వ‌న్డేల‌కూ కోహ్లీ గుడ్‌బై..!? రిటైర్మెంట్ సంకేతాలిస్తున్న విరాట్.. ప్రపంచకప్ వరకేనా ప్రయాణం..?
భారత క్రికెట్‌లో మరోసారి విరాట్ కోహ్లీ భవిష్యత్తుపై పెద్ద చర్చ మొదలైంది. టెస్టు క్రికెట్‌కు గుడ్‌బై చెప్పిన తర్వాత ఇప్పుడు వన్డే ఫార్మాట్‌పైనా కోహ్లీ నిర్ణయం తీసుకోబోతున్నారన్న ఊహాగానాలు జోరందుకున్నాయి. ఇటీవల ఆయన మాట్లాడుతున్న తీరు, బహిరంగంగా భావోద్వేగాలను వ్యక్తపరుస్తున్న విధానం, తన కెరీర్‌పై ఆలోచనాత్మక వ్యాఖ్యలు చేయడం చూస్తుంటే.. కోహ్లీ మానసికంగా మరో పెద్ద నిర్ణయానికి సిద్ధమవుతున్నారనే అభిప్రాయం క్రికెట్ వర్గాల్లో వినిపిస్తోంది.
మారిపోయిన కోహ్లీ..!
గతంలో తన వ్యక్తిగత విషయాలను బయటపెట్టని కోహ్లీ ఇప్పుడు పూర్తిగా భిన్నంగా కనిపిస్తున్నారు. పాడ్‌కాస్ట్‌లలో టీమ్ మేనేజ్‌మెంట్‌పై మాట్లాడటం, భారత టెస్టు కెప్టెన్సీ నుంచి తప్పుకున్న కారణాలను వెల్లడించడం, చిన్ననాటి కోచ్‌ను కలిసిన వీడియోను సోషల్ మీడియాలో పంచుకోవడం, ఒక స్కూల్ కార్యక్రమంలో తన బలహీన క్షణాల గురించి మాట్లాడటం వంటి పరిణామాలు అభిమానులను ఆశ్చర్యానికి గురిచేశాయి. మైదానం బయట కనిపిస్తున్న ఈ మార్పే ఇప్పుడు రిటైర్మెంట్ చర్చలకు కారణమవుతోంది.
మైదానంలో మాత్రం ఇంకా అదే దూకుడు
అయితే ఆట పరంగా చూస్తే కోహ్లీ ఇప్పటికీ భారత జట్టుకు అత్యంత కీలక ఆటగాడే. ఐపీఎల్‌లో రాయల్ ఛాలెంజర్స్ బెంగళూరు తరఫున పరుగుల వరద పారిస్తున్న ఆయన.. వన్డేల్లో కూడా అద్భుతమైన ఫామ్‌లో కొనసాగుతున్నారు. గత తొమ్మిది వన్డేల్లో మూడు సెంచరీలు, మూడు అర్ధసెంచరీలు నమోదు చేయడం ఆయన నిలకడకు నిదర్శనం. భారీ లక్ష్యాల ఛేదనలో ఇప్పటికీ కోహ్లీనే భారత జట్టుకు ప్రధాన బలం అన్న అభిప్రాయం ఉంది.
సచిన్ టెండూల్కర్ 100 అంతర్జాతీయ సెంచరీల రికార్డుకు కూడా ఆయన చేరువవుతుండటం అభిమానుల్లో మరో ఆశను పెంచుతోంది.
ప్రపంచకప్ వరకే కొనసాగుతారా..?
ఇప్పటివరకు అందరూ భావించినట్టే.. వచ్చే వన్డే ప్రపంచకప్ కోహ్లీ ప్రధాన లక్ష్యంగా కనిపిస్తోంది. ప్రపంచకప్ వరకు భారత్ దాదాపు 15కి పైగా వన్డేలు ఆడే అవకాశం ఉండటంతో కోహ్లీకి తన స్థానాన్ని మరింత బలపర్చుకునే అవకాశం ఉంది. అందుకే కనీసం ప్రపంచకప్ వరకైనా ఆయన కొనసాగుతారనే అభిప్రాయం బలంగా వినిపిస్తోంది. కానీ ప్రపంచకప్ తర్వాత ఏమవుతుందన్న ప్రశ్నకు మాత్రం ఇప్పటికీ స్పష్టత లేదు.
టెస్టు క్రికెట్ అధ్యాయం పూర్తిగా ముగిసిందా..?
