పోటీ చేసే అవకాశం ‘చంద్రబాబు’ ఇవ్వరని, ఆయనను ఎంపిగా పోటీ చేసే అవకాశం ఉందని ప్రచారం జరుగుతోంది. పలుసార్లు వరుసగా ఎన్నికల్లో ఓడిపోయిన సోమిరెడ్డి చంద్రమోహన్‌రెడ్డి మళ్లీ నియోజకవర్గం మారి పోటీ చేయాలనుకుంటున్నా..ఆ అవకాశం ‘సోమిరెడ్డి’కి చంద్రబాబు ఇవ్వరంటున్నారు పార్టీ నేతలు. మాజీ మంత్రి కె.ఇ.కృష్ణమూర్తి క్రియాశీలక రాజకీయాలనుంచి తప్పుకుని తన ఇద్దరు కుమారులను తెరపైకి తెచ్చారు. అదే విధంగా మాజీ మంత్రి కాల్వ శ్రీనివాసులను ఈసారి ఎంపిగా పోటీ చేయించే అవకాశాలు ఉన్నాయని అనంతపురం నేతలు చెప్పుకుంటున్నారు. మాజీ మంత్రి అమర్‌నాథ్‌రెడ్డి ఎన్నికల్లో పోటీ చేసినా ఆయన ఓడిపోవడం ఖాయమని, ఈ నేపథ్యంలో ఆయనకు పోటీ చేసే అవకాశం చంద్రబాబు ఇవ్వరని ప్రచారం జరుగుతున్నా..తాను ఎమ్మెల్యేగా పోటీ చేస్తానని, విజయం సాధించడం ఖాయమని ‘అమర్‌నాధ్‌రెడ్డి’ చెబుతున్నారు. మరికొంతమంది మాజీ మంత్రుల్లో ఎవరెవరిని పోటీ చేయించాలనే విషయంపై ‘చంద్రబాబు’ ఏ విధమైన నిర్ణయం తీసుకుంటారో చూడాల్సి ఉంది. మాజీ మంత్రి అయ్యన్నపాత్రుడిని మళ్లీ పోటీచేయించాలని చంద్రబాబు భావిస్తున్నారని, ఆయన కుమారుడికి మరో విధంగా అవకాశం ఆయన కల్పిస్తారని ప్రచారం జరుగుతోంది.

  • ( 0)
  • -
  • ( 0)

అభిప్రాయాలూ