జూన్ 15న సోమవతి అమావాస్య.. ఈ ఒక్క పని చేస్తే శివుడి కటాక్షం లభిస్తుందా?
ఈ ఏడాదిలో తొలి సోమవతి అమావాస్య జూన్ 15న వచ్చింది. అమావాస్య రోజే సోమవారం రావడం అత్యంత అరుదైన, పవిత్రమైన యోగంగా సనాతన ధర్మంలో భావిస్తారు. ఈ రోజున పరమశివుడు, పార్వతీదేవిని భక్తిశ్రద్ధలతో పూజిస్తే సుఖసంతోషాలు, ఐశ్వర్యం, పితృదేవతల ఆశీర్వాదం లభిస్తుందని పురాణాలు చెబుతున్నాయి. అసలు అమావాస్య అంటే ఏమిటి? సోమవతి అమావాస్య ప్రత్యేకత ఏమిటి? ఈ రోజున ఎలాంటి పూజలు చేయాలి? ఏ దానాలు చేస్తే పుణ్యఫలితాలు లభిస్తాయి? తెలుసుకుందాం.
అసలు అమావాస్య అంటే ఏమిటి?
హిందూ పంచాంగం ప్రకారం చంద్రుడు పూర్తిగా కనిపించని రోజును అమావాస్య అంటారు. చంద్రుడు సూర్యుడికి అత్యంత సమీపంలో ఉండటం వల్ల భూమి నుంచి చంద్రుడు కనిపించడు. అందుకే ఈ రోజును అమావాస్య తిథిగా పరిగణిస్తారు. ప్రతి నెలా ఒకసారి వచ్చే అమావాస్య పితృదేవతలకు, ఆధ్యాత్మిక సాధనలకు, దానధర్మాలకు అత్యంత శుభప్రదమైన రోజుగా సనాతన ధర్మం పేర్కొంటుంది.వేదాలు, పురాణాల ప్రకారం అమావాస్య రోజున పితృదేవతలను స్మరించి తర్పణం, శ్రాద్ధ కర్మలు నిర్వహించడం వల్ల వారి ఆశీస్సులు లభిస్తాయని విశ్వాసం. అలాగే ఈ రోజున మనసు ప్రశాంతంగా ఉంచుకుని దైవారాధన చేస్తే ఆధ్యాత్మిక శక్తి పెరుగుతుందని పండితులు చెబుతున్నారు.
సోమవతి అమావాస్య అంటే ఏమిటి?
అమావాస్య తిథి సోమవారం రోజున వస్తే దానిని సోమవతి అమావాస్య అని పిలుస్తారు. సోమవారం పరమశివునికి అత్యంత ప్రీతికరమైన రోజు కావడంతో, ఈ యోగానికి ప్రత్యేకమైన ప్రాధాన్యం ఏర్పడింది. ఈ రోజున శివపార్వతులను పూజిస్తే కుటుంబంలో శాంతి, సౌభాగ్యం, ఐశ్వర్యం పెరుగుతాయని విశ్వాసం.
అంతేకాదు, ఈ రోజున చేసే జపం, తపస్సు, ఉపవాసం, దానం, పుణ్యకార్యాలకు సాధారణ రోజుల కంటే ఎన్నో రెట్లు అధిక ఫలితం లభిస్తుందని పురాణాలు పేర్కొంటున్నాయి.
2026లో సోమవతి అమావాస్య ఎప్పుడు?
ఈ ఏడాది తొలి సోమవతి అమావాస్య 2026 జూన్ 15, సోమవారం రోజున వస్తోంది.అమావాస్య తిథి ప్రారంభం:
జూన్ 14 మధ్యాహ్నం 12:20 గంటలకు
అమావాస్య తిథి ముగింపు:
జూన్ 15 ఉదయం 8:24 గంటలకు
ఉదయ తిథి ప్రకారం జూన్ 15నే సోమవతి అమావాస్యను ఆచరిస్తారు.
