వైకాపాకు మ‌రో షాక్ త‌గిలింది. ఆ పార్టీ రాజ్య‌స‌భ స‌భ్యుడు ఆర్‌.కృష్ణ‌య్య త‌న ప‌ద‌వికి రాజీనామా చేశారు. మ‌రో నాలుగేళ్ల స‌భ్య‌త్వం ఉండ‌గానే ఆయ‌నీ నిర్ణ‌యం తీసుకున్నారు. ఆర్‌.కృష్ణ‌య్య రాజీనామా చేస్తార‌ని గ‌త కొన్ని రోజులుగా ప్ర‌చారం సాగుతోంది. అయితే..ఆయ‌న తాను జ‌గ‌న్ వెంట‌నే ఉంటాన‌ని, రాజీనామా చేయ‌న‌ని చెప్పారు. అయితే అనూహ్యంగా ఆర్‌.కృష్ణ‌య్య నిన్న రాజ్య‌స‌భ‌కు రాజీనామా చేశార‌ని, అయితే దానిని గోప్యంగా ఉంచార‌ని, ఈ రోజు రాజ్య‌స‌భ ఛైర్మ‌న్ ఆర్‌.కృష్ణ‌య్య రాజీనామా చేశార‌ని, ఆయ‌న రాజీనామాను ఆమోదిస్తున్నామ‌ని చెప్పేవ‌ర‌కూ ఈ విష‌యం ఎవ‌రికీ తెలియ‌దు. వైకాపా నుంచి ఎన్నికైన స‌భ్యుల్లో ఇప్ప‌టికే బీద మ‌స్తాన్‌రావు, మోపిదేవి వెంక‌ట‌ర‌మ‌ణ‌లు రాజీనామా చేయ‌గా, ఇప్పుడు ఆర్‌.కృష్ణ‌య్య వంతు అయింది. బీద మ‌స్తాన్‌రావు, మోపిదేవిలు తాము టిడిపిలో చేర‌తామ‌ని ప్ర‌క‌టించారు. అయితే..వీరి దారిలోనే ఆర్‌.కృష్ణ‌య్య న‌డుస్తారా..లేక‌..బిజెపిలో చేర‌తారా..? అనేదానిపై ఉత్కంఠ‌త నెల‌కొంది. కాగా ఆయ‌న బిజెపిలో చేర‌తార‌ని, కేంద్ర హోంమంత్రి హామీ ఇచ్చిన త‌రువాతే..ఆయ‌న త‌న రాజీనామాను స‌మ‌ర్పించార‌ని ప్ర‌చారంసాగుతోంది. బీసీ ఉద్య‌మ‌నాయ‌కుడిగా ఆర్‌.కృష్ణ‌య్య తెలుగురాష్ట్రాల్లో సుప‌రిచితుడు. 2014 తెలంగాణ అసెంబ్లీ ఎన్నిక‌ల్లో ఆయ‌న టిడిపి నుంచి ఎల్‌బిన‌గ‌ర్ ఎమ్మెల్యేగా ఎన్నిక‌య్యారు. అప్ప‌ట్లో ఆయ‌న టిడిపి నుంచి తెలంగాణ ముఖ్య‌మంత్రి అభ్య‌ర్థిగా ప్ర‌క‌టించ‌బ‌డ్డారు. అయితే..ఆ ఎన్నిక‌ల్లో టిడిపి కేవ‌లం 15 స్థానాలు మాత్రమే సాధించింది. అయితే..త‌రువాత కాలంలో ఆర్‌.కృష్ణ‌య్య టిడిపికి దూరం అయ్యారు. 2019లో ఆంధ్రాలో జ‌గ‌న్ గెలిచిన దగ్గ‌ర నుంచి ఆయ‌న భ‌జ‌చేయ‌డం మొద‌లెట్టారు. ఈ క్ర‌మంలో ఆయ‌న‌కు జ‌గ‌న్ రాజ్య‌స‌భ స‌భ్య‌త్వం ఇచ్చారు. తాను జ‌గ‌న్‌ను అంటిపెట్టుకుంటాన‌ని ఆయ‌న గ‌తంలోప్ర‌క‌ట‌న‌లు చేసేవారు. అయితే ఇప్పుడు అనూహ్యంగా వైకాపాకు రాజీనామా చేసి, ఆ పార్టీ అధ్య‌క్షుడు జ‌గ‌న్‌కు షాక్ ఇచ్చారు. వైకాపా తీవ్ర క‌ష్టాలు ఎదుర్కొంటున్న‌స‌మ‌యంలో ఆర్‌.కృష్ణ‌య్య ఇచ్చిన షాక్ ఆ పార్టీలో ప్ర‌కంప‌న‌లు సృష్టిస్తున్నాయి. కాగా  మ‌రికొంద‌రు వైకాపా రాజ్య‌స‌భ స‌భ్యులు కూడా రాజ్య‌స‌భ‌కు రాజీనామా చేస్తార‌ని, వారంతా టిడిపి లేక బిజెపిలో చేర‌తార‌ని ప్ర‌చారం సాగుతోంది.