ఉర్దూ సాహిత్య దిగ్గజం బషీర్ బద్ర్ మరణం.. అభిమానుల్లో విషాదం

ఉర్దూ శాయరీ ప్రపంచానికి చెందిన ప్రముఖ కవి, శాయర్ డాక్టర్ బషీర్ బద్ర్ ఇకలేరు. 91 ఏళ్ల వయసులో గురువారం మధ్యప్రదేశ్ రాజధాని భోపాల్‌లోని తన నివాసంలో ఆయన తుదిశ్వాస విడిచారు. గత కొంతకాలంగా అనారోగ్యంతో బాధపడుతున్న ఆయన మరణ వార్తతో దేశవ్యాప్తంగా సాహితీ ప్రపంచం విషాదంలో మునిగిపోయింది.

బషీర్ బద్ర్ కేవలం ఉర్దూ కవి మాత్రమే కాదు.. కోట్లాది మంది మనసులను తన పదాలతో కట్టిపడేసిన భావకవి. ప్రేమ, విరహం, జీవిత తాత్వికత, మానవ సంబంధాలపై ఆయన రాసిన గజల్స్ ఇప్పటికీ సాహిత్యాభిమానుల హృదయాల్లో ప్రత్యేక స్థానం సంపాదించుకున్నాయి. సరళమైన పదాల్లో లోతైన భావాలను వ్యక్తం చేయడం ఆయన ప్రత్యేకతగా చెప్పుకుంటారు.

కుటుంబ సభ్యుల సమాచారం ప్రకారం, గత కొన్నేళ్లుగా బషీర్ బద్ర్ జ్ఞాపకశక్తిని కోల్పోయారు. వయోభారంతో పాటు ఆరోగ్య సమస్యలు కూడా ఆయనను తీవ్రంగా ఇబ్బంది పెట్టాయి. అయితే ఆశ్చర్యకరమైన విషయం ఏమిటంటే.. ముషాయిరాల గురించి ఎవరైనా ప్రస్తావిస్తే లేదా పాత కవితల జ్ఞాపకాలు వస్తే వెంటనే “ఇర్షాద్.. ఇర్షాద్” అంటూ స్పందించేవారని సన్నిహితులు భావోద్వేగంతో గుర్తుచేసుకున్నారు. కవిత్వం ఆయన జీవితంలో ఎంతగా మమేకమైందో ఈ సంఘటన తెలియజేస్తోంది.

1935లో జన్మించిన బషీర్ బద్ర్ అసలు పేరు సయ్యద్ మహ్మద్ బషీర్. చిన్ననాటి నుంచే సాహిత్యంపై ఆసక్తి పెంచుకున్న ఆయన తర్వాత ఉర్దూ శాయరీలో తనకంటూ ప్రత్యేక గుర్తింపు తెచ్చుకున్నారు. దేశవ్యాప్తంగా జరిగిన అనేక ముషాయిరాల్లో పాల్గొని ప్రేక్షకులను అలరించారు. ఆయన కవిత్వం యువతలో కూడా విశేష ఆదరణ పొందింది.

“कुछ तो मजबूरियाँ रही होंगी, यूँ कोई बेवफ़ा नहीं होता” వంటి ఆయన ప్రసిద్ధ శాయరీలు ఇప్పటికీ సోషల్ మీడియాలో విస్తృతంగా వినిపిస్తుంటాయి. ఉర్దూ భాషను సామాన్యులకు మరింత చేరువ చేయడంలో బషీర్ బద్ర్ కీలక పాత్ర పోషించారని సాహితీవేత్తలు చెబుతున్నారు.

ఆయన సాహిత్య సేవలకు గుర్తింపుగా పలు జాతీయ పురస్కారాలు కూడా లభించాయి. పద్మశ్రీతో పాటు అనేక సాహిత్య అవార్డులు ఆయనను వరించాయి. భారతీయ ఉర్దూ సాహిత్యానికి ఆయన చేసిన సేవలు చిరస్మరణీయమని ప్రముఖులు పేర్కొంటున్నారు.

బషీర్ బద్ర్ మరణ వార్త తెలిసిన వెంటనే పలువురు రాజకీయ నాయకులు, కవులు, సినీ ప్రముఖులు సంతాపం వ్యక్తం చేశారు. సోషల్ మీడియాలో అభిమానులు ఆయన ప్రసిద్ధ గజల్స్‌ను పంచుకుంటూ నివాళులు అర్పిస్తున్నారు.

ఉర్దూ శాయరీ ప్రపంచంలో ఒక యుగానికి ముగింపు పలికిన బషీర్ బద్ర్ ఇక లేరు. కానీ ఆయన రాసిన పదాలు, గజల్స్, భావాలు మాత్రం తరతరాలకు స్ఫూర్తిగా నిలిచిపోతాయని అభిమానులు చెబుతున్నారు.