లేటెస్ట్

తెలంగాణ‌లో ప్ర‌వీణ్ కుమార్ ఆధ్వ‌ర్యంలో రాజ‌కీయ పార్టీ

తెలంగాణ గురుకులాల కార్య‌ద‌ర్శి ఆర్.ఎస్.ప్ర‌వీణ్ కుమార్ ఆధ్వ‌ర్యంలో నూత‌న రాజ‌కీయ‌పార్టీ ఏర్పాటు చేయ‌బోతున్నారు. ఆయ‌న ఈ రోజు స్వ‌చ్ఛంధ ప‌ద‌వీ విర‌మ‌ణ చేశారు. తెలంగాణ గురుకులాల కార్య‌ద‌ర్శిగా ఉన్న ఆయ‌న బ‌డుగు,బ‌ల‌హీన‌వ‌ర్గాల విద్యార్ధుల అభివృద్ధి కోసం విశేష కృషి చేశారు. పేద‌పిల్లల‌కు నాణ్య‌మైన చ‌దువు అందాల‌ని, వారు స‌మాజంలో ఉన్న‌తంగా బ‌త‌కాల‌ని ఆశించి సాంఘిక సంక్షేమ శాఖ బాధ్య‌త‌ల‌ను చేప‌ట్టారు. ఆయ‌న‌కు తెలంగాణ ప్ర‌భుత్వం బాగానే స‌హ‌క‌రించింది. దాదాపు 9ఏళ్ల‌పాటు ఆయ‌న గురుకులాల కార్య‌ద‌ర్శిగా ప‌నిచేశారు. సిఎం కెసిఆర్ ఆయ‌న‌ను ఎంతో ప్రోత్స‌హించారు. అయితే ఇటీవ‌ల కాలంలో ఆయ‌న విద్యార్థుల చేత భీమ్ ప్ర‌తిజ్ఞ చేయించారు. ఒక ప్ర‌భుత్వ ఉద్యోగిగా ఉంటూ మ‌తాల‌ను ప్రోత్స‌హించ‌డ‌మేమిట‌ని కొన్ని సంఘాలు ఆయ‌న‌పై విమ‌ర్శ‌లు చేశాయి. ఆయ‌న‌పై ప్ర‌భుత్వం చ‌ర్య‌లు తీసుకోవాల‌ని వారు కోరినా ప్ర‌భుత్వం ప‌ట్టించుకోలేదు. కాగా..మ‌రోసారి ఆయ‌న‌ను గురుకుల కార్య‌ద‌ర్శిగా ప‌ద‌వీకాలం పొడిగించ‌క‌పోవ‌డంతో ఆయ‌న‌కు పోలీసు శాఖ‌లో ప‌నిచేసే ఉద్దేశ్యం లేక స్వ‌చ్ఛంధ ప‌ద‌వీ విర‌మ‌ణ చేశార‌ని తెలుస్తోంది. ఆయ‌న‌కు మ‌రో 6 సంవ‌త్స‌రాల స‌ర్వీసు ఉండ‌గానే ప‌ద‌వి నుంచి వైదొల‌గుతున్నారు.


కాగా ఆయ‌న స్వ‌చ్ఛంధ ప‌ద‌వీ విర‌మ‌ణ వెనుక రాజ‌కీయ కార‌ణాలు ఉన్నాయ‌నే మాట‌లు వినిపిస్తున్నాయి. ఆయ‌న త్వ‌ర‌లో ఓ రాజ‌కీయ పార్టీని పెట్ట‌బోతున్నార‌ని స‌మాచారం. ద‌ళితులు, బ‌ల‌హీన‌వ‌ర్గాల అభ్యున్న‌తే ధ్యేయంగా ఆయ‌న పార్టీ ఉండ‌బోతుందంటున్నారు. జ్యోతిరావుపూలే, అంబేద్క‌ర్, కాన్షీరాంల స్ఫూర్తితో ఆయ‌న పార్టీ ప్రారంభిస్తున్నారంటున్నారు. అయితే ఆయ‌న పార్టీ వెనుక వేరే ల‌క్ష్యాలు ఉన్నాయ‌నే మాట‌లు వినిపిస్తున్నాయి. తెలంగాణ ముఖ్య‌మంత్రి కె.చంద్ర‌శేఖ‌ర్ రావే ఆయ‌న‌తో పార్టీ పెట్టించ‌బోతున్నార‌ట‌. రాబోయే అసెంబ్లీ ఎన్నిక‌ల్లో ద‌ళితులు, బీసీలు, మైనార్టీ వ‌ర్గాల‌న్నీ కాంగ్రెస్ కు ఏక‌ప‌క్షంగా ఓట్లు వేస్తార‌ని, వారి ఓట్ల‌లో చీలిక తేవ‌డ‌మే ల‌క్ష్యంగా ప్ర‌వీణ్ చేత కెసిఆర్ పార్టీ పెట్టిస్తున్నారంటున్నారు. ద‌ళిత‌, బ‌ల‌హీన‌వ‌ర్గాల్లో మంచిపేరు తెచ్చుకున్న ప్ర‌వీణ్ ద్వారా వారి ఓట్ల‌ను చీల్చ‌డం సాధ్యమ‌నే భావ‌న‌లో కెసిఆర్ ఉన్నార‌ట‌. మొత్తం మీద స్వ‌చ్చంధ ప‌ద‌వీ విర‌మ‌ణ చేసిన ప్ర‌వీణ్ రాజ‌కీయ నాయ‌కుని అవ‌తారం ఎత్తే అవ‌కాశం తొంద‌ర‌లోనే ఉంటుందంటున్నారు. చూద్దాం ఏమి జ‌రుగుతుందో..?

  • ( 0)
  • -
  • ( 0)

అభిప్రాయాలూ