లేటెస్ట్

‘చంద్రబాబు’పై ‘మమత’ అక్కసు కారణం ఇదే...!?

కొన్నాళ్ల క్రితం కేంద్రంలో అలజడి రేపిన ‘పెగాసస్‌’ వ్యవహారం ఇప్పుడు ఆంధ్రప్రదేశ్‌లోనూ రగడను సృష్టిస్తోంది. చంద్రబాబు అధికారంలో ఉన్నప్పుడు ఫోన్లు ట్యాప్‌ చేసేందుకు ఉపకరించే ‘పెగాసస్‌’ సాప్ట్‌వేర్‌ను అప్పటి ముఖ్యమంత్రి చంద్రబాబునాయుడు కొనుగోలు చేశారని పశ్చిమబెంగాల్‌ ముఖ్యమంత్రి మమతాబెనర్జీ ఆరోపించారు. ఆమె ఆరోపణలు సంచలనం సృష్టిస్తున్నాయి. ‘చంద్రబాబు’ ప్రభుత్వ వివాదాస్పదమైన ‘పెగాసస్‌’ కొనుగోలు చేసి ఉంటే, ఆ మధ్య కేంద్రంలో ఈ వ్యవహారంపై తీవ్ర దుమారం చెలరేగినప్పుడు ‘మమత’ ఎందుకు దీని గురించి ప్రస్తావించలేదు..? నాడు ఎందుకు ఆమె కళ్లు మూసుకున్నారు. ఇప్పుడు హఠాత్తుగా ఫోన్ల ట్యాపింగ్‌ వ్యవహారం తెరపైకి తీసుకురావడానికి కారణం ఏమిటనే దానిపై రాజకీయంగా చర్చ సాగుతోంది. నిన్న మొన్నటి దాకా ‘చంద్రబాబు’తో సన్నిహితంగా ఉన్న ‘మమత’ ఒక్కసారిగా ఆయనకు వ్యతిరేకంగా ఎందుకు ఆరోపణలు గుప్పించారనే దానిపై రకరకాలైన చర్చలు సాగుతున్నాయి. టిడిపి నాయకుల అభిప్రాయం ప్రకారం ఆమె తన రాజకీయసలహాదారుడు ‘ప్రశాంత్‌ కిశోర్‌’ కోసం ఈ ఆరోపణలు చేశారని చెబుతున్నారు. ‘ప్రశాంత్‌కిశోర్‌’ ‘మమత’కు, ‘జగన్‌’కు రాజకీయ సలహాదారుగా ఉన్నారు. ఇటీవల కాలంలో ‘ఆంధ్రప్రదేశ్‌’లో అధికార వైకాపాపై ప్రజల్లో అసంతృప్తి నెలకొంది. ఇప్పటికిప్పుడు ఎన్నికలు జరిగితే అధికార పార్టీ ఘోరంగా ఓడిపోతుందని సర్వేలు చెబుతున్నాయి. అదీగాక ప్రధాన ప్రతిపక్షమైన టిడిపికి, జనసేన మద్దతు ప్రకటించే అవకాశం ఉంది. ఈ రెండు పార్టీలు కలిస్తే వైకాపాకు పరాభవం తప్పదనే భావనతో ‘పికె’ ‘మమత’తో ఈ ఆరోపణలు చేయించారని వారు చెబుతున్నారు.


కాగా ‘చందబ్రాబు’పై ‘మమత’ అక్కసుకు మరో కారణం కూడా ఉందని రాజకీయవిశ్లేషకులు అంటున్నారు. అదేమిటంటే 2019 ఎన్నికలకు ముందు ‘మమత’తో కలిసి ‘చంద్రబాబు’ దేశవ్యాప్తంగా పర్యటించి ‘బిజెపి’ ఓడిరచాలని ప్రయత్నించారు. ‘బిజెపి’ని ఓడితే తాను ప్రధానిని అవుతానని ‘మమత’ భావించారు. అయితే ఆ ఎన్నికల్లో ‘బిజెపి’ ఘనవిజయం సాధించింది. ఆంధ్రప్రదేశ్‌లో ‘టిడిపి’ ఘోరంగా ఓడిపోయింది. తన పార్టీ ఓడిపోయిన తరువాత ‘చంద్రబాబు’ జాతీయరాజకీయాల్లో చురుగ్గా వ్యవహరించడం లేదు. పైగా ‘బిజెపి’పై ముందుజాగ్రత్తగా ఎటువంటి విమర్శలూ చేయడం లేదు. సార్వత్రిక ఎన్నికలకు ముందు అన్ని రాష్ట్రాలు తిరిగిన ‘చంద్రబాబు’ తమిళనాడు, పశ్చిమబెంగాల్‌, ఉత్తరప్రదేశ్‌ ఇంకా కీలకమైన రాష్ట్రాల్లో ఎన్నికలు జరుగుతున్నా బిజెపికి వ్యతిరేకంగా వ్యవహరించకుండా మౌనాన్ని ఆశ్రయించారు. ఎన్నికలకు ముందు బిజెపికి వ్యతిరేకంగా ఉన్న ఆయన తన రాష్ట్రంలో కీలకమైన ఎన్నికలు జరుగుతున్న తరుణంలోనూ నోరువిప్పలేదనే బాధ ‘మమత’లో ఉంది. అంతే కాదు  మొన్నటి దాకా ‘చంద్రబాబు’ ఎప్పుడైనా మూడో కూటమికి మద్దతు ఇస్తారని, మూడో కూటమి పురుడుపోసుకోవాలంటే ‘చంద్రబాబు’ ఉండే తప్ప అదిసాధ్యం కాదనే భావన ‘మమత’లో ఉండేది. ఆయన కనుక ముందుకు వచ్చి బిజెపికి వ్యతిరేకంగా ‘కాంగ్రెస్‌, ఇతర ప్రాంతీయపార్టీలను జత చేసి కేంద్రంలో మూడో కూటమిని అధికారానికి దగ్గర చేస్తారని, ఇదే సమయంలో తనను ప్రధానిని చేస్తారనే ఆలోచన ఆమెలో ఉండేది. అయితే ‘చంద్రబాబు’ మూడో కూటమి గురించి పట్టించుకోకుండా, బిజెపికి వ్యతిరేకంగా వెళ్లకుండా తన పని తాను చేసుకుంటుండడంతో ‘మమత’ ఆగ్రహంతో ఇప్పుడు లేని ‘పెగాసస్‌’ వ్యవహారాన్ని తెరపైకి తెచ్చారంటున్నారు. తనకు మేలు చేయని ‘చంద్రబాబు’తో తనకేమి పనేభావన, తన రాజకీయసలహాదారుడికి ఉపయోగం కలుగుతుందన్న బావనతో వారు ఇచ్చిన అసమగ్ర సమాచారంతో ‘మమత’ ‘చంద్రబాబు’పై ఆరోపణలు చేశారనే విశ్లేషణలు వెలువడుతున్నాయి. అయితే ఆమె చేసిన ఆరోపణలు ఆంధ్రప్రదేశ్‌ పోలీసులు గతంలోనే కొట్టేశారు. దీంతో ఆమె ఆరోపణలకు విలువలేకుండా పోయింది. మొత్తం మీద ఏదో విధంగా ‘చంద్రబాబు’ మీద అక్కసు తీర్చుకోవాలన్న ‘మమత’ కోరికనెరవేరలేదు. 

  • ( 0)
  • -
  • ( 0)

అభిప్రాయాలూ