ఇక టెస్టు క్రికెట్ విషయానికి వస్తే.. కోహ్లీ తిరిగి రావాలన్న అవకాశాలు దాదాపు లేవనే సంకేతాలు కనిపిస్తున్నాయి. ఇటీవల కోచ్ రాజ్‌కుమార్ శర్మ చేసిన వ్యాఖ్యలతో అభిమానుల్లో ఆశలు చిగురించినా.. వాస్తవానికి కోహ్లీ తన టెస్టు అధ్యాయాన్ని పూర్తిగా ముగించేశారని క్రికెట్ విశ్లేషకులు భావిస్తున్నారు.
గత ఐదేళ్లలో టెస్టుల్లో ఫామ్ పడిపోవడం, మానసిక అలసట, కుటుంబానికి సమయం కేటాయించాలన్న ఆలోచన ఆయన నిర్ణయానికి ప్రధాన కారణాలుగా చెబుతున్నారు. ముఖ్యంగా మళ్లీ తనను నిరూపించుకోవాల్సిన పరిస్థితిని అంగీకరించడం కోహ్లీ వ్యక్తిత్వానికి విరుద్ధమని అంటున్నారు.
గంభీర్-అగార్కర్ మౌనం వెనుక..?
ప్రస్తుతం హెడ్ కోచ్ గౌతమ్ గంభీర్, చీఫ్ సెలెక్టర్ అజిత్ అగార్కర్ వైపు కూడా అందరి దృష్టి మళ్లింది. కోహ్లీ భవిష్యత్తుపై ఇప్పటివరకు వీరిద్దరూ స్పష్టత ఇవ్వకపోవడం కొత్త చర్చకు దారితీసింది.
“ప్రపంచకప్ వరకూ కోహ్లీ ఖాయం” అని ఎవరూ చెప్పకపోవడంతో.. జట్టులో మార్పులపై ఇప్పటికే చర్చలు జరుగుతున్నాయా అన్న సందేహాలు వ్యక్తమవుతున్నాయి. ప్రస్తుతం ఫామ్ బాగుండటంతో ఆయన స్థానం సురక్షితంగానే కనిపిస్తున్నా.. ఒక్కసారి పరుగులు తగ్గితే పరిస్థితులు వేగంగా మారే అవకాశం ఉందని భావిస్తున్నారు.
అవమానాన్ని మాత్రం భరించరు..!
కోహ్లీ వ్యక్తిత్వాన్ని దగ్గరగా చూసినవారు మాత్రం ఒక విషయం స్పష్టంగా చెబుతున్నారు. ఆయన ఓటమిని భరించగలరు.. విమర్శలను తట్టుకోగలరు.. కానీ అవమానాన్ని మాత్రం అస్సలు అంగీకరించరు. టెస్టు క్రికెట్ నుంచి తప్పుకోవడంలో కూడా అదే భావన కనిపించిందని విశ్లేషకులు చెబుతున్నారు.
జట్టులో తన పాత్ర తగ్గుతోందని భావించిన క్షణంలోనే.. ఎలాంటి సందేహం లేకుండా మరోసారి ఆకస్మిక నిర్ణయం తీసుకునే అవకాశం ఉందని అంటున్నారు. ఇటీవల ఆయన బహిరంగంగా మాట్లాడుతున్న తీరు కూడా అదే సంకేతాలను ఇస్తోందన్న అభిప్రాయం వినిపిస్తోంది.
కోహ్లీ తదుపరి నిర్ణయం ఏంటి..?
గతంలో బీసీసీఐలో కోహ్లీ ప్రభావం చాలా బలంగా ఉండేది. రవిశాస్త్రి మద్దతుతో భారత క్రికెట్‌ను కొత్త ఎత్తులకు తీసుకెళ్లిన ఆయన.. అదే సమయంలో కొన్ని వివాదాలను కూడా ఎదుర్కొన్నారు. అనిల్ కుంబ్లే కోచ్ పదవి కోల్పోవడం నుంచి వన్డే కెప్టెన్సీ తొలగింపు వరకు ఎన్నో పరిణామాలు చోటుచేసుకున్నాయి. అయినప్పటికీ కోహ్లీ తన ఆత్మవిశ్వాసాన్ని, తిరుగుబాటు ధోరణిని ఎప్పుడూ మార్చుకోలేదు. ఇప్పుడు కూడా అదే తీరు కొనసాగుతోంది.
ఇప్పుడు భారత క్రికెట్‌లో వినిపిస్తున్న ఒక్క ప్రశ్న మాత్రం ఇదే..
“ప్రపంచకప్ తర్వాత కాదు.. అంతకుముందే విరాట్ కోహ్లీ వన్డే క్రికెట్‌కు గుడ్‌బై చెప్పబోతున్నారా..?”
