లేటెస్ట్

సిఎం మాట వినలేదని 'తివారీ'ని బదిలీ చేశారా...!?

ముఖ్యమంత్రి కె.చంద్రశేఖర్‌రావు మాటను రెవిన్యూశాఖ ప్రత్యేక ప్రధాన కార్యదర్శి 'రాజేష్‌ తివారీ' లెక్క చేయనందునే ఆయనపై బదిలీ వేటు పడిందని తెలంగాణ ఐఎఎస్‌ వర్గాలు చెప్పుకుంటున్నాయి. ముఖ్యమంత్రి కె.చంద్రశేఖర్‌రావు ఎంతో ప్రతిష్టాత్మకంగా కొత్త రెవిన్యూ చట్టాన్ని తేవాలని భావిస్తుంటే ప్రత్యేక ప్రధాన కార్యదర్శిగా ఉన్న 'తివారి' అడ్డుపడు తున్నారని, గత కొంత కాలంగా ఇదే అంశంపై సిఎం తీవ్ర అసంతృప్తితో ఉన్నారట. రెవిన్యూ ఉద్యోగులు కొత్త రెవిన్యూ చట్టాన్ని తేవద్దని ఎంత ఒత్తిడి తెచ్చినా ముఖ్యమంత్రి మాత్రం తాను అనుకున్నట్లుగానే రెవిన్యూ చట్టానికి రూపకల్పన చేస్తున్నారు. అయితే ఆయనకు 'తివారీ' కలసి రాకపోవడంతో..ఆయనను బదిలీ చేశారని తెలుస్తోంది. రేపు,ఎల్లుండి జరగాల్సిన కలెక్టర్ల సమావేశంలో ఇదే అంశంపై ముఖ్యమంత్రి కెసిఆర్‌ ప్రత్యేకంగా చర్చించబోతున్నారు. అయితే తాను ఏమి చెప్పినా...రెవిన్యూశాఖ అధిపతి పట్టించుకోరని, ఇక ఉపేక్షించి ఉఫయోగం లేదనే భావనతోనే ఆయనపై వేటు వేశారని ప్రచారం జరుగుతోంది. కాగా నూతనంగా రెవిన్యూశాఖ ప్రత్యేక ప్రధాన కార్యదర్శిగా నియమించిన 'సోమేష్‌కుమార్‌' ముఖ్యమంత్రి కె.చంద్రశేఖర్‌రావుకు ఎంతో విధేయులు. తెలంగాణ ఉద్యమ సమయంలో 'సోమేష్‌కుమార్‌' కెసిఆర్‌కు ఎంతగానో సహకరించారు. దీన్ని దృష్టిలో పెట్టుకుని తెలంగాణ వచ్చిన తరువాత 'కెసిఆర్‌' ఆయనను జిఎంసిహెచ్‌ కమీషనర్‌గా నియమించారు. ఆ తరువాత ఆయనను అక్కడ నుంచి బదిలీ చేసినా ప్రాధాన్యత కల పోస్టునే ఇచ్చారు. తాజాగా తన మాటను దాటని 'సోమేష్‌కుమార్‌'కు రెవిన్యూశాఖ ప్రత్యేక ప్రధాన కార్యదర్శి ఇచ్చారని, దీంతో కెసిఆర్‌ అనుకున్నట్లు నూతన రెవిన్యూ చట్టం వస్తుందనే అభిప్రాయం వ్యక్తం అవుతోంది.

(166)
  • (0)
  • -
  • (0)

అభిప్రాయాలూ