లేటెస్ట్

'ఆయన' మారరు...టిడిపి కార్యకర్తల నిర్వేదం...!

ఎన్నికల్లో ఘోర ఓటమి తరువాత ఏర్పాటు చేసిన పార్టీ విస్తృత స్థాయి సమావేశంపై కొందరు కార్యకర్తలు పెదవి విరుస్తున్నారు. మంగళవారం నాడు విజయవాడలో జరిగిన పార్టీ విస్తృత స్థాయి సమావేశం సందర్భంగా కొందరు కార్యకర్తలు మాట్లాడుతూ...ఈ సమావేశం తూతూ మంత్రంగా సాగిందని, గతంలో వలే ఆర్భాటపు మాటలు, అసందర్భ ప్రస్తావనలతో నడిచిపోయిందని, దీని వల్ల ఉపయోగం ఏముందని ప్రశ్నిస్తున్నారు. అధినేత 'చంద్రబాబునాయుడు' పద్దతి ఇంకా మారలేదని, ఆయన పాత మూసపద్దతుల్లోనే వెళుతున్నారని అభిప్రాయపడ్డారు. గతంలో 'చంద్రబాబునాయుడు' ను పక్కదోవ పట్టించన వారే మళ్లీ ఇక్కడ తయారయ్యారని, పార్టీ ఎందుకు ఓడిపోయింది...? ఎవరి వల్ల ఓడిపోయింది..? అనేదానిపై పూర్తిస్థాయిలో చర్చ జరగడం లేదని, కేవలం వైకాపాను, జగన్‌ను తిట్టి సమావేశాన్ని ముగించారని దీని వల్ల ఉపయోగం ఏమిటని వారు ప్రశ్నిస్తున్నారు. 

పార్టీ కోసం పనిచేసే కార్యకర్తలను పార్టీ అధికారంలో ఉన్నప్పుడు పట్టించుకో లేదని, ఇప్పుడు వారిపై దాడులు జరుగుతున్నా..స్పందించే నాధుడే లేడని వారు ఆవేదన వ్యక్తం చేస్తున్నారు. అధికారంలో ఉన్నప్పుడు వందల కోట్లు సంపాదించుకున్న నాయకులెవరూ..ఇప్పుడు కార్యకర్తలపై, సానుభూతిపరులపై దాడులు జరుగుతుంటే...ఆ దరిదాపు ల్లోకి పోవడం లేదని, కొందరు హైదరాబాద్‌, బెంగుళూరు, చెన్నై పట్టణాల్లో ఉంటూ...రాజకీయాలు చేస్తున్నారని, ఇటువంటి వారిని వెంటనే తొలగించి..వేరే వారికి బాధ్యతలు అప్పగించాలని, ఆ మేరకు సూచనలు కూడా చేయలేక పోయారని వారు అంటున్నారు. అధినేత 'చంద్రబాబు'కు అధికారం కోల్పోయిన వెంటనే కార్యకర్తలు గుర్తుకు వస్తారని, వారికి 40శాతం పదవులు ఇస్తానని చెబుతారని, గతంలో ఆయన ఏమి చేశారో తాము అప్పుడే మర్చిపోలేదని వారు ఆవేదనగా చెబుతున్నారు. పదేళ్లు ప్రతిపక్షంలో ఉన్నప్పుడు...యువతకు ప్రాధాన్యత ఇస్తానని చెప్పి...చివరకు నాయకుల కుమారులను, వారి బంధువులను తెచ్చి నెత్తిన పెట్టారని, ఇదేనా యువతకు ప్రాధాన్యత ఇవ్వడం..అని వారు ప్రశ్నిస్తున్నారు.

