తెలుగుదేశం పార్టీలో ఇప్పుడు తిరువూరు ఎమ్మెల్యే కొలిక‌పూడి శ్రీ‌నివాస‌రావు వ్య‌వ‌హారం తీవ్ర దుమారం రేగుతోంది. మూడు నెల‌ల కింద‌ట ఎమ్మెల్యేగా గెలిచిన కొలిక‌పూడి వ‌ల్ల తాము లైంగికంగా, మాన‌సికంగా వివ‌క్ష‌ను ఎదుర్కొంటున్నామ‌ని, త‌మ‌ను అవ‌మానిస్తున్నార‌ని  నియోజ‌క‌వ‌ర్గ నాయ‌కులు, కార్య‌క‌ర్త‌లు తీవ్ర నిర‌స‌న వ్య‌క్తం చేస్తూండ‌డం, ఓ స‌ర్పంచ్ భార్య ఆత్మ‌హ‌త్యాయ‌త్నానికి పాల్ప‌డ‌డం సంచ‌ల‌నం సృష్టిస్తోంది. కేవ‌లం పార్టీ వారే కాకుండా నియోజ‌క‌వ‌ర్గానికి చెందిన పాత్రికేయులు కూడా కొలిక‌పూడి వ్య‌వ‌హార‌శైలిపై తీవ్ర అసంతృప్తి వ్య‌క్తం చేస్తూ ఆయ‌న‌పై చ‌ర్య‌లు తీసుకోవాల‌ని డిమాండ్ చేస్తున్నారు. ఈ వ్య‌వ‌హారంలో టిడిపి అధిష్టానం ఇంకా ఏ నిర్ణ‌యం తీసుకోలేదు. ఈ లోపు ఆయ‌న‌ను పార్టీ నుంచి బ‌హిష్క‌రించాల‌ని పార్టీ నేత‌ల‌తో పాటు, ఇత‌ర వ‌ర్గాలు డిమాండ్ చేస్తున్నాయి. అయితే..కొలిక‌పూడి ఈ వ్య‌వ‌హారంపై ప‌రోక్షంగా స్పందిస్తూ..అగ్నిప‌ర్వ‌తం పేలేముందు భ‌యంక‌ర‌మైన నిశ‌బ్దాన్ని పాటిస్తుందంటూ..ప‌రోక్షంగా త‌న మౌనం అలాంటిదే అని చెప్పుకుంటున్నారు. ఒక‌వేళ టిడిపి అధిష్టానం ఆయ‌న‌ను పార్టీ నుంచి స‌స్పెండ్ చేస్తే..ఆయ‌న రాజీనామా అస్త్రాన్ని సంధించ‌వ‌చ్చు. ఎమ్మెల్యే ప‌ద‌వికి రాజీనామా చేస్తాన‌ని, ప‌ద‌వి త‌న‌కు లెక్క‌కాద‌ని ఎమ్మెల్యేగా ఎన్నికైన వారం రోజుల‌కే ఆయ‌న ప్ర‌క‌టించారు. ఆయ‌న వ్య‌వ‌హార‌శైలి చూస్తే..ఆయ‌న రాజీనామా చేసే అవ‌కాశాలు లేక‌పోలేదు. అయితే..ఇదంతా కేవ‌లం ఊహాగాన‌మే. నిజానికి కొలిక‌ల‌పూడి ఎమ్మెల్యే ప‌ద‌వికి రాజీనామా చేస్తే..తిరువూరుకు ఉప ఎన్నిక‌లు వ‌స్తాయి. అయితే..ఆయ‌న రాజీనామా ఇచ్చిన వెంట‌నే..అది ఆమోదానికి నోచుకోదు. రాజీనామాను స్పీక‌ర్ ఆమోదించి, ఖాళీ అయిన స్థానం గురించి కేంద్ర ఎన్నిక‌ల సంఘానికి తెల‌ప‌డం, వారు..దానికి ఉప ఎన్నిక ప్ర‌క‌టించ‌డం..ఇవ‌న్నీ జ‌రిగే స‌రికి దాదాపు ఏడాదిపైగానే ప‌డుతుంది. ముందు చెప్పిన‌ట్లు..ఇదంతా ఊహాగాన‌మే. టిడిపి, ఎమ్మెల్యే ప‌ద‌వికి కొలిక‌పూడి రాజీనామా చేస్తే..ఆయ‌న‌కు వైకాపానే దిక్కు. ఇక్క‌డ రాజీనామా చేసి వైకాపాలోకి వెళితే..మ‌ళ్లీ టిక్కెట్ ఇచ్చేది సందేహ‌మే. అయినా..చంద్ర‌బాబు మీద‌, టిడిపి మీద అక్క‌సుతో..అక్క‌డి ఆయ‌న వెళ్లి ఉప ఎన్నిక‌లు తెస్తే..రాష్ట్ర రాజ‌కీయం బ‌హురంజుగా ఉంటుంది. 

