గుండెపోటు రాకుండా ఉండాలంటే ఈ 4 అలవాట్లు తప్పనిసరి: డా. బీవీఆర్

భీమవరం, మే 17ః

గుండె ఆరోగ్యంపై ప్రత్యేక శ్రద్ధ అవసరం

ప్రస్తుత కాలంలో గుండె సంబంధిత వ్యాధులు వేగంగా పెరుగుతున్న నేపథ్యంలో ప్రతి ఒక్కరూ గుండె ఆరోగ్యంపై ప్రత్యేక శ్రద్ధ పెట్టాలని ప్రముఖ గుండె శస్త్ర చికిత్స నిపుణులు, శ్రీవేంకటేశ్వర హాస్పిటల్ అధినేత లయన్ డా. బి. వెంకటేశ్వరరావు (బీవీఆర్) సూచించారు. హార్ట్ ఎటాక్ రాకుండా ఉండాలంటే ముఖ్యంగా నాలుగు జాగ్రత్తలను తప్పనిసరిగా పాటించాలని ఆయన పేర్కొన్నారు.

ఇటీవల ఒక రోగికి అత్యంత క్లిష్టమైన క్రిటికల్ హార్ట్ సర్జరీ, ఎంజియోగ్రామ్ మరియు కీలక గుండె శస్త్రచికిత్సను విజయవంతంగా నిర్వహించిన సందర్భంగా శుక్రవారం భీమవరంలోని మార్నింగ్ కాఫీ క్లబ్ ఆధ్వర్యంలో డా. బీవీఆర్‌ను ఘనంగా సత్కరించారు. ఈ సందర్భంగా మాట్లాడిన ఆయన, గుండెకు రక్త సరఫరా చేసే ధమనుల్లో తీవ్రమైన అడ్డంకులు ఏర్పడినప్పుడు క్రిటికల్ హార్ట్ సర్జరీ అవసరం అవుతుందని వివరించారు.

నిద్ర, డైట్, వ్యాయామం, యోగ తప్పనిసరి

గుండెపోటు నివారణకు సరైన నిద్ర, సమతుల ఆహారం, క్రమమైన వ్యాయామం, యోగ వంటి నాలుగు అలవాట్లు ప్రతి ఒక్కరి జీవితంలో భాగం కావాలని డా. వెంకటేశ్వరరావు సూచించారు. అలాగే ప్రతి ఆరు నెలలకు ఒకసారి వైద్య పరీక్షలు చేయించుకోవడం ద్వారా గుండె సంబంధిత సమస్యలను ముందుగానే గుర్తించి నివారించవచ్చన్నారు.

ధూమపానం ప్రభావంపై కూడా ఆయన కీలక వ్యాఖ్యలు చేశారు. వందమంది ధూమపానం చేసే వ్యక్తుల మధ్య ఉన్నవారిలో కనీసం ఐదుగురికి గుండె సమస్యలు వచ్చే ప్రమాదం ఉంటుందని హెచ్చరించారు. కాబట్టి పొగ త్రాగడం మాత్రమే కాకుండా పాసివ్ స్మోకింగ్‌ కూడా ఆరోగ్యానికి తీవ్రమైన ముప్పు అని పేర్కొన్నారు.

డా. బీవీఆర్‌కు ఘన సత్కారం

మార్నింగ్ కాఫీ క్లబ్ ఫౌండర్ మరియు కన్వీనర్ బొండా రాంబాబు, కో కన్వీనర్ ఓలేటి శ్రీనివాస్, పీఆర్వో భట్టిప్రోలు శ్రీనివాసరావు, కారుమూరి సత్యనారాయణ మాట్లాడుతూ డా. బీవీఆర్ ఇటీవల నిర్వహించిన క్రిటికల్ హార్ట్ ఎంజియోగ్రామ్ మరియు శస్త్రచికిత్స వైద్య రంగంలో అరుదైన విజయమని ప్రశంసించారు. వైద్యుల సూచనలు రోగులు తప్పనిసరిగా పాటిస్తే గుండె సంబంధిత ప్రమాదాలను గణనీయంగా తగ్గించుకోవచ్చన్నారు.

అనంతరం డా. వెంకటేశ్వరరావును శాలువాతో ఘనంగా సత్కరించి అభినందనలు తెలిపారు. కార్యక్రమంలో క్లబ్ సభ్యులు కురిశెట్టి సతీష్, సకల కుమార్, సంకా బాబు, జూలూరి రాజా, అనంతపల్లి సుబ్బారావు, బొడ్డు వాసు, పున్నాని కన్నయ్య, చవ్వా శ్రీనివాస సుబ్బారావు, చవ్వా భామ కృష్ణమూర్తి, గుండు సుధీర్, కోలేపర్ల సుబ్బారావు, కోట్ల నాని, మానేపల్లి వెంకన్నబాబు, తటవర్తి నారాయణతో పాటు డాక్టర్ మిత్రులు మరియు పలువురు సభ్యులు పాల్గొన్నారు.