లేటెస్ట్

దావోస్ ఖర్చు రూ.35 కోట్లా...?

ముఖ్యమంత్రి జగన్మోహన్ రెడ్డి దావోస్ పర్యటన కోసం 35 కోట్లు ఖర్చు చేసినట్లు వార్తలు వస్తున్నాయి. దావోస్ లో జరగనున్న పెట్టుబడుల సమావేశాలకు ముఖ్యమంత్రి తన సతీమణితో కలిసి ఈ రోజు వెళ్లారు. ఇందుకోసం ఆయన ప్రత్యేక విమానాన్ని అద్దెకు తీసుకున్నారు. మొత్తం పర్యటన పూర్తయ్యేవరకూ ఈ ప్రత్యేక వాహనానికి దాదాపుగా 35 కోట్ల రూపాయలను చెల్లించనున్నారు. ఒక పర్యటన కోసం ఇంత సొమ్మును ఖర్చు చేయటం పై ప్రతిపక్షాలు మండిపడుతున్నాయి. ముఖ్యమంత్రి వ్యక్తిగత పనుల కోసం వెళ్లారని, రాష్ట్రానికి పరిశ్రమలు తెచ్చేందుకు ఆయన వెళ్లలేదని, కేవలం సొంత పనులుకై ప్రజల సొమ్మును దుబారా చేస్తున్నారని వారు విమర్శిస్తున్నారు. గతంలో చంద్రబాబునాయుడు ముఖ్యమంత్రిగా ఉన్న సమయంలో ఆయన నిర్వహించిన దావోస్ పర్యటనపై అప్పట్లో ప్రతిపక్షంలో ఉన్న వైకాపా తీవ్రంగా విమర్శించింది. చంద్రబాబు మొహం చూసి ఎవరు పెట్టుబడి పెడతారు అని ఎద్దేవా చేసింది. అయితే అప్పట్లో చంద్రబాబు పర్యటన విజయవంతం అయింది. ఆయన పర్యటన తర్వాత రాష్ట్రానికి వేల కోట్ల రూపాయల పెట్టుబడులు వచ్చాయి. ప్రతిష్టాత్మకమైన ఎన్నో కంపెనీలు రాష్ట్రంలో కంపెనీల స్థాపించాయి.

నాడు బాబు   తెచ్చిన కంపెనీలను నిలబెట్టుకోవడంలో జగన్ ప్రభుత్వం విఫలమైంది. జగన్ ప్రభుత్వం అధికారంలోకి వచ్చిన తర్వాత కంపెనీలను రాష్ట్రం నుంచి వెళ్ల గొట్టారని విమర్శలు వచ్చాయి. నూతనంగా ఎటువంటి కంపెనీలు రాష్ట్రానికి వచ్చిన దాఖలాలు లేవు. మూడేళ్లలో జగన్ ప్రభుత్వం అభివృద్ధి చేయటంలో ఘోరంగా విఫలమైందని విమర్శలు ఉన్నాయి. సంక్షేమానికే జగన్ ప్రభుత్వం ఎక్కువ ప్రాధాన్యత ఇచ్చిందని, ఉద్యోగాలు కల్పించడంలో గాని, ఉపాధిని కల్పించడం లో గానీ జగన్ విఫలమయ్యారని మాట అన్ని వర్గాల నుంచి వస్తోంది. మూడేళ్ల తర్వాత ఇప్పుడు రాష్ట్రాన్ని అభివృద్ధి చేస్తానని, రాష్ట్రానికి పెట్టుబడులు తెస్తానని, చెబుతూ ఆయన నిర్వహిస్తున్న పర్యటనపై తీవ్రస్థాయిలో విమర్శలు వస్తున్నాయి. పెట్టుబడులు తేవటం ఏమోగానీ ప్రజల సొమ్మును ఇష్టారాజ్యంగా ఖర్చు చేస్తున్నారని, ఆయన పరిశ్రమలు తేవటం ఏమో కానీ, ప్రజల నెత్తిన పెను భారం మోపుతున్నారని అన్ని వర్గాలు అంటున్నాయి. గతంలో చంద్రబాబు పర్యటన చేసినప్పుడు విమర్శలు గుప్పించిన వైకాపా నేతలు, నేడు జగన్ చేస్తున్న పర్యటనపై ప్రశంసలు కురిపించడం, వారి నైజాన్ని తెలియజేస్తోందని ప్రతి పక్షాలు అంటున్నాయి. మొత్తం మీద జగన్ దావోస్ పర్యటన వివాదాస్పదం అవుతోంది.

  • ( 0)
  • -
  • ( 0)

అభిప్రాయాలూ