లేటెస్ట్

'ఆంధ్రా' మరో 'వెనిజులా' కానుందా...!?

ప్రస్తుత ఆంధ్రప్రదేశ్‌ రాష్ట్ర ఆర్థిక పరిస్థితిని చూసి జాతీయ, అంతర్జాతీయ ఆర్థిక నిపుణులు నివ్వెరపోతున్నారు. ఆంధ్రప్రదేశ్‌ ఎదుర్కొంటున్న ఆర్థిక సమస్యలను చూసి..మరి కొన్నాళ్లల్లో 'ఆంధ్రప్రదేశ్‌' మరో 'వెనుజలా' వలే కానుందని స్పష్టం చేస్తున్నారు. ప్రస్తుతం రాష్ట్రంలో నెలకొన్న పరిస్థితులను వారు విశ్లేషిస్తూ..ఈ సమస్యకు ప్రకృతి వైపరీత్యాలు లేదా ఆంక్షల వల్ల వచ్చినవి కావని, గత పాలకులు, ప్రస్తుత పాలకుల విధానాల వల్లే వచ్చినవి చెబుతున్నారు. కాంగ్రెస్‌ హయాంలో ప్రారంభమైన సంక్షేమ కార్యక్రమాలు తరువాత వచ్చిన తెలుగుదేశం పాలకులు కొనసాగించడం, గతంలో కాంగ్రెస్‌ ప్రభుత్వం అమలు చేసిన సంక్షేమ పథకాల కంటే మిన్నగా చేయడంతో రాష్ట్ర ఆర్థిక పరిస్థితి నానాటికి దిగజారిందనడంలో ఎటువంటి సందేహం లేదు. సంక్షేమ పథకాల వల్ల అభివృద్ధి కుంటుపడుతుందని తొలినాళ్లల్లో ముఖ్యమంత్రిగా ఉన్నప్పుడు చెప్పిన 'చంద్రబాబునాయుడు' తరువాత కాలంలో ఓట్ల కోసం సంక్షేమ పథకాలను విరివిగా అమలు చేశారు. ఆయన తరువాత రాజశేఖర్‌రెడ్డి సంక్షేమాన్ని మరో దశకు తీసుకెళ్లారు...ఆయన బాటలోనే కాంగ్రెస్‌ ముఖ్యమంత్రులు రోశయ్య, కిరణ్‌కుమార్‌రెడ్డిలు పయనించగా...చివరకు ఇటీవల అధికారంలోకి వచ్చిన వైకాపా ప్రభుత్వం వీరి తలదన్నే సంక్షేమాన్ని నెత్తికెత్తుకుని కిందా మీదా పడుతుంది. ప్రస్తుతం..ఉన్న పరిస్థితులను గమనిస్తే...సంక్షేమ పథకాల అమలు విచ్చలవిడి అవినీతి వల్ల ఆంధ్రప్రదేశ్‌ మరో 'వెనుజులా' దేశంలా మారిపోవడానికి ఎంతో కాలం పట్టదని..ఆర్థిక నిపుణులు పేర్కొంటున్నారు. 

'వెనిజులా'లో ఏం జరిగింది...?

