టీవీ ఛానళ్లకు కేంద్రం కీలక ఆదేశాలు
ప్రోగ్రామ్‌ కోడ్‌ పాటించాల్సిందే.. ఉగ్రవాద కార్యకలాపాల ప్రత్యక్ష ప్రసారంపై నిషేధం
న్యూఢిల్లీ, అక్టోబరు 21: వార్తా ప్రసారాల్లో సంయమనం పాటించాలని, చట్టబద్ధమైన నిబంధనలను తూచా తప్పకుండా అనుసరించాలని ప్రైవేటు శాటిలైట్‌ టీవీ ఛానళ్లకు కేంద్ర సమాచార, ప్రసార మంత్రిత్వశాఖ సూచించింది. కేబుల్‌ టెలివిజన్‌ నెట్‌వర్క్స్‌ (రెగ్యులేషన్‌) చట్టం-1995, సంబంధిత నిబంధనల ప్రకారం నిర్దేశించిన ప్రోగ్రామ్‌ కోడ్‌ను కచ్చితంగా పాటించాలని స్పష్టం చేసింది. ఈ మేరకు అక్టోబరు 21న అన్ని ప్రైవేటు శాటిలైట్‌ టీవీ ఛానళ్లకు అడ్వైజరీ జారీ చేసింది.
కొన్ని ఛానళ్లు ప్రోగ్రామ్‌ కోడ్‌ను ఉల్లంఘిస్తున్నట్లు గుర్తించామని మంత్రిత్వశాఖ పేర్కొంది. కేబుల్‌ టెలివిజన్‌ నెట్‌వర్క్స్‌ (సవరణ) నిబంధనలు-2021 ప్రకారం ఏర్పాటైన అంతర్‌శాఖల కమిటీ కూడా కొన్ని ప్రసారాలు నిబంధనల స్ఫూర్తికి విరుద్ధంగా ఉన్నట్లు గుర్తించిందని తెలిపింది. టీవీ ప్రసారాల్లో అనుచిత ప్రవర్తన, భాషను సాధారణ విషయాలుగా చూపించకూడదని స్పష్టం చేసింది.
ఉగ్రవాద కార్యకలాపాల ప్రత్యక్ష ప్రసారం వద్దు
భద్రతా బలగాలు చేపట్టే ఉగ్రవాద వ్యతిరేక కార్యకలాపాలను ప్రత్యక్ష ప్రసారం చేయకూడదని కేంద్రం స్పష్టం చేసింది. ఆపరేషన్‌ ముగిసే వరకు అధీకృత అధికారి ఇచ్చే ఎప్పటికప్పుడు సమాచారానికే మీడియా కవరేజీ పరిమితం కావాలని సూచించింది. పాత దృశ్యాలను ప్రత్యక్ష ప్రసారాలుగా భావించే అవకాశం లేకుండా అవసరమైన చోట వాటిపై తేదీ, సమయ వివరాలు ఉంచాలని పేర్కొంది.
నేర వార్తల్లో సంచలనం వద్దు
నేరాలు, హింసకు సంబంధించిన వార్తలను ధ్రువీకరించిన వాస్తవాల ఆధారంగా సమతూకంతో ప్రసారం చేయాలని సూచించింది. సంచలనాత్మక కథనాలు, నిరాధార ఆరోపణలు, అర్ధసత్యాలు, భయాందోళనలు కలిగించే దృశ్యాలను పదేపదే చూపించడం మానుకోవాలని తెలిపింది. హింసాత్మక, అసహ్యకర దృశ్యాలను ప్రసారం చేసే సందర్భాల్లో వీక్షకులకు ఇబ్బంది కలగకుండా తగిన జాగ్రత్తలు తీసుకోవాలని పేర్కొంది. అవసరమైన చోట దృశ్యాలను బ్లర్‌ చేయడం లేదా వాటిలోని కొన్ని భాగాలను కప్పివేయడం వంటి పద్ధతులు పాటించాలని సూచించింది.
ప్రకృతి విపత్తులు, భారీ ప్రమాదాలకు సంబంధించిన వార్తలను కూడా ధ్రువీకరించిన సమాచారంతోనే ప్రసారం చేయాలని కేంద్రం తెలిపింది. అవసరమైన చోట దృశ్యాలకు సమయ వివరాలు జతచేసి, ప్రజల్లో అనవసర భయాందోళనలు కలగకుండా చూడాలని సూచించింది.