రాష్ట్రంలో సీనియర్‌ నేతల వారసుల అవినీతితో...పార్టీకి చెడ్డపేరు వచ్చిందని, వారి వల్ల నష్టం జరిగినా...ఇంకా వారినే ప్రోత్సహిస్తున్నారని, అటువంటి వారసులను ప్రోత్సహిస్తూ..అదే యువతకు ప్రాధాన్యత ఇచ్చినట్లు చెబితే ఎలా అని వారు ప్రశ్నిస్తున్నారు. సామాన్య కార్యకర్తలు..ప్రాణాలకు తెగించి పార్టీ కోసం పనిచేస్తుంటే...ఈ వారసులు..మెట్రో పాలిటన్‌ నగరాల్లో విలాసాలతో గడుపుతున్నారని, ఇటువంటి వారికి టిక్కెట్లు ఇస్తే..ఏమి జరిగిందో గత ఎన్నికల్లో చూసినా..వారినే మళ్లీ యువత పేరుతో 'చంద్రబాబు' ప్రోత్సహిస్తారని, ఆయన మారరని, పేరుకు యువతకు 40శాతం..అంటూ చెబుతారని ..చివరకు జరిగేది ఇదేనని వారు చెబుతున్నారు. నిన్నటి దాకా..'చంద్రబాబు' వెంట ఉండి...ఆయనను అన్ని రకాలుగా తప్పుదోవ పట్టించన వారే...మళ్లీ ఆయన చుట్టూ..ఆయన వారసుడి చుట్టూ తిరుగుతున్నారని, వీరి వల్ల ఒకసారి నష్ట పోయినా..మళ్లీ వారికే ప్రాధాన్యత ఇస్తున్నారని కొందరు ఆరోపిస్తున్నారు. గత ఎన్నికల్లో వీరి మాటలను, సూచనలను పరిగణలోకి తీసుకుంటే ఏమి జరిగిందో అందరికీ తెలుసు..ఆయన ఇంకా ఆయన వారినే నమ్ముతుంటే...పార్టీ ఎలా బతికి బట్టకడుతుందని కొందరు ఆవేదన వ్యక్తం చేస్తున్నారు. గతంలో పైరవీలు, కాంట్రాక్టులులు చేసి భారీగా సంపాదించిన వారు..ఇంకా అధినేత చుట్టూనే తిరుగుతూ..ఆయనను అదేదారిలో నడిపిస్తున్నారనే అభిప్రాయం వ్యక్తం అవుతోంది. ఈ రోజు జరిగిన పార్టీ విస్తృత స్థాయి సమావేశం సందర్భంగా గతంలో 'చంద్రబాబు' ముఖ్యమంత్రిగా ఉన్నప్పుడు ఏ విధంగా మంది మాగాధులు, ఏమి జరిగినా..అంతా బాగుందని చెప్పే మీడియా ప్రతినిధులు..అక్కడే తిష్టవేయడంపై అభ్యంత రాలు వ్యక్తం అవుతున్నాయి. ముఖ్యంగా..గత ప్రభుత్వ హయాంలో అంతా బాగుంది..మళ్లీ మనదే గెలుపు..అంటూ ఊదరగొట్టిన మీడియా సంస్థ ప్రతినిధులు..మళ్లీ చంద్రబాబు చుట్టూ ప్రదిక్షిణలు చేస్తున్నారని, వీరు ఆయనకు ఏమి సలహాలు ఇస్తారో..కానీ..వారి సలహాల వల్ల పార్టీ సర్వనాశనం అయిందనే అభిప్రాయం పార్టీలో మెజార్టీ నాయకుల్లో ఉంది. 

పార్టీ అనుబంధ సంఘాలను నియమించకుండా...గతంలో ప్రతిఫలం అనుభవించిన 'చంద్రబాబు' ఇప్పటికీ మేల్కనలేదని, తెలుగు మహిళ, తెలుగు రైతు, తెలుగు విద్యార్థి, కార్మిక పరిషత్‌ వంటి అనుబంధ సంఘాలను ఇప్పటికీ వేయలేదని, ఎంత సేపు...ఎలా ఓడాం...ఎందుకు ఓడాం..? లేక పోతే..ఎప్పుడూ చెప్పే...మాటలు చెప్పడం తప్ప... ప్రణాళిక ప్రకారం పనిచేయడం లేదని అంటున్నారు. పల్నాడు ప్రాంతంలో కార్యకర్తలపై, టిడిపి సానుభూతిపరులపై దాడులు జరుగుతుంటే..వాటిపై స్పందించాలని త్రిసభ్య సంఘాన్ని ఏర్పాటు చేశారని, ఈ సంఘం ఏమి చేసిందో చెప్పాలని పలువురు కార్యకర్తలు నిలదీస్తున్నారు. గత ఐదేళ్లల్లో అడ్డంగా అవినీతి చేసి..ప్రజలతో ఛీ కొట్టించుకున్న నేతలను, వృద్ధ నేతలను వారి వారసులను, 'చంద్రబాబు' ఆయన కుమారుడు లోకేష్‌ ఏమి చేసినా..శభాష్‌ అంటూ.. పేజీలు పేజీలు..వార్తలు రాసే భజనపరులను పక్కన పెట్టకపోతే...పార్టీ పరిస్థితి మరింత విషమిస్తుందని, ఆయన ఊకదంపుడు ఉపన్యాసాలు, ఆయన చుట్టూ ఉండే మందిమాగాధులు, పైరవీకారులు, మీడియా భజనపరులను పక్కకు తప్పించాలని మెజార్టీ కార్యకర్తలు, సానుభూతిపరులు కోరుకుంటున్నారు. మరి..ఆయన వారిని వదులుకుంటారా..? 

(451)
  • (0)
  • -
  • (0)

అభిప్రాయాలూ