సిఎంఓలోకి కాటమనేని, ముద్దాడలు...!
ఆంధ్రప్రదేశ్ ముఖ్యమంత్రిగా నారా చంద్రబాబునాయుడు ఈ నెల 12వ తేదీన ప్రమాణస్వీకారం చేయబోతున్నారు. ప్రమాణస్వీకారానికి ముందే ఆయన తన టీమ్ను ఎంపిక చేసుకుంటున్నారు. ముందుగా ప్రభుత్వ ప్రధాన కార్యదర్శిని ఎంపికపై కసరత్తు చేస్తున్నారు. ప్రస్తుత సిఎస్ జవహర్రెడ్డిని ఇప్పటికే సెలవుపై పంపారు. ఆయన స్థానంలో నీరబ్కుమార్ ప్రసాద్ ను నియమించాలా..? లేక మరొకరిని ఎంపిక చేయాలా..అనేదానిపై ఆయన ఆలోచన చేస్తున్నారు. ఇది ఇలా ఉంటే పాలనలో ఎంతో కీలకమైన సిఎంఓలో ఎవరెవరిని నియమించాలో అనేదానిపై ఆయన ఇప్పటికే ఒక అభిప్రాయానికి వచ్చారని తెలుస్తోంది. గతంలో చంద్రబాబు సిఎంఓలో పనిచేసిన అధికారులెవరినీ ఆయన ఈసారి దగ్గరకు రానీయరని ప్రచారం సాగుతోంది. ఈసారి నిజాయితీపరులు, సమర్ధులు, కష్టపడి పనిచేసే అధికారులను ఆయన సిఎంఓలోకి తీసుకుంటారని తెలుస్తోంది. దీనిలో భాగంగా టిడిపి హయాంలో పశ్చిమగోదావరి కలెక్టర్గా పనిచేసిన కాటమనేని భాస్కర్ను సిఎంఓలోకి తీసుకుంటారని ప్రచారం సాగుతోంది. పశ్చిమగోదావరి జిల్లా కలెక్టర్గా ఆయన మంచి ఫలితాలను రాబట్టారు. అప్పట్లో ప్రభుత్వం ప్రతిష్టాత్మకంగా చేపట్టిన పోలవరం ప్రాజెక్టు పనులను భాస్కర్ దగ్గరుండి పర్యవేక్షించారు. నాడు చంద్రబాబు ప్రతి సోమవారం పోలవరం అంటూ ఆ ప్రాజెక్టు పనులపై సమీక్ష చేసేవారు.
అప్పట్లో జలవనరులశాఖ మంత్రిగా ఉన్న దేవినేని ఉమామహేశ్వరరావు, కలెక్టర్ భాస్కర్లు చంద్రబాబు విధానాలకు, ఆయన ఆలోచనకు అనుగుణంగా పోలవరం పనులను పరుగులెత్తించారు. అప్పటి వరకు పోలవరం ప్రాజెక్టులో తట్టమట్టి తీయని పరిస్థితి నుంచి ఈ ముగ్గరు కలసి ప్రాజెక్టు నిర్మాణాన్ని దాదాపు 72శాతం పూర్తి చేశారు. ప్రాజెక్టులో ఎంతో కీలకమైన రిజర్వాయర్లోమట్టిపని, కరకట్ట, కుడికాలవ పనులు, లైనింగ్, ఎడమకాలువ మట్టిపని,కాపర్డ్యామ్, స్పిల్వే, 14గేట్ల ఏర్పాటు వంటి పనులు భాస్కర్ హయాంలోనే పూర్తయ్యాయి. ఇదొక్కటే కాదు అప్పట్లో టిడిపి ప్రభుత్వం ఆరె నెలల్లో పూర్తి చేసిన పట్టిసీమ ప్రాజెక్టులోనూ భాస్కర్ విశేషంగా కృషి చేశారు. నాడు పట్టిసీమ పనుల కోసం ఆయన అర్ధరాత్రిలు కాలవగట్లపై నిద్రించారు. నిజాయితీ, సమర్థత, కష్టపడే వాడిగా భాస్కర్కు పేరుంది. నిర్మోహటంగా వ్యవహరిస్తారని, కిందస్థాయి అధికారులపై అతిగా కోప్పడతారని ఆయన గురించి విమర్శలు ఉన్నాయి. కాగా మరో సినియర్ ఐఏఎస్ ముద్దాడ రవిచంద్ర సిఎంఓకు రావడం దాదాపు ఖాయమైపోయింది. రవిచంద్రకు నిజాయితీపరుడు, సమర్ధుడు, సౌమ్యుడిగా గుర్తింపు ఉంది. పనిచేసే అధికారిగా ఆయన గుర్తింపు తెచ్చుకున్నారు. బడుగు,బలహీనవర్గాల ప్రజలకు అండగా ఉంటారని, తన వద్దకు వచ్చే వారి పట్ల మర్యాదగా ప్రవర్తిస్తారని, వారు చెప్పిన సమస్యలు పరిష్కరించడానికి కృషి చేస్తారు. గతంలో ఎన్నో ప్రభుత్వాల్లో పనిచేసి మంచి అధికారిగా పేరు తెచ్చుకున్నారు. నిరాడంబరంగా వ్యవహరించే ఆయన పనిలోనూ అంతే వ్యవహరిస్తారు. ఎటువంటి వివాదాలకు తావివ్వకుండా, నిజాయితీగా, సమర్థవంతంగా చెప్పిన పనిని పూర్తి చేస్తారు. వీరిద్దరూ కాకుండా సీనియర్ ఐఏఎస్లు బుడితి రాజశేఖర్, కోన శశిధర్, ప్రవీణ్కుమార్, ఆర్.పి.సిసోడియా వంటి వారు కూడా సిఎంఓలోకి రావడానికి అవకాశం ఉంటుంది. మొత్తం మీద ముద్దాడ రవిచంద్ర, కాటమనేని భాస్కర్లు సిఎంఓలోకి రావడం లాంఛనమే అన్న ప్రచారం టిడిపివర్గాలు, ప్రభుత్వ వర్గాల్లో సాగుతోంది.
