గుండె జబ్బులు పెరగడానికి అసలు కారణాలివే.. ప్రముఖ కార్డియాలజిస్ట్ కీలక సూచనలు!
గుంటూరులో నిర్వహించిన ఆరోగ్య అవగాహన కార్యక్రమంలో ప్రముఖ ఇంటర్వెన్షనల్ కార్డియాలజిస్ట్ డాక్టర్ పోలవరపు అనురాగ్ గుండె ఆరోగ్యంపై కీలక సూచనలు చేశారు. జీవనశైలిలో మార్పులు చేసుకోవడం ద్వారానే గుండె జబ్బులను చాలావరకు నివారించవచ్చని ఆయన స్పష్టం చేశారు.
స్థానిక బ్రాడీపేటలోని గుర్రం జాషువా విజ్ఞాన కేంద్రంలో ప్రజా ఆరోగ్య వేదిక సంయుక్త ఆధ్వర్యంలో ‘గుండె-రక్త ప్రసరణ’ అంశంపై నిర్వహించిన ముఖాముఖి కార్యక్రమంలో ఆయన మాట్లాడారు. ప్రస్తుతం మానసిక ఒత్తిడి, పర్యావరణ కాలుష్యం, అసమతుల్య ఆహారపు అలవాట్లు వంటి కారణాలతో గుండె సంబంధిత వ్యాధులు వేగంగా పెరుగుతున్నాయని తెలిపారు.
ఈ కార్యక్రమంలో పాల్గొన్న అనేక మంది బీపీ, షుగర్, ఈసీజీ పరీక్షలు చేయించుకుని వైద్యుల నుంచి ఆరోగ్య సలహాలు పొందారు. గుండెకు సంబంధించిన చిన్న సమస్యలను కూడా నిర్లక్ష్యం చేయకూడదని, సకాలంలో వైద్య పరీక్షలు చేయించుకుంటే ప్రమాదాలను ముందుగానే గుర్తించవచ్చని డాక్టర్ అనురాగ్ సూచించారు.
ముఖ్యంగా క్రమం తప్పకుండా వ్యాయామం చేయడం, ఒత్తిడిని తగ్గించుకోవడం, ఆరోగ్యకరమైన ఆహారం తీసుకోవడం, ధూమపానం మరియు మద్యపానానికి దూరంగా ఉండడం గుండె ఆరోగ్యానికి ఎంతో అవసరమన్నారు. ఒక నిర్దిష్ట వయస్సు వచ్చిన తర్వాత ప్రతి ఒక్కరూ రెగ్యులర్ హెల్త్ చెకప్ చేయించుకోవాలని ఆయన కోరారు.
ఈ కార్యక్రమంలో విజ్ఞాన కేంద్రం కన్వీనర్ ఎన్. భావన్నారాయణ, ఎల్ఎస్ భారవి, జి. శ్రీనివాస్, మురళీకృష్ణ, సీనియర్ సిటిజన్స్ అసోసియేషన్ నాయకులు పరమేశ్వర రెడ్డి తదితరులు పాల్గొన్నారు.