ఒకప్పుడు 'వెనిజులా' సంపన్న దేశమే. పుష్కలమైన ముడిచమురు ఉండడంతో దాన్ని ఇతర దేశాలకు ఎగుమతి చేసి భారీగా సొమ్ములు సంపాదించుకునేది. అయితే తరువాత కాలంలో ముడిచమురు ధరలు తగ్గడంతో..ఒక్కసారిగా ప్రభుత్వ పరిస్థితి తలకిందులైంది. అప్పటి వరకు వివిధ ప్రజాకర్షణ పథకాలు అమలు చేసిన ఆ దేశ పాలకులు..తమకు ఆదాయాలు వచ్చే మార్గాలు మూసుకుపోవడంతో తప్పులు మీద తప్పులు చేసుకుంటూపోయారు. అప్పటికే ఉన్న ప్రైవేట్‌ సంస్థలను జాతీయం చేయడంతో..దేశంలోని ప్రజలందరూ...ప్రభుత్వ ఉద్యోగులుగా మారిపోయారు. దీంతో..ప్రతి వ్యక్తి జీవనానికి అససరమైన నిధులు ఇవ్వడం ప్రభుత్వ విధిగా మారింది. ఎటువంటి పనులు చేయకుండా...ప్రజలంతా ప్రభుత్వం ఇచ్చే నిధులతోనే జీవించేవారు. ఇదే సమయంలో ఉచితంగా ప్రభుత్వం సొమ్ములు ఇస్తుంటే ప్రజలు విలాసాలకు అలవాటు పడి...విచ్చలవిడిగా వ్యవహరించారు. అయితే ప్రభుత్వ ఆదాయమార్గాలు మూసుకుపోవడంతో ప్రభుత్వం చేతులు ఎత్తే పరిస్థితి వచ్చింది. ఒక వైపు ప్రజలు ఎవరికి వారు తమ స్వంత కాళ్లపై ఆధారపడకుండా..ప్రభుత్వం ఇచ్చే వాటి కోసం ఎగబడడం..ప్రభుత్వం ప్రజలకు సరిపడా నిధులను సమకూర్చలేకపోవడంతో...దేశంలో సంక్షోభం తలెత్తింది. ప్రజలను పనిచేయనీయకుండా..అన్నింటిని వారికి అమర్చిపెట్టిన పాలకులు..చివరకు..ప్రభుత్వ ఖజానా దివాలెత్తడంతో..చేతులు ఎత్తేయాల్సిన పరిస్థితి వచ్చింది. ప్రైవేటు సంస్థలు లేకపోవడం ఉన్నా అవి పనిచేసే పరిస్థితులు లేకపోవడం, ప్రజలకు ప్రభుత్వమే అన్నీ ఉచితంగా ఇస్తోండడంతో..వారు సోమరులుగా మారిపోయి...ఏ పనిచేయకుండా...ఉండడం, ఇతర కారణాలు కలిపి ఆ దేశం దివాలా తీసింది. ప్రజలు అడిగినా అడగకపోయినా..సంక్షేమ పథకాలు అమలు చేసి..దెబ్బతిన్న చందంగానే..ఆంధ్రప్రదేశ్‌ను ఏలిన వివిధ ముఖ్యమంత్రులు సంక్షేమపథకాలను విరివిగా ప్రకటించి ప్రజలను సోమరిపోతులను చేశారు. దీంతో..ఇప్పుడు ఆంధ్రప్రదేశ్‌లోనూ ఇదే పరిస్థితి తలెత్తే అవకాశం స్పష్టంగా ఉందని ఆర్థిక విశ్లేషకులు చెబుతున్నారు.

ప్రస్తుతం ఆంధ్రప్రదేశ్‌లోని ప్రజల్లో దాదాపు 70శాతం మంది ప్రభుత్వ పథకాలపైనే ఆధారపడి జీవిస్తున్నారు. వీరంతా దారిద్య్రరేఖకు దిగువగా ఉన్నారు. ప్రభుత్వం సంక్షేమ పథకాలతో తమను ఆదుకుంటుండడంతో వీరు పనిచేయకుండా సోమరిపోతులుగా వ్యవహరిస్తున్నారు. మార్చి 2019 నాటికి 80శాతం మంది ప్రజలు ప్రభుత్వ మద్దతు పథకాలతో జీవించాలని భావిస్తున్నారు. ఇదే సమయంలో 50శాతం కంటే పక్కువ మంది విద్యావంతులు మరియు తెలివైన వారు మెరుగైన అవకాశాల కోసం రాష్ట్రం వదలి విదేశాలకు లేదా...ఇతర రాష్ట్రాలకు వెళ్లిపోతున్నారు. 2019 అంచనాల ప్రకారం 25శాతం మంది రాష్ట్ర పౌరులు ఏదో రకమైన ప్రభుత్వ పథకాల ద్వారా లబ్దిపొందుతున్నారు. ప్రభుత్వం అందించే సంక్షేమ కార్యక్రమాల ద్వారా జీవితాలను నెట్టుకొస్తున్నారు. 

