లేటెస్ట్

మాజీలు కాబోతున్న మంత్రుల్లో నిర్వేదం...!?

త్వరలో మంత్రివర్గాన్ని విస్తరిస్తానని ముఖ్యమంత్రి జగన్మోహన్‌రెడ్డి ప్రకటించడంతో మంత్రి పదవులకై ఎదురుచూస్తోన్న ఎమ్మెల్యేల్లో ఉత్సాహం నెలకొనగా, ప్రస్తుతం ఉన్న మంత్రుల్లో నిరాశ వ్యక్తం అవుతోంది. దాదాపు 80శాతం మంది మంత్రులను తొలగిస్తానని ఆయన ప్రకటించడంతో ప్రతి జిల్లాలోనూ మంత్రులందరు నిర్వేదానికి గురవుతున్నారు. ప్రస్తుతం ఉన్న మంత్రుల్లో ‘పెద్దిరెడ్డి రామచంద్రారెడ్డి, బొత్స,కొడాలి నాని, పేర్ని నాని, కన్నబాబు, అప్పలరాజులు మినహా అందరినీ తొలగిస్తారని ప్రచారం సాగుతోంది. ఉపముఖ్యమంత్రులుగా ఉన్న ‘ఆళ్లనాని, పుష్పశ్రీవాణి, కె.నారాయణస్వామి, బాషా, ధర్మాన కృష్ణదాస్‌లతో సహా మిగితా వారందరినీ తొలగిస్తారంటున్నారు. ‘జగన్‌’ అధికారంలోకి వచ్చిన తరువాత ఆయనకు ఎంతో విధేయంగా ఉన్న వారిని కూడా తొలగించబోతున్నారు. ప్రతిపక్షాలపై ఒంటికాలిపై విరుచుకుపడే జలవనరులశాఖమంత్రి ‘అనిల్‌కుమార్‌యాదవ్‌’తో సహా బుగ్గన రాజేంద్రనాధ్‌రెడ్డి, బాలినేని శ్రీనివాసరెడ్డి, ఆది మూలపు సురేష్‌, హోంమంత్రి మేకతోటి సుచరిత, వెల్లంపల్లి శ్రీనివాస్‌, తానేటి వనిత, శ్రీరంగనాధరాజు, ముత్తంశెట్టి శ్రీనివాసరావు, పినే విశ్వరూప్‌, ఎం.శంకరనారాయణ, గుమ్మనూర్‌ జయరాంలు తొలగించబడే లిస్లులో ఉన్నారు.  


కాగా ప్రస్తుతం మంత్రులుగా ఉన్న వారు తమను మంత్రివర్గం నుంచి తొలగిస్తారని తెలియడంతో నిరాశ, నిర్వేదంతో ఉన్నారు. తమకు మంత్రి పదవి ఇచ్చి మూడేళ్లు అయినా తమకు ఒరిగిందేముందని వారు అంతరంగికంగా ప్రశ్నిస్తారు. ఏ ఒక్క మంత్రిని స్వతంత్య్రంగా పనిచేయనీయలేదని, సిఎంఒ నుంచి వచ్చే ఆదేశాల మేరకే తాము పనిచేశామని, తమశాఖలపై తమదైన ముద్రవేయలేకపోయామని వారిలో కొందరు చెబుతున్నారు. పేరుకు మాత్రం తాము మంత్రులమని, పెత్తనమంతా సిఎంఓ, ప్రభుత్వ సలహాదారు సజ్జలదేనని వారు వాపోతున్నారు. కొంత మంది తాము సమర్థంగా పనిచేశామని, అయినా తమను మంత్రివర్గం నుంచి ఎలా తొలగిస్తారని ప్రశ్నిస్తున్నారు. పనితీరే పదవికి ప్రాతిపదిక కావాలని, అలా కాకుండా కోటాలు వేయడం ఏమిటని వారు అంతరంగిక సంబాషణల్లో చెబుతున్నారు. తమ మూడేళ్ల పదవీకాలంలో రెండేళ్లు ‘కరోనా’తోనే సరిపోయిందని, ఇక పనిచేసేది ఎక్కడని మరి కొందరు ప్రశ్నిస్తున్నారు. స్వతంత్య్రంగా పనిచేయనీయలేదని, అసమర్థులుగా ముద్రవేశారని మరికొందరు ఆక్షేపిస్తున్నారు. ప్రస్తుతం మాజీలు కాబోతున్నవారు మంత్రిపదవుల్లో ఉన్నా పెద్దగా పనిచేయడం లేదు. ఎలాగూ ఊడేపదవే కనుక నామమాత్రంగా వ్యవహరిస్తున్నారు. గతంలో వలే ప్రతిపక్షాలపైకి దూకుడుగా వెళ్లడం లేదు. ఉన్నామంటే ఉన్నామన్నట్లు వ్యవహరిస్తున్నారు. మొత్తంమీద మంత్రులుగా ఉన్నామన్న మాటేగాని ఒరిగిందేమీ లేదనే భావన వారిలో వ్యక్తం అవుతోంది. 

  • ( 0)
  • -
  • ( 0)

అభిప్రాయాలూ