లేటెస్ట్

'ధర్మాన' సోదరుల మధ్య విభేదాలు...!?

శ్రీకాకుళం జిల్లాలో అధికారపార్టీలో గట్టిపట్టున్న 'ధర్మాన' సోదరుల మధ్య విభేదాలు వచ్చాయని ప్రచారం జరుగుతోంది. ఎప్పటి నుంచో జిల్లా రాజకీయాలను శాసిస్తున్న ఈ ఇద్దరు సోదరుల మధ్య ఇటీవల కాలంలో మనస్పర్థలు వచ్చాయంటు న్నారు. ఈ విషయంపై స్వంత పార్టీలోనే చర్చ జరుగుతోంది. ముఖ్యంగా మాజీ మంత్రి 'ధర్మాన ప్రసాదరావు' తన అన్న 'ధర్మాన కృష్ణదాస్‌'పై ఆగ్రహంతో ఉన్నారని చెబుతున్నారు. ఒకప్పుడు కాంగ్రెస్‌లో ఒక వెలుగు వెలిగిన 'ధర్మాన్‌ ప్రసాదరావు' 2014 ఎన్నికల్లో ఓటమి తరువాత రాజకీయంగా కొంత వెనుకబడిపోయారు. అయితే 2019 ఎన్నికల్లో అన్నదమ్ములిద్దరూ ఎమ్మెల్యేలుగా గెలవడంతో 'అన్న' ధర్మాన కృష్ణదాస్‌కు 'జగన్‌' మంత్రి పదవి ఇచ్చారు. రాజకీయంగా సీనియర్‌, అనుభవం ఉన్న 'ధర్మాన ప్రసాదరావు'ను కాదని 'కృష్ణదాస్‌'కు మంత్రి పదవి ఇవ్వడంతోనే విభేదాలు బీజం పడిందంటున్నారు. అయితే ఈవిషయంపై 'ధర్మాన ప్రసాద్‌రావు' అప్పట్లోనే స్పష్టత ఇచ్చారు. అయితే తరువాత కాలంలో ఈ ఇద్దరి మధ్య పలు విషయాలపై స్పర్థలు వచ్చినట్లు తెలుస్తోంది. దీనిపై మంత్రి కృష్ణదాస్‌ పరోక్షంగా స్పందిస్తూ రెండేళ్ల తరువాత తనకు మంత్రి పదవి వద్దని, ఇక క్రియాశీలక రాజకీయాల్లో ఉండనని చెప్పుకొచ్చారు. ఇదంతా 'తమ్ముడి'ని బుజ్జగించేందుకే అంటున్నారు. 

2004లో కాంగ్రెస్‌ గెలిచిన తరువాత 'ధర్మాన ప్రసాద్‌రావు' వై.ఎస్‌.రాజశేఖర్‌రెడ్డి, రోశయ్య, కిరణ్‌కుమార్‌రెడ్డి మంత్రివర్గాల్లో మంత్రిగా పనిచేసి మంచి గుర్తింపు తెచ్చుకున్నారు. మంచి వాగ్ధాటి ఉన్న నేతగా గుర్తింపు తెచ్చుకున్నారు..అదే సమయంలో వివాదాస్పదం కూడా అయ్యారు. శ్రీకాకుళం జిల్లాలో ఎదురులేని నేతగా పేరు తెచ్చుకున్న ఆయన రాష్ట్ర విభజనతో ప్రజలకు దూరం అయ్యారు. అయితే ఆయన తమ్ముడు మాత్రం వైకాపాను అంటిపెట్టుకుని..శ్రీకాకుళంలో పార్టీకి పెద్దదిక్కుగా వ్యవహరించారు. పార్టీ ప్రతిపక్షంలో ఉన్నప్పుడు పార్టీని ఆదుకున్న 'కృష్ణదాస్‌'కు మంత్రి పదవి ఇచ్చి 'జగన్‌' ఆయనను గౌరవించారు. అయితే సీనియర్‌ అయిన తనను పక్కన పెట్టారనే భావనతో 'ధర్మాన' ఇటీవల కాలంలో అంటీముట్టనట్లు వ్యవహరిస్తున్నారు. ఈ నేపథ్యంలో ఇటీవల ప్రతిపక్ష టిడిపి నిర్వహించిన ఓ కార్యక్రమంలో 'ధర్మాన ప్రసాదరావు' పాల్గనడం చర్చనీయాంశమైంది. దీంతో ఆయన 'అన్న'ను ఇరుకునపెట్టడానికే ఇలా వ్యవహరిస్తున్నారనే మాట స్వంత పార్టీ నేతలే అంటున్నారు. మొత్తం మీద..అన్నాదమ్ముళ్ల మధ్య వచ్చిన విభేదాలు టీ కప్పులో తుఫాన్‌ వంటివని, త్వరలోనే వాటిని వారు సరిదిద్దుకుంటారని అంటున్నారు. చూద్దాం..మరి ఏమి జరుగుతుందో..?

(158)
  • (0)
  • -
  • (0)

అభిప్రాయాలూ