ఇది ఇలా ఉంటే ఇటువంటి సంక్షేమ పథకాలను అమలు చేయడం ద్వారా రాష్ట్రం తీవ్ర ఆర్థిక ఇబ్బందులను ఎదుర్కొంటుంది. దీంతో పాలకులు ఎడెపెడా అప్పులు చేస్తున్నారు. ఇప్పటికే దేశంలోనే ఆంధ్రప్రదేశ్‌ రాష్ట్రం ఎఫ్‌ఆర్‌బిఎం పరిమితి 3.5శాతంతో దేశంలోనే నెంబర్‌వన్‌ స్థానాన్ని సంపాదించింది. ఆగస్టు 2019 నాటికి అన్ని పూర్తి అయిన పనులకు ప్రభుత్వం బిల్లులు చెల్లించలేక డిపాల్ట్‌ సమస్యను ఎదుర్కొంటుంది. ఇప్పటి దాకా దాదాపు 25వేల కోట్లును బిల్లుల రూపంలో ప్రభుత్వం చెల్లించాల్సిన పరిస్థితి ఉంది. ఉచిత విద్య, మరియు ఆరోగ్యం కోసం ఖర్చు చేసిన నిధులను చెల్లించలేకపోవడంతో ఇప్పుడా పథకాలు ఆగిపోయాయి. ప్రభుత్వం నిధులు చెల్లించలేకపోవడంతో ప్రైవేట్‌ హాస్పటల్స్‌ తీవ్ర ఆర్థిక సమస్యలను ఎదుర్కొంటున్నాయి. ప్రైవేట్‌సంస్థలు ఆర్థిక సంక్షోభానికి గురైతే..ఇక సంక్షోభానికి అడ్డూ అదుపూ ఉండదు. సంస్థలు మూతపడడం ఖాయం కనుక వాటిలో పనిచేసే వారి ఉపాధి పోతోంది. తద్వారా నిరుద్యోగం మరింత పెరిగే అవకాశం అంది. 

ప్రభుత్వంపై పెనుభారం పడే వేతన సవరణలు చేయమని అవినీతి అధికారులు, బ్యూరోక్రాట్‌లు ప్రభుత్వంపై ఒత్తిడి తెచ్చి, సమ్మెలు చేసి తాము అనుకున్నది సాధిస్తున్నాయి. దీంతో రాష్ట్రం మరింతగా ఊబిలోకి కూరుకుపోతోంది. 2014లో అధికారంలోకి వచ్చిన టిడిపి ప్రభుత్వం అప్పటి ఉద్యోగుల ఒత్తిడితోనే 40శాతం వేతన పెంపును చేసింది. ఇది రాష్ట్ర ఆర్థిక పరిస్థితిని మరింత కుంగతీసింది. ఇదే సమయంలో పెన్షన్లును 100శాతం పెంచివేశారు..మరోవైపు అన్నా క్యాంటీన్లు, మహిళలకు ఉచిత నగదు పంపిణీ, రైతులకు రుణమాఫీ వంటి పథకాలను అమలు చేయడంతో రాష్ట్ర ఆర్థిక పరిస్థితి దుర్బరంగా తయారైంది. ఉచిత పథకాలపై అప్పటి ప్రభుత్వం చేసిన ఖర్చు దాదాపు 20శాతం. దీని వల్ల ప్రభుత్వ అప్పులు 2.5లక్షల కోట్లకు చేరాయి. వడ్డీ చెల్లింపులు దాదాపు 25వేల కోట్లకు వచ్చాయి. వడ్డీ చెల్లింపులు ఇలా ఉంటే ప్రస్తుత ప్రభుత్వం మరిన్ని నూతన అప్పులు చేయడానికి సిద్ధపడుతోంది. 

