ఊపిరితిత్తులు పనిచేయకపోయినా ప్రాణాలు కాపాడే టెక్నాలజీ ఇదే.. ECMOపై కీలక అవగాహన!

గుంటూరు: ఊపిరితిత్తులు పూర్తిగా పనిచేయని అత్యవసర పరిస్థితుల్లో కూడా రోగి ప్రాణాలను కాపాడే అత్యాధునిక వైద్య సాంకేతికత ECMO (ఎక్స్‌ట్రాకార్పోరియల్ మెంబ్రేన్ ఆక్సిజినేషన్) గురించి ప్రతి కుటుంబానికి అవగాహన ఉండాలని హైదరాబాద్ యశోద హాస్పిటల్స్ మెడికల్ డైరెక్టర్ డాక్టర్ వెంకట రమణ కోలా, క్రిటికల్ కేర్ కన్సల్టెంట్ డాక్టర్ మాధవరెడ్డి అన్నారు.

గుంటూరులో ఐసీయూ, క్రిటికల్ కేర్ సొసైటీ సంయుక్త ఆధ్వర్యంలో నిర్వహిస్తున్న ECMO కాన్‌క్లేవ్ సందర్భంగా ఏర్పాటు చేసిన మీడియా సమావేశంలో వారు మాట్లాడారు.

డాక్టర్లకే కాదు.. ప్రతి కుటుంబానికీ అవగాహన అవసరం

ECMO గురించి వైద్యులకు మాత్రమే కాకుండా ప్రతి కుటుంబంలోని సభ్యులకు కూడా అవగాహన ఉండాలని వారు సూచించారు. గత నాలుగు నుంచి ఐదు సంవత్సరాల్లో ECMOపై ప్రజల్లో అవగాహన పెరగడంతో పాటు ఇన్సూరెన్స్ కవరేజ్ అందుబాటులోకి రావడం వల్ల ఈ చికిత్స అవసరం దేశవ్యాప్తంగా, ముఖ్యంగా తెలుగు రాష్ట్రాల్లో మరింత పెరిగిందన్నారు.

ECMO అంటే ఏమిటి?

ఊపిరితిత్తులు లేదా గుండె తీవ్రంగా పనిచేయలేని పరిస్థితుల్లో రోగి శరీరంలోని రక్తాన్ని ప్రత్యేక యంత్రం ద్వారా బయటకు తీసి, ఆక్సిజన్ అందించి తిరిగి శరీరంలోకి పంపే అత్యాధునిక విధానమే ECMO అని వివరించారు.

ఈ ప్రక్రియ వల్ల శరీరంలోని ముఖ్య అవయవాలకు నిరంతరం ఆక్సిజన్ అందుతుందని, ఊపిరితిత్తులు కోలుకునే వరకు రోగి ప్రాణాలను రక్షించేందుకు ఇది ఎంతో ఉపయోగపడుతుందని తెలిపారు.

వెంటిలేటర్ సరిపోని సమయంలో ECMO ప్రాణరక్షకంగా మారుతుంది

తీవ్ర న్యుమోనియా, ఇన్‌ఫ్లుయెంజా వంటి వ్యాధులతో బాధపడుతూ వెంటిలేటర్‌పై ఉన్నప్పటికీ శరీరంలో ఆక్సిజన్ స్థాయి మెరుగుపడకపోతే ECMO చికిత్స అవసరం అవుతుందని డాక్టర్లు వివరించారు. ఈ సాంకేతికత వల్ల ఊపిరితిత్తులకు విశ్రాంతి లభించి కోలుకునే అవకాశం పెరుగుతుందని చెప్పారు.

యశోద హాస్పిటల్స్‌లో అత్యాధునిక వైద్య సేవలు

హైదరాబాద్‌లో 35 సంవత్సరాల క్రితం 45 పడకలతో ప్రారంభమైన యశోద హాస్పిటల్స్ ప్రస్తుతం రెండు తెలుగు రాష్ట్రాల్లో అత్యాధునిక వైద్య సేవలు అందిస్తున్నాయని తెలిపారు. అమెరికా, యూరప్ స్థాయి సాంకేతికతతో కూడిన వైద్య పరికరాలు, అనుభవజ్ఞులైన వైద్య బృందంతో చికిత్స అందిస్తున్నామని చెప్పారు.

లంగ్, హార్ట్ ట్రాన్స్‌ప్లాంట్లు దేశంలోని కొద్ది కేంద్రాల్లో మాత్రమే జరుగుతున్నాయని, వాటిలో యశోద హాస్పిటల్స్ ఒకటిగా నిలవడం గర్వకారణమని పేర్కొన్నారు.

ECMOలో నైపుణ్యం కలిగిన వైద్య బృందం

ECMO చికిత్సలో ప్రత్యేక నైపుణ్యం కలిగిన వైద్యులు, శిక్షణ పొందిన సిబ్బంది యశోద హాస్పిటల్స్‌లో అందుబాటులో ఉన్నారని తెలిపారు. అత్యవసర పరిస్థితుల్లో ECMO అవసరమైన రోగులకు సమయానికి చికిత్స అందించి ప్రాణాలు కాపాడుతున్నామని చెప్పారు.

గుంటూరులో నిపుణులకు ప్రత్యేక శిక్షణ

ఆదివారం నిర్వహించే ECMO వర్క్‌షాప్‌లో క్రిటికల్ కేర్ స్పెషలిస్టులు, నెఫ్రాలజిస్టులు మరియు ఇతర వైద్య నిపుణులకు ECMO వినియోగం, ప్రయోజనాలు, అత్యవసర పరిస్థితుల్లో తీసుకోవాల్సిన చర్యలపై ప్రత్యేక శిక్షణ ఇవ్వనున్నట్లు వెల్లడించారు.

ఈ కార్యక్రమంలో మార్కెటింగ్ టీం లీడర్ కె. చంద్రశేఖర్‌తో పాటు పలువురు వైద్య నిపుణులు పాల్గొన్నారు.