గ్రామవాలంటీర్‌ ఉద్యోగం ఏడాది మాత్రమే...!
వైకాపా ప్రభుత్వం నూతనంగా నియమిస్తోన్న గ్రామవాలంటీర్‌ ఉద్యోగాల విషయంలో ఒక స్పష్టత వచ్చింది. ప్రస్తుతానికి గ్రామ వాలంటీర్‌ పదవీ కాలం ఏడాది కాలమేనని తెలుస్తోంది. గ్రామ వాలంటీర్‌గా నియమితులైన వారికి ఇస్తోన్న నియామక పత్రంలో ఆగస్టు 14వ తేదీ వరకు మాత్రమే ఉద్యోగం ఉంటుందని పేర్కొంటున్నారు. ఈ ఏడాదిలో అంచనాల మేరకు పనిచేయకపోయినా, అవినీతికి పాల్పడినా, ఫిర్యాదులు వచ్చినా..తొలగిస్తామని అంగీకార పత్రంలో పేర్కొంటున్నారు. పనితీరు సరిగా లేకపోతే సదరు వాలంటీర్‌ జీతం కూడా తగ్గిస్తామని, ప్రస్తుతం ఇస్తామంటున్న జీతంలో రూ.500/- స్మార్ట్‌ఫోన్‌ కోసం మినహాయించుకుంటామని చెబుతున్నారు. ప్రతి నెలలోనూ ఈ మినహాయింపు ఉంటుందని చెబుతున్నారు. అంటే వాలంటీర్‌కు నికరంగా దక్కేది కేవలం రూ.4500/- మాత్రమే. కాగా నియమితులైన వారి వద్ద నుంచి అంగీకార పాత్రాలను తీసుకుంటున్నారు. నవరత్నాల అమలులో క్రియాశీలకంగా పనిచేస్తామని, అవినీతికి పాల్పడమని ఈ అంగీకరపత్రాల్లో అభ్యర్థుల నుంచి హామీ తీసుకుంటున్నారు. వైకాపా ప్రభుత్వం అధికారంలోకి వచ్చిన తరువాత దాదాపు 4.5లక్షల మందిని రాష్ట్ర వ్యాప్తంగా వాలంటీర్లను నియమించబోతోంది. ప్రతి 50 కుటుంబాలకు ఒక వాలంటీర్‌ ఉంటారు. వీరికి గౌరవవేతనం ఇస్తామని ప్రభుత్వం ముందే పేర్కొంది. కాగా ప్రభుత్వం పెడుతోన్న నిబంధనలపై కొందరు అభ్యర్థులు పెదవి విరుస్తున్నారు. అయితే వాళ్లు ఎంత పెదవి విరిచినా...ఈ ఉద్యోగాల కోసం యువత నుంచి మంచి స్పందన వ్యక్తం అవుతోంది.
