24 గంటల్లో శిశువు రక్షణ.. 4 నెలల్లో 80 వాహనాల రికవరీ.. APలో AI పోలీసింగ్ సత్తా!
అమరావతి: ఆంధ్రప్రదేశ్‌లో నేరాల నియంత్రణకు కృత్రిమ మేధస్సు (AI) కొత్త ఆయుధంగా మారుతోంది. రాష్ట్ర ప్రభుత్వానికి చెందిన RTGS CCTV360 నిఘా వ్యవస్థ వాహన దొంగలకు కంటిమీద కునుకు లేకుండా చేస్తోంది. కేవలం నాలుగు నెలల్లోనే ఈ AI ఆధారిత వ్యవస్థ సహాయంతో 80 దొంగిలించిన వాహనాలు, 73 మంది మిస్సింగ్ వ్యక్తులు, 52 మంది నిందితులను పోలీసులు గుర్తించి కేసులను వేగంగా ఛేదించారు.
గుంటూరులో దొంగిలించబడిన ఓ హోండా యాక్టివా స్కూటర్ కేసులో ఒక్క రియల్‌టైమ్ అలర్ట్‌తోనే నిందితుడిని పోలీసులు పట్టుకున్నారు. విచారణలో అతడే మరో ఏడు వాహనాల దొంగతనాలకు పాల్పడినట్లు బయటపడింది. దీంతో ఒకే కేసు ద్వారా మొత్తం ఏడు వాహనాల దొంగతనాలు వెలుగులోకి వచ్చాయి.
ఇక బాపట్ల జిల్లా చిరాలలో తల్లితో పాటు ఫుట్‌పాత్‌పై నిద్రిస్తున్న ఆరు నెలల శిశువును కిడ్నాప్ చేసిన ఘటనలో, CCTV360 వివిధ కెమెరాల ఫుటేజ్‌ను విశ్లేషించి నిందితుడి కదలికలను గుర్తించింది. దీంతో పోలీసులు 24 గంటల్లోనే శిశువును సురక్షితంగా రక్షించి తల్లికి అప్పగించారు.
రాష్ట్రవ్యాప్తంగా ఇప్పటికే 14,750కు పైగా CCTV కెమెరాలను RTGS CCTV360 ప్లాట్‌ఫామ్‌తో అనుసంధానం చేశారు. వాహనం నంబర్‌ను సిస్టమ్‌లో నమోదు చేసిన వెంటనే AI ఆ వాహనం రాష్ట్రంలో ఎక్కడ కనిపించినా వెంటనే పోలీసులకు రియల్‌టైమ్ అలర్ట్ పంపిస్తుంది. దీంతో దర్యాప్తు వేగవంతమవుతూ నిందితులను త్వరగా గుర్తించే అవకాశం పెరుగుతోంది.
విజయవాడ, నందిగామ, విశ్సన్నపేట, ఏఎస్ నగర్, మదనపల్లె, మైలవరం, రెడ్డిగూడెం వంటి ప్రాంతాల్లో కూడా ఈ వ్యవస్థ సహాయంతో అనేక పెండింగ్ కేసులు పరిష్కారమయ్యాయి. వాహన దొంగతనాలకే కాకుండా మిస్సింగ్ వ్యక్తుల ఆచూకీ గుర్తించడం, నిందితులను పట్టుకోవడం, కుటుంబాలను తిరిగి కలపడం వంటి అంశాల్లో కూడా AI కీలక పాత్ర పోషిస్తోంది.
ఆంధ్రప్రదేశ్ ప్రభుత్వం 'సేఫ్ ఆంధ్రప్రదేశ్' లక్ష్యంతో రూపొందించిన RTGS CCTV360 భవిష్యత్తులో ట్రాఫిక్ నిర్వహణ, విపత్తుల సమయంలో సహాయక చర్యలు, పట్టణ భద్రత వంటి రంగాల్లో కూడా మరింత కీలక పాత్ర పోషించే అవకాశముందని అధికారులు చెబుతున్నారు. AI ఆధారిత స్మార్ట్ పోలీసింగ్‌తో రాష్ట్రంలో నేర నియంత్రణకు కొత్త దిశ ఏర్పడుతోందని అభిప్రాయపడుతున్నారు.
