లేటెస్ట్

'చంద్రబాబు' బాటలో 'జగన్‌'...!

90శాతం సంతృప్తా...!?
నాడు ఇదే మాటలతో 'బాబు' బోల్తా...!
అధికారులను గుడ్డిగా నమ్మితే...బాబు గతే...!

ముఖ్యమంత్రి వై.ఎస్‌.జగన్మోహన్‌రెడ్డి మాజీ ముఖ్యమంత్రి చంద్రబాబునాయుడు బాటలోనే నడుస్తున్నారా..? మాజీ ముఖ్యమంత్రి 'చంద్రబాబునాయుడు' అధికారులకు ప్రాధాన్యత ఇచ్చినట్లే..'జగన్‌' ఇస్తున్నారా..? వారు చెప్పే కాకి లెక్కలే నిజమని భావిస్తున్నారా..? అంటే అవుననే సమాధానం వస్తోంది. గతంలో 'చంద్రబాబునాయుడు' ముఖ్యమంత్రిగా ఉన్నప్పుడు ఆర్టీజీఎస్‌ అని ఒక సంస్థను ఏర్పాటు చేసి...ప్రభుత్వ పథకాలపై ప్రజల్లో సంతృప్తి శాతం గురించి అడిగి తెలుసుకునే వారు..దీనిలో ప్రతి పథకంలో దాదాపు 90శాతంసంతృప్తిగా ఉన్నారని అధికారులు లెక్కల చిట్టా తెచ్చి...'చంద్రబాబు'కు చూపించేవారు. దీన్ని చూసి..'చంద్రబాబు' సంతృప్తి వ్యక్తం చేసేవారు..అంతే కాకుండా తనకు వందకు వందశాతం సంతృప్తి కావాలని..కలెక్టర్ల సమావేశాల్లో పదే పదే నొక్కి వక్కాణించేవారు. తాము చాలా కష్టపడుతున్నామని, అందుకే 90శాతంసంతృప్తి వచ్చిందని అధికారులు..ఆయన మాటలతో బోల్తా కొట్టించేవారు. వాస్తవానికి ఈ లెక్కలన్నీ అభూత కల్పనలే...? ప్రజల్లో ప్రతి పథకంపై 90శాతం సంతృప్తి రావడం అంటే మాటలు కాదు..? నాడు ఆర్టీజీఎస్‌ అనే వ్యవస్థ ఏర్పాటు చేసి 'చంద్రబాబు'కు అధికారులకు పిచ్చి లెక్కలు చెప్పేవారు. రాష్ట్ర ప్రజల్లో 90శాతం మంది సంతృప్తితో ఉంటే ఎన్నికల్లో 23 సీట్లు ఎలా వచ్చాయని అధికారులను ఒక్కసారి ప్రశ్నించండి..? ఇప్పుడు ఏమి సమాధానం చెబుతారో...? నాడు ప్రభుత్వం ప్రతిష్టాత్మకంగా భావించిన పథకాలు ప్రజలకు చేరితే...టిడిపికి ఇంత ఘోరపరాజయం ఎందుకు ఎదురవుతుంది..? అవి నాడు 'చంద్రబాబు'కు చెప్పిన అవాస్తవ లెక్కలు. అధికారులు..ఆయనను సంతృప్తి పరచడానికి...పదే పదే ఈ లెక్కలను చూపుతూ..అంతా బాగుందన్నట్లు చెప్పేవారు..ఆయన కూడా ఇదే నిజమని చివరకు ఎన్నికల్లో బోల్తా పడ్డారు. 

గతంలో 'చంద్రబాబు'కు చెప్పినట్లే..ఇప్పుడు 'జగన్మోహన్‌రెడ్డి'కి కూడా అధికారులు..ఇలాంటి పిచ్చిలెక్కలే చెబుతున్నారనే అభిప్రాయం వ్యక్తం అవుతోంది. నూతన ప్రభుత్వం నూతనంగా ప్రవేశపెట్టిన 'స్పందన' కార్యక్రమంపై 90శాతం మంది ప్రజలు సంతృప్తి వ్యక్తం చేస్తున్నారని అధికారులు ముఖ్యమంత్రికి చెబుతున్నారు. స్పందన కార్యక్రమానికి లక్షలాది మంది విజ్ఞప్తులు ఇస్తున్నారని, వాటిని పరిష్కరిస్తున్నామని, కేవలం 10శాతం మంది మాత్రమే అసంతృప్తి వ్యక్తం చేస్తున్నారని చెప్పడంపై పలువురు పెదవి విరుస్తున్నారు. గతంలో 'చంద్రబాబు' హయాంలో ఆర్టీజీఎస్‌ ద్వారా సంతృప్తి శాతాన్ని చెప్పేవారు. అప్పట్లో ఆర్టీజీఎస్‌ నుంచి వివిధ పథకాల లబ్దిదారులకు ఫోన్‌లు వెళ్లేవి. ఆ ఫోన్‌ ద్వారా లబ్దిదారులతో మాట్లాడి..సంతృప్తిశాతం ఇంత..? అని చెప్పేవారు. దీనిలో 90శాతం సంతృప్తి వచ్చిందని, కేవలం పదిశాతం మంది మాత్రమే అసంతృప్తితో ఉన్నారని చెప్పేవారు. అయితే ఆర్టీజీఎస్‌ ద్వారా ఎంత మందితో వారు ఫోన్‌లో మాట్లాడారు..? ఎంత మంది ఫోన్‌కు స్పందించారు..? ఎంత మంది సరైన రీతిలో సమాధానాలు చెప్పారు..అనేవి వివరంగా ఉండేవి కాదు. ఆర్టీజీఎస్‌ ఉద్యోగులు ఎంతశాతం చెబితే..అంతే...? ఇప్పుడు కూడా అదే రీతిలో అధికారులు వ్యవహరిస్తున్నారనే అభిప్రాయం వ్యక్తం అవుతోంది. 'స్పందన' కార్యక్రమంపై 90శాతం సంతృప్తి వ్యక్తం అవుతున్న పరిస్థితులు ప్రజల్లో లేవనే చెప్పాలి. నూతన ప్రభుత్వంపై భారీగా ఆశలు పెట్టుకున్న వారు..తమకు అది రాలేదని, ఇది రాలేదని తీవ్ర అసంతృప్తి వ్యక్తం చేస్తున్నారు. పనులు లేక కొందరు, ఉపాధి కోల్పోయిన వారు, ఉద్యోగాలు కోల్పోయిన వారు....ఇతరులు ప్రభుత్వంపై అసంతృప్తి వ్యక్తం చేస్తున్నారు. అధికారులు చెప్పిన పరిస్థితి రాష్ట్రంలో ఎక్కడా కనిపించడం లేదు. వారి మాటలే నిజమని నమ్మితే...గతంలో 'చంద్రబాబు' బోల్తా కొట్టినట్లు 'జగన్‌'కూడా బోల్తా కొడతారని వైకాపాకు చెందిన నాయకులే అంటున్నారు.

(381)
  • (0)
  • -
  • (0)

అభిప్రాయాలూ