లేటెస్ట్

‘రోజా’పై వ్య‌తిరేక‌త‌ను ‘ముద్దు’ త‌న‌యుడు క్యాష్ చేసుకుంటారా...?

చిత్తూరు జిల్లా రాజ‌కీయాల్లో స్వ‌ర్గీయ‌ ‘గాలి ముద్దుకృష్ణంనాయుడు’ త‌న‌దైన ముద్ర‌ను వేసుకున్నారు. ఉపాధ్యాయుడిగా ఉన్న ఆయ‌న అన్న ఎన్టీఆర్ పిలుపుతో రాజ‌కీయాల్లోకి వ‌చ్చారు. వ‌చ్చీ రావ‌డంతోనే ఆయ‌న పుత్తూరు నియోజ‌క‌వ‌ర్గం నుంచి ఎమ్మెల్యేగా గెలుపొందారు. ఎన్టీఆర్ మంత్రివ‌ర్గంలో విద్యాశాఖ మంత్రిగా ప‌నిచేశారు. పుత్తూరు నియోజ‌క‌వ‌ర్గం నుండి వ‌రుస‌గా నాలుగుసార్లు గెలిచి చ‌రిత్ర సృష్టించారు. చంద్ర‌బాబు, ల‌క్ష్మీపార్వ‌తి గ్రూపు త‌గాదాల్లో ఆయ‌న ల‌క్ష్మీపార్వ‌తివైపున నిలిచి చంద్ర‌బాబుపై తీవ్ర ఆరోప‌ణ‌లు చేశారు. ఎన్టీఆర్ మ‌ర‌ణం త‌రువాత కాంగ్రెస్ లో ముద్దు చేరి పుత్తూరు నుంచి పోటీ చేసి ఓడిపోయారు. అయితే ఆయ‌న 2004లో మ‌ళ్లీ అదే నియోజ‌క‌వ‌ర్గం నుంచి పోటీ చేసి గెలుపొందారు. త‌రువాత టిడిపిలో చేరారు. అయితే 2009 నియోజ‌క‌వ‌ర్గ పున‌ర్విభ‌జ‌న జ‌ర‌గడంతో పుత్తూరు న‌గ‌రిలో క‌ల‌సిపోయింది. దీంతో ఆయ‌న  న‌గ‌రి నుంచి  పోటీ చేసి ఆరవ‌సారి ఎమ్మెల్యేగా గెలుపొందారు. అయితే 2009లో టిడిపి ఓడిపోవ‌డంతో ఆయ‌న ప్ర‌తిప‌క్షానికే ప‌రిమితం కావాల్సి వ‌చ్చింది.

2014 ఎన్నిక‌ల్లో ఆయ‌న మ‌ళ్లీ న‌గ‌రి నుంచి పోటీ చేసినా వైకాపా అభ్య‌ర్థి రోజాపై స్వ‌ల్ప తేడాతో ఓడిపోయారు.  ఆయ‌న ధీమానే ఆయ‌న కొంప ముంచింద‌ని, అలా కాకుండా కొంచెం తెలివితో వ్య‌వ‌హ‌రిస్తే గెలిచేవార‌ని, త‌ద్వారా మ‌రోసారి ఆయ‌న మంత్రి అయ్యేవార‌ని ఓడిన త‌రువాత ఆయ‌న స‌న్నిహితులు వాపోతుంటారు. గాలి కూడా అప్ప‌ట్లో త‌న‌ను క‌లిసిన విలేక‌రుల‌తో పిచ్చాపాటిగా మాట్లాడుతూ ‘అదేంద‌బ్బా..గెల‌వాల్చినోడిని...వోడా..? ఏం చేస్తాం’..అంటుండేవాడు..  ఓడిన ఆయ‌న‌కు  చంద్ర‌బాబు ఎమ్మెల్సీ ప‌ద‌విని ఇచ్చి గౌర‌వించారు. ప‌ద‌విలో ఉండ‌గానే ఆయ‌న డెంగ్యూతో చ‌నిపోయారు. 2019 ఎన్నిక‌ల్లో ఆయ‌న కుమారుడు ‘గాలి భానుప్ర‌కాష్’ న‌గ‌రి నుంచి ‘రోజా’పై పోటీ చేసి స్వ‌ల్ప తేడాతో ఓడిపోయారు. తండ్రీ కొడుకుల‌ను ఓడించి ‘రోజా’ చ‌రిత్ర సృష్టించింది. 


