పుణె కేతన్ హత్య కేసులో సంచలన మలుపు.. పెళ్లి వద్దని ఒక్క మాట చెప్పి ఉంటే ఈ విషాదమే ఉండేది కాదంటున్న రెండు కుటుంబాలు

పుణె: మహారాష్ట్రలో సంచలనం సృష్టించిన యువ వ్యాపారి కేతన్ అగర్వాల్ హత్య కేసు దర్యాప్తులో కొత్త విషయాలు ఒక్కొక్కటిగా వెలుగులోకి వస్తున్నాయి. ప్రేమ, పెళ్లి, కుటుంబాల మధ్య జరిగిన ఈ విషాద ఘటనలో ఇప్పుడు రెండు కుటుంబాల నుంచి వచ్చిన వాంగ్మూలాలు కేసును మరో కోణంలోకి తీసుకెళ్లాయి. ముఖ్యంగా నిందితురాలు సియా గోయల్ కుటుంబ సభ్యులు, మృతుడు కేతన్ తండ్రి చేసిన వ్యాఖ్యలు ఈ కేసులో కీలకంగా మారాయి.

దర్యాప్తులో భాగంగా పోలీసులు సియా గోయల్ సోదరుడు సాహిల్ గోయల్‌ను సుదీర్ఘంగా విచారించారు. ఈ సందర్భంగా అతడు చెప్పిన విషయాలు అధికారులను ఆశ్చర్యానికి గురి చేశాయి. సియాకు కేతన్‌తో వివాహం ఇష్టం లేదన్న విషయం తమ కుటుంబానికి ఎప్పుడూ చెప్పలేదని ఆయన వెల్లడించారు. ఒకవేళ ముందుగానే చెప్పి ఉంటే పెళ్లిని రద్దు చేయడంలో తమకు ఎలాంటి అభ్యంతరం ఉండేదే కాదన్నారు.

అంతేకాదు, సియాకు సహ నిందితుడు చేతన్‌తో ప్రేమ సంబంధం ఉందన్న విషయం కూడా తమకు తెలియదని చెప్పారు. చేతన్ తమ సామాజిక వర్గానికి చెందినవాడే కాకుండా ఆర్థికంగా కూడా తమ కుటుంబానికి సమాన స్థాయిలో ఉన్నాడని, ఆ విషయాన్ని ముందే చెప్పి ఉంటే వారి వివాహానికి కూడా అంగీకరించేవారమని సాహిల్ వెల్లడించినట్లు దర్యాప్తు వర్గాలు తెలిపాయి. ప్రేమించిన వ్యక్తితో జీవితం గడపాలని సియా కోరుకుని ఉంటే కుటుంబ సభ్యుల నుంచి వ్యతిరేకత ఉండేది కాదనే విషయం ఇప్పుడు ఈ కేసులో కీలక అంశంగా మారింది.

మరోవైపు మృతుడు కేతన్ అగర్వాల్ కుటుంబం కూడా దాదాపు ఇదే అభిప్రాయాన్ని వ్యక్తం చేసింది. కేతన్ తండ్రి విశాల్ అగర్వాల్ మాట్లాడుతూ, తమ కుమారుడిని పెళ్లి చేసుకోవడం సియాకు ఇష్టం లేదనే విషయం ఒక్కసారైనా చెప్పి ఉంటే ఈ పెళ్లి జరిగేది కాదన్నారు. తమ కుటుంబానికి ఎలాంటి బలవంతపు వివాహం చేయాలనే ఉద్దేశం లేదని, సియా అభిప్రాయాన్ని గౌరవించేవారమని తెలిపారు. కానీ వివాహం తర్వాత ఇంత దారుణానికి పాల్పడటం తమ కుటుంబాన్ని జీవితాంతం కోలుకోలేని దుఃఖంలోకి నెట్టిందని ఆవేదన వ్యక్తం చేశారు.

ఇటీవల సోషల్ మీడియాలో ప్రచారం జరిగిన మరో అంశంపైనా ఆయన స్పందించారు. కేతన్ విగ్గు ధరించడం వల్లే ఈ హత్య జరిగిందన్న ప్రచారంలో ఎలాంటి నిజం లేదని స్పష్టం చేశారు. వైద్య కారణాల వల్ల కొంత జుట్టు రాలిపోయిందని, ఆ విషయం ముందుగానే సియా కుటుంబానికి తెలిపామని చెప్పారు. అలాంటి కారణాలతో ఈ ఘటనకు సంబంధం లేదని ఆయన పేర్కొన్నారు.

ఇదిలా ఉండగా, కేసు దర్యాప్తులో డిజిటల్ ఆధారాలు కీలకంగా మారాయి. నిందితురాలు సియా, సహ నిందితుడు చేతన్ ఇద్దరూ తమ మొబైల్ ఫోన్లలోని వాట్సాప్ చాట్స్, ఇన్‌స్టాగ్రామ్ సందేశాలు, కాల్ వివరాలు, ఇతర ఆన్‌లైన్ కార్యకలాపాలను తొలగించినట్లు పోలీసులు గుర్తించారు. అయితే ఫోరెన్సిక్ నిపుణులు డిలీట్ చేసిన డేటాను తిరిగి రికవరీ చేసే పనిలో నిమగ్నమయ్యారు. ఆ సమాచారంతో హత్యకు ముందు జరిగిన పరిణామాలు, ఇద్దరి మధ్య జరిగిన సంభాషణలు, కుట్రకు సంబంధించిన ఆధారాలు బయటపడే అవకాశం ఉందని అధికారులు భావిస్తున్నారు.

ఈ కేసు తీవ్ర సంచలనం రేపడంతో మహారాష్ట్ర ప్రభుత్వం కూడా ప్రత్యేక దృష్టి సారించింది. బాధిత కుటుంబం చేసిన విజ్ఞప్తి మేరకు కేసును ఫాస్ట్-ట్రాక్ కోర్టులో విచారించేందుకు ప్రభుత్వం అంగీకరించింది. ముఖ్యమంత్రి దేవేంద్ర ఫడణవీస్ స్వయంగా కేతన్ కుటుంబ సభ్యులను పరామర్శించి, న్యాయం జరిగేలా ప్రభుత్వం పూర్తి సహకారం అందిస్తుందని హామీ ఇచ్చారు. కేసు వాదన కోసం ప్రముఖ న్యాయవాది ఉజ్వల్ నికమ్‌ను ప్రత్యేక పబ్లిక్ ప్రాసిక్యూటర్‌గా నియమించారు.

డిజిటల్ ఆధారాలు, ఫోరెన్సిక్ నివేదికలు, కుటుంబ సభ్యుల వాంగ్మూలాలు వెలుగులోకి వస్తుండటంతో పుణె కేతన్ హత్య కేసు మరిన్ని కీలక మలుపులు తిరిగే అవకాశముందని దర్యాప్తు అధికారులు భావిస్తున్నారు.