లేటెస్ట్

‘కమ్మ’ కోటాలో మంత్రిపదవి దక్కేదెవరికో...?

రెండున్నరేళ్ల తరువాత తన మంత్రివర్గాన్ని విస్తరిస్తానని ముఖ్యమంత్రి వై.ఎస్‌.జగన్మోహన్‌ రెడ్డి గతంలోనే ప్రకటించారు. ఆయన చెప్పినట్లే రెండున్నర సంవత్సరాలు గడిచిపోవడంతో మంత్రి పదవులకోసం పలువురు ఎమ్మెల్యేలు, ఎమ్మెల్సీలు, అటు ఎమ్మెల్యే, ఇటు ఎమ్మెల్సీలు కాని వారు కూడా తమ ప్రయత్నాలను తాము చేసుకుంటున్నారు. ప్రస్తుత మంత్రివర్గంలో ఉన్న మంత్రులందరినీ తొలగిస్తారని వారి స్ధానంలో కొత్త వారికి అవకాశం కల్సిస్తారని జగన్‌ సన్నిహితులు ప్రచారం చేస్తున్నారు. దీన్ని బట్టి చాలా మంది మంత్రిపదవుల కోసం తీవ్రంగా యత్నిస్తున్నారు. ఆయా సామాజిక వర్గాలనుండి ఎవరికి వారు తమకు మంత్రిపదవులు వస్తాయనే అంచనాతో ఉన్నారు. అయితే అన్ని సామాజిక వర్గాల కన్నా ‘కమ్మ’ సామాజికవర్గం నుంచి ఎవరికి మంత్రి పదవి దక్కుతుందనే దానిపై రాజకీయ, సామాజిక విశ్లేషకులు ఆసక్తిని చూపిస్తున్నారు. ఇలా ఆసక్తి కారణం కూడా ముఖ్యమంత్రి జగన్మోహన్‌ రెడ్డే. ఎందుకంటే ఆయన అధికారంలోకి వచ్చిన దగ్గర నుండి ఆ సామాజికవర్గాన్ని అంటరాని వారిగా చూస్తూ వారిపై కక్ష సాధిస్తున్నారు. ‘కమ్మ’ సామాజికవర్గ వ్యాపారులపై, రాజకీయనాయకులపై, కాంట్రాక్టర్లపై, పత్రికా రంగానికి చెందిన జర్నలిస్టులపై ఆయన ప్రభుత్వం సాధింపు చర్యలకు దిగింది. గత సార్వత్రిక ఎన్నికల్లో ‘కమ్మ’ సామాజికవర్గం ‘జగన్‌’ను గట్టిగా సఫోర్ట్‌ చేసినా..భవిష్యత్‌లో వారి నుంచి ఇబ్బంది వస్తుందన్న కారణంతో ఆయన వారిపై అకారణ ద్వేషాన్ని చూపిస్తున్నారనే చర్చ సాగుతోంది. ఇది ఎలా ఉన్నా రాజకీయంగా ఆ వర్గాన్ని అణగదొక్కాలనే ధ్యేయంతో ఆయన పలు చర్యలకు పాల్పడుతున్నారు.  గత సార్వత్రిక ఎన్నికల్లో ఆయన గెలిచిన తరువాత ఏర్పాటు చేసిన మంత్రివర్గంలో ఆ వర్గానికి కేవలం ఒకే ఒక్క మంత్రి పదవి ఇవ్వడంతో ఆయన ప్రాధాన్యత ఎలా ఉందో అర్థం చేసుకోవచ్చు. ‘చంద్రబాబు’ను కలలో కూడా ద్వేషించే ‘కొడాలి నాని‘కి ఆ ఒక్క పదవిని కట్టబెట్టారు. మంత్రి పదవి పొందిన ‘కొడాలి’ ముఖ్యమంత్రి అంచనాలకు మించి ‘చంద్రబాబు’ను టిడిపిని, వారి సామాజికవర్గాన్ని విమర్శించి రాష్ట్ర వ్యాప్తంగా ప్రసిద్ధికెక్కారు. ఆయన అంత చేసినా..ఇప్పుడు ఆయనను కూడా మంత్రివర్గం నుంచి తప్పిస్తున్నారు. అయితే ఇప్పుడు ఆయన స్థానంలో ఎవరికి ‘జగన్‌’ మంత్రి పదవి ఇస్తారనే దానిపై ఆసక్తి కరమైన చర్చ సాగుతోంది. ‘కమ్మ’ సామాజికవర్గం నుంచి దాదాపు ఏడెనిమిది మంది మంత్రి పదవి కోసం ప్రయత్నాలు చేసుకుంటున్నారు. 


