గుంటూరులో అత్యాధునిక వైద్య సేవలకు కొత్త చిరునామా.. జూన్ 3న ప్రారంభం కానున్న లలితా పీవీఎస్
గుంటూరు నగరంలో అత్యాధునిక వైద్య సేవలకు కొత్త కేంద్రంగా నిలవనున్న ‘లలితా పీవీఎస్ ఇన్‌స్టిట్యూట్ ఆఫ్ మెడికల్ సైన్సెస్’ జూన్ 3న ప్రారంభానికి సిద్ధమైంది. గుంటూరు సమీపంలోని ఎన్హెచ్-16 జాతీయ రహదారికి ఆనుకొని, ఎన్టీఆర్ మానస సరోవరం సమీపంలో నిర్మించిన ఈ సూపర్ స్పెషాలిటీ ఆస్పత్రిని ముఖ్యమంత్రి నారా చంద్రబాబు నాయుడు ప్రారంభించనున్నారు.
ఈ విషయాన్ని విశ్రాంత అదనపు ఎస్పీ, పెదనందిపాడు విద్యా సంస్థల అధ్యక్షుడు, సత్య ఇన్వెస్టిగేషన్ సెక్యూరిటీ సర్వీసెస్ అధినేత కాళహస్తి సత్యనారాయణ వెల్లడించారు. శనివారం గుంటూరులో ప్రముఖ గుండె వైద్య నిపుణుడు డాక్టర్ పి.వి. రాఘవ శర్మ, సీనియర్ న్యూరాలజిస్ట్ డాక్టర్ పి. విజయలను శాలువాలతో ఘనంగా సత్కరించిన సందర్భంగా ఆయన మాట్లాడారు.
దేశంలోని ప్రతిష్ఠాత్మక వైద్య విద్యాసంస్థ అయిన పోస్టు గ్రాడ్యుయేట్ ఇన్‌స్టిట్యూట్ ఆఫ్ మెడికల్ ఎడ్యుకేషన్ అండ్ రీసెర్చ్ (పీజీఐఎంఈఆర్), చండీగఢ్‌లో ఉన్నత విద్యను అభ్యసించిన డాక్టర్ రాఘవ శర్మ, డాక్టర్ విజయ దంపతులు 1990 నుంచి గుంటూరులో వైద్య సేవలు అందిస్తూ వేలాది మంది ప్రజల విశ్వాసాన్ని పొందారని పేర్కొన్నారు.
లలితా పీవీఎస్ ఇన్‌స్టిట్యూట్ ఆఫ్ మెడికల్ సైన్సెస్ ద్వారా గుండె, న్యూరో సహా పలు ప్రత్యేక వైద్య సేవలను అత్యాధునిక సాంకేతిక పరిజ్ఞానంతో అందించనున్నట్లు తెలిపారు. ఎన్టీఆర్ ఆరోగ్యశ్రీ, ఈహెచ్ఎస్‌తో పాటు పలు జాతీయ ఆరోగ్య పథకాల ద్వారా పేద, మధ్యతరగతి ప్రజలకు నాణ్యమైన వైద్య సేవలు అందించడంలో ఈ వైద్య దంపతులు విశేష కృషి చేశారని కొనియాడారు.
కొత్తగా నిర్మించిన ఆస్పత్రి ద్వారా గుంటూరు జిల్లాతో పాటు రాష్ట్రంలోని ఇతర ప్రాంతాల ప్రజలకు కూడా అత్యున్నత స్థాయి వైద్య సేవలు అందుబాటులోకి రానున్నాయని కాళహస్తి సత్యనారాయణ విశ్వాసం వ్యక్తం చేశారు. పోలీసు శాఖలో పనిచేసిన కాలం నుంచే డాక్టర్ రాఘవ శర్మ, డాక్టర్ విజయల సేవలను దగ్గరగా చూశానని, వారు సామాజిక బాధ్యతతో వైద్య సేవలు అందిస్తున్నారని తెలిపారు.
ఆధునిక మౌలిక వసతులు, అత్యాధునిక వైద్య పరికరాలు, నిపుణుల బృందంతో నిర్మితమైన లలితా పీవీఎస్ ఇన్‌స్టిట్యూట్ ఆఫ్ మెడికల్ సైన్సెస్ గుంటూరు వైద్య రంగంలో మరో మైలురాయిగా నిలవనుందని ఆయన పేర్కొన్నారు.
