ఏపీకి డబుల్ అలర్ట్: రేపు పిడుగులతో వర్షాలు.. మరోవైపు ఎండ తీవ్రత

ఆంధ్రప్రదేశ్‌లో రేపు (జూన్ 17) వాతావరణ పరిస్థితులు విభిన్నంగా ఉండనున్నాయని రాష్ట్ర విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ తెలిపారు. తూర్పు విదర్భ, తెలంగాణ మీదుగా దక్షిణ కోస్తాంధ్ర వరకు ద్రోణి విస్తరించి ఉండటంతో రాష్ట్రంలోని పలు జిల్లాల్లో పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందని వెల్లడించారు. అదే సమయంలో కొన్ని ప్రాంతాల్లో ఎండ ప్రభావం కూడా కొనసాగనున్నందున ప్రజలు రెండింటి విషయంలోనూ అప్రమత్తంగా ఉండాలని అధికారులు సూచిస్తున్నారు.

వాతావరణ శాఖ అంచనాల ప్రకారం విజయనగరం, పార్వతీపురం మన్యం, అల్లూరి సీతారామరాజు, పోలవరం పరిసర ప్రాంతాలు, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు, మార్కాపురం, ప్రకాశం, నెల్లూరు, తిరుపతి జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉంది. మిగిలిన జిల్లాల్లో కూడా కొన్ని ప్రాంతాల్లో పిడుగులతో కూడిన తేలికపాటి వర్షాలు పడే అవకాశాన్ని అధికారులు పేర్కొన్నారు.

పిడుగులు, ఈదురుగాలులతో కూడిన వర్షాల సమయంలో ప్రజలు ప్రత్యేక జాగ్రత్తలు తీసుకోవాలని విపత్తుల నిర్వహణ సంస్థ సూచించింది. ముఖ్యంగా చెట్ల కింద, భారీ హోర్డింగ్స్ లేదా విద్యుత్ స్తంభాల సమీపంలో నిలబడకుండా ఉండాలని హెచ్చరించింది. ఈదురుగాలుల కారణంగా విద్యుత్ వైర్లు తెగిపడి ఉండే అవకాశం ఉన్నందున అలాంటి ప్రాంతాలకు దూరంగా ఉండాలని సూచించింది. అత్యవసర పరిస్థితుల్లో స్థానిక అధికారులకు సమాచారం ఇవ్వాలని కోరింది.

ఆకాశం మేఘావృతమై ఉరుములు వినిపించిన వెంటనే రైతులు, వ్యవసాయ కూలీలు, పశువుల కాపరులు వెంటనే పొలాల నుంచి బయటకు వచ్చి సురక్షిత ప్రాంతాలకు చేరుకోవాలని అధికారులు సూచించారు. పిడుగులు పడే సమయంలో బహిరంగ ప్రదేశాల్లో ఉండటం ప్రమాదకరమని, వీలైతే పక్కా భవనాల్లో ఆశ్రయం పొందాలని తెలిపారు.

మరోవైపు కొన్ని ప్రాంతాల్లో ఎండ ప్రభావం కొనసాగే అవకాశం ఉన్నందున ప్రజలు వేడి నుంచి కూడా జాగ్రత్త పడాలని సూచించారు. మధ్యాహ్నం సమయంలో అవసరం లేకపోతే బయటకు వెళ్లకుండా ఉండటం మంచిదని, బయటకు వెళ్లాల్సి వస్తే తలకు టోపీ లేదా గుడ్డ కట్టుకోవడంతో పాటు చెవుల్లోకి వేడిగాలి వెళ్లకుండా జాగ్రత్తలు తీసుకోవాలని సూచించారు. తగినంత నీరు తాగడం, శరీరంలో నీటి శాతం తగ్గకుండా చూసుకోవడం అవసరమన్నారు.

ప్రత్యేకంగా గుండె సంబంధిత వ్యాధులు, మధుమేహం, రక్తపోటు వంటి సమస్యలతో బాధపడుతున్న వారు ఎండలో ఎక్కువసేపు తిరగకుండా ఉండాలని వైద్య నిపుణులు సూచిస్తున్నారు. వర్షాలు, ఎండ రెండింటి ప్రభావం ఒకేసారి ఉండే అవకాశం ఉన్న నేపథ్యంలో ప్రజలు అధికారుల హెచ్చరికలను పాటిస్తూ అప్రమత్తంగా ఉండటం ద్వారా ప్రమాదాలను నివారించవచ్చు.