భారత మ్యాపుల వినియోగంపై స్పష్టత
టీవీ ప్రసారాలు, గ్రాఫిక్స్‌, డిజిటల్‌ రూపకల్పనల్లో భారతదేశానికి సంబంధించిన మ్యాపులను ఉపయోగించేటప్పుడు సర్వే ఆఫ్‌ ఇండియా ప్రచురించిన ప్రామాణిక మ్యాపులనే వినియోగించాలని కేంద్రం సూచించింది.
చర్చల్లో విద్వేష వ్యాఖ్యలకు తావివ్వొద్దు
లైవ్‌ డిబేట్లు, ప్యానెల్‌ చర్చల్లో మత విద్వేషాలను లేదా దేశ వ్యతిరేక భావాలను ప్రోత్సహించేలా వ్యవహరించకూడదని తెలిపింది. చర్చల్లో పాల్గొనే వారి ఎంపిక, ముందస్తు అవగాహన కల్పించడం సహా సంపాదకీయ నియంత్రణను పటిష్ఠం చేసుకోవాలని ఛానళ్లకు సూచించింది. అభ్యంతరకర, దూషణపూరిత లేదా రెచ్చగొట్టే వ్యాఖ్యలు ప్రసారమయ్యే పరిస్థితుల్లో అవసరాన్ని బట్టి మ్యూట్‌ చేయడం, హెచ్చరికలు ఇవ్వడం, ప్రసారాన్ని మధ్యలో నిలిపివేయడం వంటి చర్యలు చేపట్టాలని పేర్కొంది.
బాధితుల వివరాలు వెల్లడించరాదు
లైంగిక నేరాల బాధితుల గుర్తింపును వెల్లడించకూడదన్న సుప్రీంకోర్టు ఆదేశాలు, చట్టపరమైన నిబంధనలను కచ్చితంగా పాటించాలని కేంద్రం స్పష్టం చేసింది. బాధితుల ఫొటోలు, కుటుంబ వివరాలు, నివాస ప్రాంతం సహా వారి గుర్తింపును ప్రత్యక్షంగా లేదా పరోక్షంగా వెల్లడించే సమాచారాన్ని ప్రసారం చేయకూడదని సూచించింది.
ఏఐ వినియోగంలో అప్రమత్తత
టీవీ కార్యక్రమాలు, గ్రాఫిక్స్‌, వర్చువల్‌ వార్తా ప్రదర్శనల్లో కృత్రిమ మేధ (ఏఐ), జనరేటివ్‌ ఏఐ సాధనాలను ఉపయోగించేటప్పుడు తగిన జాగ్రత్తలు తీసుకోవాలని కేంద్రం తెలిపింది. వార్తల కచ్చితత్వం, ప్రామాణికత, సున్నితత్వానికి భంగం కలగకుండా, ప్రోగ్రామ్‌ కోడ్‌కు అనుగుణంగానే వాటిని సహాయక సాధనాలుగా వినియోగించాలని సూచించింది.
వార్తల సేకరణ, ఎడిటింగ్‌, నిర్మాణం, ప్రసారం వంటి విభాగాల్లో పనిచేసే సిబ్బందికి ప్రోగ్రామ్‌ కోడ్‌పై అవగాహన కల్పించాలని పేర్కొంది. సంపాదకీయ, నిర్మాణ బృందాలకు క్రమం తప్పకుండా శిక్షణ కార్యక్రమాలు నిర్వహించాలని సూచించింది.
నిబంధనలను ఉల్లంఘిస్తే కేబుల్‌ టెలివిజన్‌ నెట్‌వర్క్స్‌ (రెగ్యులేషన్‌) చట్టం-1995, దాని కింద రూపొందించిన నిబంధనల ప్రకారం చర్యలు తీసుకునే అవకాశం ఉందని మంత్రిత్వశాఖ హెచ్చరించింది. సంబంధిత అధికార సంస్థ ఆమోదంతో ఈ అడ్వైజరీ జారీ చేసినట్లు పత్రంలో పేర్కొంది.