శుభ ముహూర్తాలు ఇవే
- బ్రహ్మ ముహూర్తం: ఉదయం 4:02 నుంచి 4:42 గంటల వరకు
- గోధూళి ముహూర్తం: సాయంత్రం 7:17 నుంచి 7:37 గంటల వరకు
సోమవతి అమావాస్య రోజున ఏం చేయాలి?
ఈ రోజున వీలైనంత త్వరగా లేచి పవిత్ర స్నానం చేయాలి. సాధ్యమైతే గంగ, గోదావరి, కృష్ణా, కావేరి వంటి పవిత్ర నదుల్లో లేదా సమీపంలోని తీర్థక్షేత్రంలో స్నానం చేయడం మంచిదని శాస్త్రాలు సూచిస్తున్నాయి. అది సాధ్యం కాకపోతే ఇంట్లోనే గంగాజలం కలిపిన నీటితో స్నానం చేయవచ్చు.ఆ తర్వాత శుభ్రమైన వస్త్రాలు ధరించి శివాలయానికి వెళ్లి పరమశివుడు, పార్వతీదేవిని దర్శించుకోవాలి. ఇంట్లో పూజ చేసేవారు శివలింగానికి పవిత్ర జలం, పాలు, తేనె, పెరుగు, నెయ్యితో అభిషేకం చేయవచ్చు. బిల్వదళాలు, పుష్పాలు, అక్షతలు సమర్పించి దీపారాధన చేయాలి.
ఈ రోజున "ఓం నమః శివాయ", మహామృత్యుంజయ మంత్రం, శివపంచాక్షరి స్తోత్రం, శివ సహస్రనామం పారాయణం చేయడం అత్యంత శ్రేయస్కరంగా భావిస్తారు. వివాహిత మహిళలు కుటుంబ శ్రేయస్సు కోసం శివపార్వతులను ప్రార్థించడం ఆనవాయితీ.
దానాలకు ఎందుకు అంత ప్రాధాన్యం?
సోమవతి అమావాస్య రోజున చేసే దానాన్ని మహాదానంగా పరిగణిస్తారు. ఈ రోజున ఆకలితో ఉన్నవారికి అన్నదానం చేయడం అత్యంత పుణ్యకార్యంగా భావిస్తారు.ఈ సందర్భంగా దానం చేయదగిన వస్తువులు:
- బియ్యం
- పప్పులు
- గోధుమ పిండి
- ఉప్పు
- నువ్వులు
- పండ్లు
- వస్త్రాలు
- గొడుగు
- చెప్పులు
- దక్షిణ
- పేద విద్యార్థులకు పుస్తకాలు
పితృదేవతల కోసం ఈ ఒక్క ప‌నిచేయండి చాలు..
అమావాస్య రోజున పితృదేవతలకు తర్పణం, పిండప్రదానం, శ్రాద్ధ కర్మలు నిర్వహించడం వల్ల వారి ఆశీస్సులు లభిస్తాయని విశ్వాసం. పితృదోషాలు తొలగి కుటుంబంలో శాంతి, సిరిసంపదలు పెరుగుతాయని పెద్దలు చెబుతారు. ఈ ఒక్క ప‌నిచేస్తే అటు పుణ్యం, ఇటు పెద్ద‌ల ఆత్మ‌కు శాంతి లభిస్తుందని పండితులు చెబుతారు.
ఈ రోజు చేయకూడనివి
సోమవతి అమావాస్య రోజున అనవసర కోపం, అబద్ధాలు, ఇతరులను బాధపెట్టే చర్యలు, మద్యం, మాంసాహారం వంటి వాటికి దూరంగా ఉండాలని శాస్త్రాలు సూచిస్తున్నాయి. మనసును ప్రశాంతంగా ఉంచుకుని దైవస్మరణలో గడపడం ఉత్తమం.
