లేటెస్ట్

ఆర్టీసీ ఎండి 'సురేంద్రబాబు' బదిలీ...!?

ఆర్టీసీ ఎండి 'నిమ్మగడ్డ సురేంద్రబాబు' బదిలీకి రంగం సిద్ధమైందని విశ్వసనీయ వర్గాలు చెబుతున్నాయి. మరో వారం రోజుల్లో ఆయనను బదిలీ చేస్తారని ఆ వర్గాలు అంటున్నాయి. ఆర్టీసీ ఎండిగా 'సురేంద్రబాబు' పగ్గాలు చేపట్టిన తరువాత.. ఆర్టీసీలో విప్లవాత్మకమైన మార్పులు తెచ్చారు. ముఖ్యంగా కండర్లు, డ్రైవర్ల సమస్యలను పరిష్కరించడంలో విశేష కృషి చేసి వారి పాలిట ఆపద్బాంధవుడిగా పేరు తెచ్చుకున్నారు. ఆయన ఎండీగా రాక ముందు..చిన్న చిన్న తప్పులకు కూడా కండర్లు, డ్రైవర్లపై యాజమాన్యం కఠినమైన చర్యలు తీసుకునేది. కేవలం రూపాయి ఎక్కువ వచ్చిందని, గతంలో ఓ కండక్టర్‌పై అధికారులు చర్యలు తీసుకున్నారు. ఈ విషయం తెలిసిన 'సురేంద్రబాబు' సదరు అధికారిని పిలిపించి రాజీనామా చేయించిన విషయం అప్పట్లో సంచలనం సృష్టించింది. కార్మికుల పక్షపాతిగా పేరున్న 'సురేంద్రబాబు'ను వైకాపా ప్రభుత్వం బదిలీ చేయాలనే భావనతో ఉంది. ఆయన వల్ల సంస్థకు మేలు జరిగినా...కొన్ని ఇబ్బందికరమైన పరిస్థితులు ఎదుర్కోవాల్సి వస్తుందనే ఆలోచనతో ఆయనను బదిలీ చేయాలని నిర్ణయం తీసుకున్నట్లు తెలుస్తోంది. వచ్చే వారంలో కానీ...రాబోయే పక్షం రోజుల్లో కానీ...ఆయనను బదిలీ చేసి..ఆ స్థానంలో మాజీ డీజీపీ 'ఠాగూర్‌'ను నియమిస్తారని ఆ వర్గాలు చెబుతున్నాయి. 

నిజాయితీ, సమర్థత, ముక్కుసూటిగా వ్యవహరించే 'సురేంద్రబాబు' వల్ల కొందరు సీనియర్‌ అధికారులు, రాజకీయ నాయకులు ఇబ్బందులు పడుతున్నారట. రాష్ట్రంలో అధికారం చేతులు మారిన వెంటనే 'సురేంద్రబాబు'ను బదిలీ చేయాలని భావించినా...ఆయన పనితీరు చూసిన ప్రభుత్వ పెద్దలు వెంటనే ఆయనను బదిలీ చేయలేకపోయారు. కాగా..ఇప్పుడు ఆయనను బదిలీ చేయాల్సిన పరిస్థితులు వచ్చాయని, అందుకే ఆయనను బదిలీ చేయబోతున్నారని కార్మికులు అంటున్నారు. త్వరలో ఆర్టీసీని ప్రభుత్వంలో విలీనం చేయడానికి అన్ని కసరత్తులు జరుగుతున్నాయని, ఈసమయంలో 'సురేంద్రబాబు' ఏదైనా అభ్యంతరాలు వ్యక్తం చేస్తారనే భయం పాలకుల్లో ఉంది. అదే విధంగా..నూతనంగా ఆర్టీసీలో ఎలక్ట్రికల్‌ బస్సులను తీసుకురాబోతున్నారు. ప్రభుత్వ పెద్దల సన్నిహితులు భారీగా ఎలక్ట్రికల్‌ బస్సులు కొనుగోలు చేసి ఆర్టీసీకి ఇవ్వబోతున్నారు. దీనిలో భాగంగా వారికి కొన్ని రూట్‌లు ఇవ్వాల్సి ఉంటుంది. ఈ ప్రక్రియలో 'సురేంద్రబాబు' తమ మాట వింటాడో..లేదో..అనే సంశయం..ప్రభుత్వ పెద్దల్లో ఉంది. 'సురేంద్రబాబు' వ్యవహారశైలి వల్ల ఇబ్బందులు పడుతున్న సీనియర్‌ అధికారులు..ఆయనను ఎలాగైనా బదిలీ చేయాలని కోరుతుండడంతో...ఇక ఆయనపై బదిలీ వేటు వేయాలని ప్రభుత్వం భావిస్తున్నట్లు తెలుస్తోంది. కాగా..'సురేంద్రబాబు' బదిలీపై కార్మికులు, డ్రైవర్లు, కండక్టర్లు అభ్యంతరం వ్యక్తం చేస్తున్నారు. ఆయన వచ్చిన తరువాత సంస్థ బాగుపడిందని, ఆయన ఇక్కడే ఉండాలని...వారంతా ముక్తకంఠంతో కోరుతున్నారు.

(294)
  • (0)
  • -
  • (0)

అభిప్రాయాలూ