'రాజధాని' రేట్ల కన్నా తక్కువలో...!
మీరు విమాన ప్రయాణం చేయాలనుకుంటున్నారా? అయితే మీకో ఆఫర్‌ ధర.. ఎయిర్‌ ఇండియా తన ప్రయాణీకులను పెంచుకోవడానికి కొత్త పథకాన్ని అమలులోకి తెచ్చింది. ఇప్పటి దాకా చివరి నిమిషంలో టిక్కెట్‌ బుక్‌ చేసుకునే ప్రయాణీకుల నుంచి భారీగా వసూలు చేస్తోన్న ఎయిర్‌ ఇండియా 'రాజధాని' ట్రైన్‌ రేట్లకు చివరి టిక్కెట్లును విక్రయిస్తుందట. ఆక్యుపెన్సీ పెంచుకునే దిశలో ఎయిర్‌ ఇండియా ఈ సంచలన నిర్ణయం తీసుకుంది. ట్రంక్‌ రూట్స్‌ లో మరింత మంది ప్రయాణీకులను ఆకర్షించే దిశగా చివరి నిమిషంలో తమ విమాన టికెట్ల ధరలను మరింత తగ్గిస్తోంది. ఈ తగ్గింపు ధరల ఆఫర్‌ ద్వారా నాలుగు ప్రధాన మార్గాల్లో ఢిల్లీ-ముంబై, ఢిల్లీ-చెన్నై, ఢిల్లీ-కోలకతా, ఢిల్లీ-బెంగళూరు మధ్య ప్రయాణించేవారికి భారీ ఊరట కల్పిస్తోంది.ముఖ్యంగా చివరి నిమిషంలో ప్రయాణించే వారికి ఈ ఆఫర్‌ మంచి అవకాశం. అయితే విమానం బయలుదేరే నిర్దిష్ట సమయానికి కేవలం నాలుగు గంటలముందు బుక్‌ చేసుకోవాలని తెలిపింది. రాజధాని ట్రైన్‌ లోని 2-టైర్‌ ఏసీ టికెట్‌ ఛార్జీలకు కంటే తక్కువగా ఉండనున్నట్టు ఎయిర్‌ ఇండియా ప్రకటించింది. రాజధాని ఎక్స్‌ ప్రెస్‌ ఎసీ టు టైర్‌ ధరలు ఢిల్లీ-ముంబై రూ. 2,870, ఢిల్లీ-చెన్నై రూ.3,905. ఢిల్లీ-కోలకతా రూ.2,890 ఢిల్లీ-బెంగళూరు రూ.4,095 లుగా ఉన్నాయి. అంటే.. చివరి నిమిషంలో ఎయిర్‌ ఇండియా టికెట్‌ బుక్‌ చేసుకుంటే ఈ ధరకంటే తక్కువ ధరలకే.. తక్కువ సమయంలో విమానంలో ప్రయాణించవచ్చన్నమాట.
