లేటెస్ట్

‘జగన్‌’ ఏ ‘నాని’వైపు ఉంటారో...!?

ముఖ్యమంత్రిగా జగన్‌ రెండున్నరేళ్ల క్రితం ప్రమాణ స్వీకారం చేసిన తరువాత మంత్రివర్గాన్ని ఏర్పాటు చేస్తూ ప్రస్తుతం తాను ఏర్పాటు చేస్తోన్న మంత్రివర్గంలో దాదాపు 80శాతం మందిని రెండున్నరేళ్ల తరువాత మారుస్తానని, వారి స్థానంలో కొత్తవారికి అవకాశం ఇస్తానని అప్పట్లో చెప్పారు. పనితీరు ఆధారంగా వారి మార్పులు ఉంటాయని ఆయన పేర్కొన్నారు. ఆయన పేర్కొన్న విధంగా రెండున్నరేళ్లు పూర్తి అవుతున్నా ఆయన మంత్రివర్గ విస్తరణ చేయలేదు. ‘జగన్‌’ చెప్పిన సమయం దాటి ఆరు నెలలు అవుతున్నా మంత్రి వర్గ విస్తరణ గురించి ఎటువంటి సంకేతాలు ఇవ్వడం లేదు. అయితే ఇటీవల కాలంలో అధికార వ్యవస్థలో కీలకంగా ఉన్న పలువురు సీనియర్‌ అధికారులను ఆయన బదిలీ చేశారు. తనకు కావాల్సిన వారికి కీలకపోస్టులు ఇచ్చారు. ఇదే సమయంలో అధికార వ్యవస్థలో త్వరలో మరికొన్ని మార్పులు చేయబోతున్నారు. అదే సమయంలో నూతన జిల్లాల ఏర్పాటు, రాజధానిగా ‘విశాఖ’ను ఏర్పాటు చేసే అంశం మార్చి, ఏప్రిల్‌ నాటికి పూర్తి అవుతుందని, తరువాత తాను చెప్పిన విధంగా మంత్రివర్గాన్ని విస్తరించాలని ఆయన భావిస్తునట్లు ప్రచారం జరుగుతోంది. ప్రస్తుతం మంత్రివర్గంలో ఉన్నవారినందరినీ తొలగించి, వారి స్థానంలో కొత్త వారికి అవకాశం ఇస్తారని, ఈ మధ్య కాలంలో ‘జగన్‌’ బంధువు, రాష్ట్ర మంత్రి బాలినేని శ్రీనివాసరెడ్డి మీడియాతో మాట్లాడుతూ చెప్పారు. అయితే ఆ తరువాత అటువంటిదేమీ లేదని, అప్పట్లో సిఎం జగన్‌ అన్నట్లు 80శాతం మందిని మార్చి మిగితా 20శాతం మందిని కొనసాగిస్తారని ఇప్పుడు ప్రచారం సాగుతోంది. అయితే ఇప్పుడు అలా కొనసాగే వారు ఎవరనే దానిపై పార్టీలోనూ, ప్రభుత్వ వర్గాల్లో అంచనాలు కొనసాగుతున్నాయి. ఎవరెవరిని మంత్రులుగా కొనసాగిస్తారనే దానిపై పలు ఊహాగానాలు వస్తున్నాయి. సీనియర్‌ మంత్రులు ‘పెద్దిరెడ్డి రామచంద్రారెడ్డి, బొత్స సత్యనారాయణ, బుగ్గన రాజేంద్రనాధ్‌రెడ్డి, బాలినేని శ్రీనివాసరెడ్డిలను ‘జగన్‌’ కొనసాగిస్తారని పార్టీ వర్గాల ద్వారా తెలుస్తోంది. అయితే ‘జగన్‌’కు అత్యంత దగ్గరైన సమాచారశాఖ మంత్రి ‘పేర్ని నాని, కొడాలి నాని’ల భవిష్యత్‌ ఏమిటో తెలియడం లేదు.


వీరిద్దరూ ముఖ్యమంత్రికి వీరవిధేయులు. వీరిలో ‘కొడాలి నాని’ మాజీ ముఖ్యమంత్రి నారా చంద్రబాబునాయుడు, ఆయన తనయుడు ‘లోకేష్‌’లపై ఒంటికాలిపై లేస్తుంటారు. వారిని రాయలేని బూతులతో దూషిస్తుంటారు. ‘కమ్మ’ సామాజికవర్గానికి చెందిన ఈయన ‘కమ్మ’ వర్గంలో ‘జగన్‌’ తనకే ప్రాధాన్యత ఇస్తారని, తనను మంత్రివర్గం నుంచి తప్పించరనే భావనతో ఉన్నారు. తాను చేసిన సేవలను దృష్టిలో ఉంచుకుని, తనను కొనసాగిస్తారని, ‘చంద్రబాబు, ఆయన తనయుడు ‘లోకేష్‌’లపై దూకుడుగా వ్యవహరించాలంటే తన వల్లే అవుతుందని ముఖ్యమంత్రి భావిస్తున్నారనే ఆలోచనతో ఆయన ఉన్నారు. కాగా మంత్రి ‘పేర్ని నాని’ కూడా తాను ‘జగన్‌’కు వీరవిధేయుడనని పలుసార్లు రుజువు చేసుకున్నారు. తాను ‘జగన్‌’కు పాలేరునని ఆయన చెప్పుకున్నారు. సమాచార, ట్రాన్స్‌పోర్టు మంత్రిగా ఆయన పెద్దగా చేసిందేమీ లేకపోయినా, జగన్‌ పట్ల విధేయంగా ఉన్నాను కనుక తనను కూడా కొనసాగిస్తారనే నమ్మకంతో ఆయన ఉన్నారు. నూతన జిల్లాలను దృష్టిలో ఉంచుకుని ‘జగన్‌’ మంత్రివర్గ విస్తరణ చేస్తే ‘కొడాలి నాని, పేర్ని నాని’లు ఇద్దరూ ‘మచిలీపట్నం’ జిల్లాలోకే వస్తారు. కనుకు వీరిని కొనసాగించాలంటే ఏదో ఒక ‘నాని’కి మాత్రమే అవకాశం ఉంటుంది. మరి ‘పేర్ని నాని’ వైపు మొగ్గుచూపుతారా..? లేక ‘కొడాలి’ వైపా అన్నది చూడాల్సి ఉంది.  కాగా ఏలూరుకు చెందిన రాష్ట్ర వైద్యశాఖమంత్రి, ఉపముఖ్యమంత్రి ‘ఆళ్ళ నాని’ భవిష్యత్‌ ఏమిటో ఆయనకు ముందే తెలిసిందేమో..? ఆయన ఎక్కడా నోరెత్తడం లేదు. తనను మంత్రివర్గం నుంచి తీసేయడం ఖాయమనే ఉద్దేశ్యంతో ఆయన నియోజకవర్గానికే పరిమితమయ్యారు. మొత్తం మీద మంత్రివర్గ విస్తరణలో ముఖ్యమంత్రి ‘జగన్‌’ ఏ ‘నాని’ వైపు ఉంటారో..అనే చర్చ అధికారపార్టీలో జోరుగా సాగుతోంది.

  • ( 0)
  • -
  • ( 0)

అభిప్రాయాలూ