ప్ర‌స్తుతం రెండోసారి ఎమ్మెల్యేగా ఉన్న ‘రోజా’కు నియోజ‌క‌వ‌ర్గంలో తీవ్ర‌స్థాయిలో వ్య‌తిరేక‌త వ్య‌క్తం అవుతోంది. ఆమెను స్వంత పార్టీకి చెందిన నాయ‌కులే వ్య‌తిరేకిస్తున్నారు. ‘రోజా’కు చెక్ పెట్ట‌డానికి జిల్లాకు చెందిన ఇద్ద‌రు మంత్రులు త‌మ‌వంతు పాత్ర పోషిస్తున్నారు. వైకాపాలో త‌లెత్తిన వ‌ర్గ‌పోరును టిడిపి క్యాష్ చేసుకుంటుందా...? అంటే లేద‌నే స‌మాధానం వ‌స్తోంది. ‘ముద్దు’ రాజ‌కీయ వార‌సుడిగా రంగంలో ఉన్న ‘భానుప్ర‌కాష్’ తండ్రి వ‌లే దూసుకుపోవడం లేదంటున్నారు. ‘ముద్దు’ బ‌తికిఉన్న‌ప్పుడు నియోజ‌క‌వ‌ర్గంలోని ప్ర‌తి గ్రామాన్ని సంద‌ర్శించేవారు. ప్ర‌జ‌ల‌తో మ‌మేక‌మ‌య్యేవారు. వారి ఇళ్ల‌లో శుభ‌కార్యాల‌కు, అశుభ‌కార్యాల‌కు వెళ్లి నిత్యం వారితో ట‌చ్ లో ఉండేవారు. కానీ ఆయ‌న వార‌సుడు ఆ రీతిలో వ్య‌వ‌హ‌రించ‌డం లేద‌నే మాట వినిపిస్తోంది.

వైకాపా ప్ర‌భుత్వం ప్ర‌జావ్య‌తిరేక విధానాల‌ను అవ‌లంభిస్తున్నా వాటిని ప్ర‌జ‌ల్లోకి తీసుకెళ్ల‌డం లేద‌ని, ఎటువంటి కార్య‌క్ర‌మాల‌ను నిర్వ‌హించ‌కుండా స్త‌బ్ధుగా ‘భానుప్ర‌కాష్’ వ్య‌వ‌హ‌రిస్తున్నారంటున్నారు. ‘ముద్దు’ రాజ‌కీయ వార‌స‌త్వం కోసం అన్నాత‌మ్ముళ్లు పోటీప‌డ‌డం, ఇద్ద‌రు క‌లిసిలేక‌పోవ‌డంతో ఇక్క‌డ ‘ముద్దు’ కుటుంబం రాజ‌కీయంగా చుల‌క‌నైంది అనే అభిప్రాయం ఉంది. త‌మిళ‌నాడు స‌రిహ‌ద్దుల్లో ఉన్న ఈ నియోజ‌క‌వ‌ర్గంలో ప‌లు కులాలు, సామాజికవ‌ర్గాలు ఉన్నాయి. ఆంధ్రా, త‌మిళ సంస్కృతికి నెల‌వైన ‘న‌గ‌రి’లో ముద్దు వార‌సుడు రాబోయే ఎన్నిక‌ల్లో విజ‌యం సాధించాలంటే మెరుగైన ప‌నితీరును క‌న‌బ‌ర్చాల్సి ఉంది. ప్రస్తుత ఎమ్మెల్యే ప్ర‌జావ్య‌తిరేక‌త‌ను ఎదుర్కొంటున్న త‌రుణంలో ‘భానుప్ర‌కాష్’ చురుగ్గా వ్య‌వ‌హ‌రించాల‌ని, గ‌త ఎన్నిక‌ల్లో స్వ‌ల్ప‌తేడాతో ప‌రాజ‌యం పాల‌యిన ఆయ‌న ఈసారి ఎట్టి ప‌రిస్థితుల్లోనైనా విజ‌యం సాధించాలంటే మ‌రింత క్రియాశీల‌కంగా ప‌నిచేయాల‌ని నియోజ‌క‌వ‌ర్గ టిడిపి శ్రేణులు, అభిమానులు కోరుకుంటున్నారు. 

  • ( 0)
  • -
  • ( 0)

అభిప్రాయాలూ