WWW.JANAMONLINE.COM

లేటెస్ట్

కృష్ణా డిజిటల్‌పై వాషింగ్టన్‌ ఆసక్తి...!

కలెక్టర్‌ లక్ష్మీకాంతం సంస్కరణలపై అమెరికా పత్రికలో కథనం...!

పారదర్శక పాలన కోసం కృష్ణా జిల్లా కలెక్టర్‌ 'లక్ష్మీకాంతం' చేపట్టిన డిజిటలైజేషన్‌ కార్యక్రమం అద్బుతమైన ఫలితాలను ఇస్తోంది. ప్రజలకు సంబంధించిన వివిధ సంక్షేమపథకాలు, అభివృద్ధి కార్యక్రమాలను డిజిటలైజేషన్‌ చేయటంతో..ఆయా పథకాల ఫలాలు నేరుగా ప్రజలకు చేరిపోతున్నాయి. అర్హులైన వారు వాటి ప్రతిఫలాలను అనుభవిస్తూ...ప్రభుత్వంపై ప్రసంశలు కురిపిస్తున్నారు. అదే సమయంలో అనర్హులను అడ్డుకోవడంతో...జిల్లా వందల కోట్ల రూపాయలను ఆదా చేసుకోగలుగుతోంది. జిల్లా కలెక్టర్‌ 'లక్ష్మీకాంతం' చేపట్టిన పాలనాసంస్కరణలు, సాంకేతిక నైపుణ్యాన్ని ఒడుపుగా వాడుకోవడంతో...దేశ వ్యాప్తంగా, అంతర్జాతీయంగా ఆయన చేపట్టిన సంస్కరణలకు గుర్తింపు వస్తోంది. తాజాగా జిల్లా వ్యాప్తంగా అమలవుతున్న 'డిజిటలైజేషన్‌' కార్యక్రమాన్ని పరిశీలించేందుకు వాషింగ్టన్‌ ఆసక్తి చూపుతోంది. జిల్లాలో డిజిటలైజేషన్‌ అమలును పరిశీలించేందుకు ఒక బృందం అమెరికా నుంచి జిల్లాకు వస్తున్నట్లు తెలుస్తోంది. డిజిటల్‌ కృష్ణాపై వాషింగ్టన్‌లోని ఒక పత్రికలో ప్రచురించిన కథనం గేట్స్‌ ఫౌండేషన్‌ సీనియర్‌ అధికారిని ఆకట్టుకుందని..దీంతో వారు స్వయంగా డిజిటలైజేషన్‌ను అమలును పరిశీలించేందుకు ఏప్రిల్‌ నెలల్లో జిల్లాకు రానున్నారు.  

వందల కోట్ల ఆదా...!

కృష్ణా జిల్లాల్లో చేపట్టిన డిజిటలైజేషన్‌ వల్ల జిల్లాకు వందల కోట్ల రూపాయలు ఆదా అవుతున్నాయి.గతంలో ప్రభుత్వం చేపట్టిన వివిధ పథకాలు, కార్యక్రమాల్లో దాదాపు 60శాతం మాత్రమే ప్రజలకు చేరేవి. మిగతా 40శాతం అక్రమార్కులు, లంచగొండుల జేబుల్లోకి వెళ్లేవి. అయితే ఇప్పుడు..డిజిటలైజేషన్‌ చేయటంతో దాదాపు 90శాతం ప్రభుత్వ పథకాలు ప్రజలకు నేరుగా చేరుతున్నాయి. జిల్లాలో ప్రభుత్వం అమలు చేస్తోన్న ఈపోస్‌, ఏఈఎఫ్‌డీఎస్‌, ఈ ఆఫీసు, ఈ సీడ్‌, ఈ క్రాప్‌, ఎల్‌సీసీఎం, ఈ విజిట్‌, భూదార్‌, ఈ కలెక్టర్‌ వంటి ఎన్నో కార్యక్రమాలను డిజిటలైజేషన్‌ చేశారు. దీంతో అనర్హులకు ప్రభుత్వ పథకాలు చేరకుండా అర్హులైన వారికే ఫలాలు వారి ఖాతాలోకి చేరిపోతున్నాయి. ఉదాహరణకు గతంలో రేషన్‌ను బోగస్‌ కార్డుల ద్వారా అక్రమార్కులు కొల్లగొట్టేవారు. దీని అరికట్టడానికి జిల్లా యంత్రాంగం ఈ పోస్‌ను తీసుకు వచ్చింది. దీని వల్ల లక్ష మంది రేషన్‌ కార్డు కలిగిన వారు..రేషన్‌ తీసుకోవడం లేదని తేలడంతో...జిల్లాకు దాదాపు రూ.100కోట్ల రూపాయలు ఆదా అయ్యాయి. అదే విధంగా రైతులకు ఎరువుల పంపిణీ (ఆధార్‌ ఎనేబుల్‌ ఫెర్టిలైజర్స్‌, డిస్ట్రిబ్యూషన్‌ స్కీమ్‌), 'లోన్‌ చార్జ్‌ క్రియేషన్‌ మాడ్యూల్‌, భూదార్‌,ఈ విజిట్‌, డ్రోన్‌ల వినియోగంతో అభివృద్ధి,సంక్షేమ కార్యక్రమాలను అమలు చేస్తూ...పాలనలో వినూత్నంగా ముందుకు దూసుకుపోతున్నారు. జిల్లా కలెక్టర్‌ లక్ష్మీకాంతం చేపట్టిన వివిధ కార్యక్రమాలు ఇప్పటికే విజయవంతం అయ్యాయి. వినూత్న ఆలోచనలు, కార్యక్రమాలతో..మిగితా జిల్లాల కలెక్టర్ల కన్నా...వేగంగా పనులు పూర్తి చేస్తుండడంతో...ఆయన పేరు రాష్ట్ర వ్యాప్తంగా మారుమ్రోగిపోతోంది. ప్రజాకలెక్టర్‌గా, సమర్థుడిగా..ఆయన పేరు తెచ్చుకుని పలువురి అధికారులకు ఆదర్శంగా నిలుస్తున్నారు.


(646)
  • (0)
  • -
  • (0)

అభిప్రాయాలూ