గత సార్వత్రిక ఎన్నికల్లో వైకాపా నుంచి ఆరుగురు ‘కమ్మ’ సామాజికవర్గానికి చెందిన వారు ఎమ్మెల్యేలుగా గెలుపొందారు. గుంటూరు జిల్లా  వినుకొండ నుంచి బొల్లా బ్రహ్మనాయుడు, తెనాలి నుంచి ‘అన్నాబత్తుని శ్రావణ్‌కుమార్‌, పెదకూరపాడు నుంచి ‘నంబూరి శంకరరావు, కృష్ణా జిల్లా ‘గుడివాడ’ నుంచి  ప్రస్తుత పౌరసరఫరాలశాఖ మంత్రి ‘కొడాలి వెంకటేశ్వరరావు’(నాని), మైలవరం నుంచి ‘వసంత కృష్ణప్రసాద్‌’, పశ్చిమగోదావరి జిల్లా ‘దెందులూరు’ నుంచి ‘అబ్బయ్య చౌదరి’లు గెలుపొందారు. ప్రస్తుతం ‘కొడాలి’ని తీసివేస్తే మిగతా ఐదుగురు ‘కమ్మ’కోటాలో తమకు మంత్రి పదవి వస్తుందనే ఆశాభావంతో ఉన్నారు. వీరిలో మైలవరం శాసనసభ్యుడు ‘వసంత కృష్ణప్రసాద్‌’ తనకు ఖచ్చితంగా మంత్రి పదవి వస్తుందనే నమ్మకంతో ఉన్నారు. మాజీ మంత్రి వసంత నాగేశ్వరరావు తనయుడు అయిన ‘కృష్ణ ప్రసాద్‌’ రాజకీయాల్లో దూకుడుగా ఉండడం, మాజీ మంత్రి ‘దేవినేని ఉమామహేశ్వరరావు’ను ఓడిరచడం, ఆయనతో ఢీ అంటే ఢీ అనడం వంటి కారణాలతో ఆయనకు మంత్రి పదవి ఖచ్చితంగా వస్తుందనే భావన ఆయన అనుచరుల్లో ఉంది. అదీకాక సిఎం జగన్‌తో వ్యాపార లావాదేలు ఉండడం ఆయన మరో ప్లస్‌పాయింట్‌. ‘కొడాలి’ కూడా ఆయనకే మద్దతు ఇస్తున్నారనే ప్రచారం ఉంది. దానా దీనా తనకు ఖచ్చితంగా మంత్రిపదవి లభిస్తుందనే భావనతో ఆయన ఉన్నారు. మరో వైపు ‘వినుకొండ’ ఎమ్మెల్యే ‘బొల్లా బ్రహ్మనాయుడు’ కూడా మంత్రి పదవిని ఆశిస్తున్నారు. ఇక ‘అబ్బయ్యచౌదరి’, ‘అన్నాబత్తుని‘, నంబూరి శంకరరావు’లు తమవంతు ప్రయత్నాలు చేసుకుంటున్నారు. 


ఇది ఇలా ఉంటే వీరు కాకుండా మరో ఇద్దరు ప్రముఖ ‘కమ్మ’ వర్గ నాయకులు కూడా మంత్రిపదవి కోసం ప్రయత్నాలు చేస్తున్నారు. చిలకలూరిపేట మాజీ ఎమ్మెల్యే ‘మర్రి రాజశేఖర్‌‘, సిఎం జగన్‌ సలహాదారు ‘తలశిల రఘురాం’లు మంత్రి పదవిని ఆశిస్తున్నారు. గత ఎన్నికల సమయంలో ‘మర్రి’కి ఇప్పుడు సీటు ఇవ్వలేకపోతున్నానని, పార్టీ అధికారంలోకి వచ్చిన తరువాత ఆయనకు ఎమ్మెల్సీ ఇచ్చి మంత్రిని చేస్తానని ‘జగన్‌’ హామీ ఇచ్చారు. ఆయన ఇచ్చిన హామీకి లోబడి ‘మర్రి’ చిలకటూరిపేటలో పార్టీ అభ్యర్థి ‘విడుదల రజనీ’ గెలుపుకు కృషిచేశారు. ఆయన వల్లే ‘రజనీ’ గెలిచిందనే అభిప్రాయం అన్ని వర్గాల్లో ఉంది. అయితే ఆ తరువాత ‘జగన్‌‘ తాను ఇచ్చిన హామీని మరిచిపోయారు. రెండున్నర సంవత్సరాలు గడిచినా ‘మర్రి’కి ఇచ్చిన హామీ నెరవేరలేదు. ఇప్పుడు మంత్రివర్గ విస్తరణలోనైనా ఆయనకు ఇచ్చిన హామీనీ నెరవేర్చాలనే అభిప్రాయం అన్నివర్గాల్లో వ్యక్తం అవుతోంది. మరి ‘మర్రి‘కి ఇచ్చిన హామీని ‘జగన్‌’ నెరవేరుస్తాడో లేదో చూడాలి. కాగా..సిఎం సలహాదారుగా ఉన్న ‘తలశిల రఘురాం’ ‘కమ్మ’ కోటాలో తాను మంత్రిని అవుతానని ప్రచారం చేసుకుంటున్నారుజ ‘జగన్‌’కు ఎంతో ఆప్తుడైన ‘రఘురాం’ ఆశ ఎంతవరకు నెరవేరుతుందో చూడాలి. వీరు కాకుండా టిడిపి నుంచి వైకాపాలో చేరిన సీనియర్‌ నాయకుడు, చీరాల ఎమ్మెల్యే ‘కరణం బలరాం’ తనకు మంత్రిపదవి దక్కుతుందని ప్రచారం చేసుకుంటున్నారు. తనకు ‘జగన్‌’ హామీ ఇచ్చారని ఆయన చెబుతున్నా..అది జరగేపని కాదని తెలుస్తోంది. పార్టీలో ఉన్నవారికే అవకాశం అంతంత మాత్రమైతే..టిడిపి నుంచి వైకాపాలోకి వచ్చిన ‘కరణం’లు అసలు అవకాశమేలేదని ఆయన వ్యతిరేకులు చెబుతున్నారు. మొత్తం మీద గత రెండున్నరేళ్లుగా తమ వర్గాన్ని ‘జగన్‌’ టార్గెట్‌ చేస్తున్నా ఆ వర్గానికి చెందిన ఎమ్మెల్యేలు మాత్రం మంత్రిపదవి కోసం వెంపర్లాడుతున్నారు. దక్కేది ఒక్కటే మంత్రి పదవి...దాని కోసం పోటీ మాత్రం తీవ్రంగా ఉంది. చూద్దాం ‘జగన్‌’ ఎవరిని కరుణిస్తారో...!?

  • ( 0)
  • -
  • ( 0)

అభిప్రాయాలూ