ఉప ఎన్నిక‌లు వ‌స్తే..రాజ‌కీయం..ర‌స‌కందాయ‌కం...!

కొలిక‌పూడి ఎమ్మెల్యే ప‌ద‌వికి రాజీనామా చేస్తే..ఉప ఎన్నిక‌లు త‌ప్ప‌వు. అవి ఎప్పుడు జ‌రిగినా..రాజ‌కీయం ర‌స‌వ‌త్త‌రంగా ఉంటుంది. ఇటీవ‌ల జ‌రిగిన ఎన్నిక‌ల్లో ఎన్‌డిఏ కూట‌మి ఘ‌న‌విజ‌యం సాధించింది. ఆ పార్టీ గెలుపు ఈవిఎంల్లేన‌ని వైకాపా ఆరోపిస్తోంది. అయితే..ఇప్పుడు ఉప ఎన్నిక జ‌రిగితే..టిడిపి గెలిస్తే..ఒకే..ఒక వేళ వైకాపా గెలిస్తే..వాళ్లు చేసిన ఆరోప‌ణ‌ల‌కు బ‌లం చేకూరుతుంది. వాస్త‌వానికి తిరువూరు నియోజ‌క‌వ‌ర్గం వైకాపాకు కంచుకోట‌. మొద‌టి నుంచి ఇక్క‌డ కాంగ్రెస్‌కే బ‌లం ఎక్కువ‌గా ఉంది. రాజ‌శేఖ‌ర్‌రెడ్డి మ‌ర‌ణం త‌రువాత జ‌రిగిన రెండు ఎన్నిక‌ల్లోనూ వైకాపా ఇక్క‌డ గెలిచింది. అంత‌కు ముందు 2004, 2009ల్లోనూ కాంగ్రెసే గెలిచింది. దాదాపు 20 ఏళ్ల త‌రువాత టిడిపి ఇక్క‌డ గెలుపొందింది. అయితే..టిడిపి కూడా ఇక్క‌డ మొన్న‌టితో క‌లిపి ఐదుసార్లు విజ‌యం సాధించింది. 1983, 1985, 1994,1999, 2024ల్లో టిడిపి గెలిచింది. అయితే..ఇప్పుడు ఉప ఎన్నిక‌లు వ‌స్తే..మొన్న‌టి విజ‌యాన్ని టిడిపి మ‌ళ్లీ సాధిస్తుందా..? అంటే చెప్ప‌లేమ‌నే ప‌రిస్థితి. టిడిపి కూట‌మి ఇచ్చిన హామీల‌ను అమ‌లు చేయ‌డం లేద‌ని, నీకు రూ.15వేలు..నీకు రూ.15వేలు అంటూ వైకాపా అధినేత చేస్తోన్న ప్ర‌చారం సామాన్య జ‌నాల్లోకి బాగానే వెళుతోంది. అయితే..అధికారంలో ఉన్న టిడిపిని ఎదుర్కోవ‌డం వైకాపాకు అంత సుల‌భం కాదు. అయితే..ఎస్సీ సామాజిక‌వ‌ర్గం అధికంగా ఉన్న ఈ నియోజ‌క‌వ‌ర్గంలో..ఉప ఎన్నిక వ‌స్తే...టిడిపి విజ‌యం సాధిస్తుంది కానీ..సులువుగా మాత్రం ఉండ‌దు. అయితే..ఇదంతా..కేవ‌లం ఊహాగాన‌మే...! కొలిక‌పూడి ఎమ్మెల్యే ప‌ద‌వికి రాజీనామా చేస్తేనే..! ఆయ‌న రాజీనామా చేస్తే..అదో సంచ‌ల‌న‌మే..! టిడిపి అధిష్టానం ఆయ‌న‌ను పిలిచి మాట్లాడే అవ‌కాశాలే ఎక్కువ‌. ఒక‌వేళ అప్ప‌టికీ ఆయ‌న తీరు మార్చుకోక‌పోతే..ఆయ‌న‌ను స‌స్పెండ్ చేస్తారు. స‌స్పెండ్ అయిన కొలిక‌పూడి టిడిపిని ఇబ్బంది పెట్టే చ‌ర్య‌లే తీసుకుంటారు..త‌ప్ప‌..ఎమ్మెల్యే ప‌ద‌వికి రాజీనామా చేయ‌రు. ఒక వేళ చేస్తే...మాత్రం సంచ‌ల‌న‌మే..!