డీఎస్సీపై సీబీఐ డిమాండ్.. జగన్‌కు నిజంగా న్యాయం కావాలా? లేక రాజకీయ వ్యూహమా?
ఆంధ్రప్రదేశ్ రాజకీయాల్లో డీఎస్సీ నియామకాల వ్యవహారం మరోసారి చర్చనీయాంశంగా మారింది. కొద్ది రోజుల క్రితం వరకు డీఎస్సీపై వచ్చిన ఆరోపణలకు ప్రభుత్వం సమగ్ర వివరణ ఇవ్వడంతో వివాదం దాదాపు ముగిసిపోయిందనే అభిప్రాయం వ్యక్తమైంది. కానీ మాజీ ముఖ్యమంత్రి వైఎస్ జగన్ మోహన్ రెడ్డి తాజాగా సీబీఐ విచారణ కోరడంతో ఈ అంశం మళ్లీ రాజకీయ వేడిని రాజేసింది.
డీఎస్సీ ఫలితాలు వెలువడిన తర్వాత కొందరు అభ్యర్థులు తమకు అన్యాయం జరిగిందంటూ ఆరోపణలు చేశారు. ఈ అంశాన్ని వైఎస్సార్‌సీపీ బలంగా ప్ర‌చారం చేసింది. జగన్ స్వయంగా కొందరు అభ్యర్థులను తాడేపల్లిలోని తన నివాసానికి పిలిపించుకుని వారి అభ్యంతరాలను ప్రజల ముందుకు తీసుకువచ్చారు. దీంతో నియామకాల ప్రక్రియపై అనుమానాలు పెరిగాయి.
అయితే ప్రభుత్వం ఈ ఆరోపణలను తేలికగా తీసుకోలేదు. విద్యాశాఖ ప్రధాన కార్యదర్శి కోన శశిధర్ ప్రత్యేకంగా మీడియా సమావేశం నిర్వహించి ఆరోపణలు చేసిన ప్రతి అభ్యర్థి కేసును విడివిడిగా విశ్లేషించారు. వారికి ఉద్యోగం ఎందుకు రాలేదో, రోస్టర్ విధానం ఎలా పనిచేస్తుందో, హారిజంటల్ రిజర్వేషన్ అమలు ఎలా జరుగుతుందో వివరంగా చెప్పారు.
కేవలం మాటలతో కాకుండా అభ్యర్థుల మార్కులు, ర్యాంకులు, దరఖాస్తు వివరాలు, రిజర్వేషన్ నిబంధనలను బహిరంగంగా చూపించడం ఆ సమావేశానికి ప్రత్యేకతగా నిలిచింది. సోషల్ మీడియాలో కూడా ఈ ప్రెజెంటేషన్‌కు మంచి స్పందన వచ్చింది. రాజకీయ విమర్శలకు బదులుగా డేటాతో సమాధానం ఇచ్చారనే అభిప్రాయం వ్యక్తమైంది.
ప్రభుత్వ వర్గాల దృష్టిలో చూస్తే, కోన శశిధర్ వివరణతో డీఎస్సీ వివాదానికి తెరపడాల్సి ఉంది. ఎందుకంటే ఆరోపణలు చేసిన వారి విషయంలో కూడా సాంకేతికంగా, నిబంధనల పరంగా వివరణ ఇచ్చారు. 15,941 మంది అభ్యర్థుల ఎంపిక పూర్తిగా నిబంధనల ప్రకారమే జరిగిందని స్పష్టం చేశారు.
అయితే జగన్ మాత్రం అక్కడితో ఆగలేదు. ప్రశ్నాపత్రాల తయారీ, పరీక్షల నిర్వహణ బాధ్యతలు ఒకే అధికారికి అప్పగించడం అనుమానాలకు తావిచ్చిందని ఆరోపిస్తున్నారు. ప్రశ్నాపత్రాల లీకేజీ జరిగిందా? క్రీడా కోటాలో నిబంధనల ఉల్లంఘన జరిగిందా? అనే అంశాలపై స్వతంత్ర దర్యాప్తు అవసరమని వాదిస్తున్నారు. అందుకే సీబీఐ విచారణ కోరుతున్నారు.
ఇక్కడే రాజకీయ విశ్లేషణ మొదలవుతోంది. కోన శశిధర్ ఇచ్చిన వివరణ తర్వాత కూడా జగన్ సీబీఐ విచారణ కోరడం వెనుక నిజంగా కొత్త ఆధారాలు ఉన్నాయా? లేక రాజకీయ లెక్కలే ఎక్కువగా ఉన్నాయా? అనే ప్రశ్న తలెత్తుతోంది.
ప్రస్తుతం రాష్ట్రంలో నిరుద్యోగ యువత ఒక కీలక ఓటు బ్యాంక్. ఎన్నికల తర్వాత కూడా ఉద్యోగాల అంశం ప్రజల్లో చర్చనీయాంశంగానే ఉంది. అలాంటి సమయంలో డీఎస్సీ వంటి అంశాన్ని సజీవంగా ఉంచడం ద్వారా యువత అసంతృప్తిని రాజకీయంగా తమవైపు మళ్లించాలనే ప్రయత్నం జరుగుతోందనే వాదన వినిపిస్తోంది. ముఖ్యంగా ‘వెన్నుపోటుకు రెండేళ్లు’ కార్యక్రమానికి ముందు ఈ అంశాన్ని మళ్లీ తెరపైకి తీసుకురావడం కూడా రాజకీయంగా ప్రాధాన్యం సంతరించుకుంది.
మరోవైపు జగన్ వాదనను పూర్తిగా కొట్టిపారేయలేమని చెప్పేవారూ ఉన్నారు. ప్రభుత్వం వివరణ ఇచ్చిందంటే విచారణ అవసరం లేదని తేలిపోదని, ప్రశ్నాపత్రాల లీకేజీ లేదా ఇతర ఆరోపణలపై అనుమానాలు ఉంటే స్వతంత్ర సంస్థతో దర్యాప్తు జరగాలని వారు అంటున్నారు.
అయితే ఇప్పటి వరకు ప్రభుత్వం సమర్పించిన వివరాలను పరిశీలిస్తే, నియామకాల్లో జరిగినట్లు చెప్పబడుతున్న అనేక ఆరోపణలకు ఇప్పటికే వివరణ లభించింది. అందువల్ల సీబీఐ విచారణ డిమాండ్ వెనుక పరిపాలనా అవసరంకన్నా రాజకీయ అవసరమే ఎక్కువగా కనిపిస్తోందని విశ్లేషకులలో ఒక వర్గం భావిస్తోంది.
మొత్తానికి డీఎస్సీ వివాదం ఇప్పుడు నియామకాల అంశాన్ని దాటి రాజకీయ పోరాటంగా మారింది. ప్రభుత్వం "అన్ని వివరాలు ఇచ్చాం" అంటుంటే, జగన్ "స్వతంత్ర విచారణే నిజాలను బయటపెడుతుంది" అంటున్నారు. ఈ రెండు వాదనల్లో ప్రజలు దేనిని నమ్ముతారన్నదే రాబోయే రోజుల్లో అసలు పరీక్షగా మారనుంది.