2019లో అధికారంలోకి వచ్చిన వైకాపా ప్రభుత్వం సంక్షేమాన్ని తారా స్థాయికి తీసుకుపోయింది. అడిగిన వారికి..అడగని వారికి వరాలు కురిపిస్తూ..నవరత్నాలు అంటూ ఊరిస్తూ..ప్రజలను మరింతగా సోమరిపోతులుగా తయారు చేస్తోంది. నవరత్నాల పేరిత వైకాపా ప్రభుత్వం రాష్ట్ర వార్షిక ఆదాయానికి సమానమైన రూ.50,000/- కోట్లను ప్రజలకు పంచబోతోంది. 2018 సంవత్సర వార్షిక ఆదాయం కేవలం రూ.55వేల కోట్లు కాగా..ఇప్పుడు 'జగన్‌' ప్రభుత్వం దాదాపు రూ.50వేల కోట్లను ప్రజలకు వివిధ రూపాల్లో అందించబోతోంది. కొత్త ప్రభుత్వం తమ బడ్జెట్‌ రూ.2.2లక్షల కోట్లు ఉంటుందని దీనిలో కొత్తగా రూ.50వేల కోట్లను రుణాలుగా తీసుకుంటామని, కేంద్ర ప్రభుత్వంనుంచి రూ.60వేల కోట్ల వరకు అదనపు విచక్షణానిధులను తెచ్చుకుంటామని మరో రూ.35వేల కోట్లు కేంద్ర పన్నుల వాటాగా వస్తాయని లెక్కలు కట్టారు. అయితే దీనిలో దాదాపు రూ.50వేల కోట్లు వేతనాలకేపోతాయి మరో 12వేల కోట్లు పెన్షన్లు, 25వేల కోట్లు వడ్డీలకే సరిపోతాయి. రాష్ట్ర వార్షిక బడ్జెట్‌ మొత్తం వీటికే పోతే..ఇక అభివృద్ధి చెందేది ఎక్కడ..? ఇప్పుడు ఈ రాష్ట్రం మనుగడ సాగించాలంటే కేంద్రం నుంచి సంవత్సరానికి రూ.1.1లక్షల కోట్ల రుణాలు మరియు గ్రాంట్లు అవసరమని సాక్షాత్తూ ప్రభుత్వమే అధికారికంగా పేర్కొంది. కొత్త అభివృద్ధి కార్యక్రమాలకు నిధులు లేవు. అన్ని ప్రాజెక్టులు గ్రౌండింగ్‌ ఆగిపోయాయి. అవినీతి ఆరోపణలతో కేంద్రం నుంచి నిధుల వచ్చే పోలవరం వంటి ప్రాజెక్టు పనులు నిలిచిపోయాయి. దీంతో దీనిపై ఆధారపడి జీవిస్తున్నవారు రోడ్డునపడ్డారు. ఇదే సమయంలో ప్రపంచ వ్యాప్తంగా వచ్చిన ఆర్థికమాంద్యం దెబ్బకు 'ఆంధ్రా' చిగురుటాకులా వణికిపోతోంది. ఒకవైపు మాంద్యం దెబ్బకు ఉద్యోగాలు ఊడిపోతుండగా..మరోవైపు ప్రభుత్వ కక్షసాధింపు చర్యలతో పెట్టుబడుదారులు పారిపోతున్న పరిస్థితి.. ఉపాధి లేకపోవడంతో ఇక్కడ ఉన్న తెలివైన వారు వేరే రాష్ట్రాలకు, దేశాలకు వెళ్లిపోతున్నారు. ఇక్కడే ఉన్నవారు మాత్రం ప్రభుత్వం ఇచ్చే నిధుల కోసం చకోరపక్షులా ఎదురుచూస్తున్నారు. ఓట్ల కోసమైనా...ప్రజలకు సొమ్ములు ఇద్దామని పాలకులు భావించినా..ఖజానా నిండుకోవడంతో దిక్కులు చూడడం..పాలకుల వంతైంది. మొత్తం మీద..చూస్తే...'వెనిజులా' దేశంలో ఎటువంటి పరిస్థితులు ఏర్పడి...సంక్షోభానికి కారణమయ్యాయో..ఇప్పుడు అవే పరిస్థితులు 'ఆంధ్రా'లో స్పష్టంగా కనిపిస్తున్నాయి. మరి కొన్నిరోజుల్లో...ఆంధ్రప్రదేశ్‌ మరో 'వెనిజులా' అవడం ఖాయం.  

(375)
  • (0)
  • -
  • (0)

అభిప్రాయాలూ