జీవితంలో ముగ్గురిలో ఒకరికి మెదడు వ్యాధులు.. 80% వరకు నివారణ సాధ్యమే!
గుంటూరు: ప్రపంచవ్యాప్తంగా ప్రతి ముగ్గురిలో ఒకరు తమ జీవితకాలంలో ఏదో ఒక నాడీ సంబంధిత (న్యూరాలజికల్) వ్యాధికి గురయ్యే అవకాశం ఉందని నిపుణులు హెచ్చరిస్తున్నారు. ఈ వ్యాధులే ప్రపంచంలో అత్యధిక వికలాంగత్వానికి కారణమవుతున్నాయని తెలిపారు. ప్రపంచ మెదడు దినోత్సవం (World Brain Day-2026) సందర్భంగా గుంటూరులోని లలిత పీవీఎస్ ఇన్‌స్టిట్యూట్ ఆఫ్ మెడికల్ సైన్సెస్ ఆధ్వర్యంలో మెదడు ఆరోగ్యం, మానసిక ఆరోగ్యంపై ప్రజలకు అవగాహన కార్యక్రమం నిర్వహించారు.
మెదడు ఆరోగ్యం అంటే వ్యాధులు లేకపోవడం మాత్రమే కాదు
కార్యక్రమంలో పాల్గొన్న వైద్యులు మాట్లాడుతూ.. మెదడు ఆరోగ్యం అంటే కేవలం వ్యాధులు లేకపోవడం కాదని, జీవితాంతం మెదడు సమర్థంగా పనిచేసేలా ఆరోగ్యకరమైన ఆహారం, క్రమం తప్పని వ్యాయామం, సామాజిక సంబంధాలు, మానసిక ప్రశాంతత, అలాగే దీర్ఘకాలిక వ్యాధులను నియంత్రణలో ఉంచడం ఎంతో ముఖ్యమని వివరించారు.
10 ప్రమాదకర కారకాలే ఎక్కువ వ్యాధులకు కారణం
న్యూరోసైన్సెస్ విభాగాధిపతి డాక్టర్ పి. విజయ మాట్లాడుతూ.. అన్ని వయసుల వారిలో కనిపించే చాలా మెదడు సంబంధిత వ్యాధులకు ప్రధానంగా పది ప్రమాదకర కారకాలు కారణమవుతున్నాయని చెప్పారు.
అవి:
- అధిక రక్తపోటు
- మధుమేహం
- ఊబకాయం
- పొగాకు వినియోగం
- శారీరక శ్రమ లేకపోవడం
- అనారోగ్యకరమైన ఆహారం
- మద్యపానం
- అధిక కొలెస్ట్రాల్
- ఒత్తిడి
- వాయు కాలుష్యం
డిప్రెషన్‌కు చికిత్స ఉంది.. ఆత్మహత్యలను అరికట్టవచ్చు
సైకియాట్రిస్ట్ డాక్టర్ అజయ్ మాట్లాడుతూ.. చిన్నప్పటి నుంచే మానసిక ఆరోగ్యంపై శ్రద్ధ పెట్టాలని సూచించారు. డిప్రెషన్ అనేది చికిత్స చేయగలిగే వ్యాధి అని, ప్రారంభ దశలోనే గుర్తించి చికిత్స తీసుకుంటే ఆత్మహత్యలను కూడా నివారించవచ్చని వివరించారు.
తరచూ తలనొప్పి వస్తే నిర్లక్ష్యం చేయొద్దు
సీనియర్ న్యూరాలజిస్టు డాక్టర్ యు. వీరమ్మ మాట్లాడుతూ.. తరచూ లేదా నిరంతరం తలనొప్పి, మైగ్రేన్ సమస్యలను నిర్లక్ష్యం చేయరాదన్నారు. సరైన పరీక్షలు, చికిత్సతో చాలా వరకు ఇవి పూర్తిగా నియంత్రణలోకి వస్తాయని తెలిపారు.
హెల్మెట్, సీట్‌బెల్ట్ తప్పనిసరి
సీనియర్ న్యూరోసర్జన్ డాక్టర్ ఎన్. శ్రీనివాసరావు మాట్లాడుతూ.. రోడ్డు ప్రమాదాల వల్ల తలకు తీవ్రమైన గాయాలు ఎక్కువగా యువతలోనే నమోదవుతున్నాయని తెలిపారు. ద్విచక్ర వాహనదారులు హెల్మెట్, కారులో ప్రయాణించే వారు సీట్‌బెల్ట్ తప్పనిసరిగా ధరించాలని సూచించారు.
తల తిరగడం, మూర్ఛ, వెన్నెముక సమస్యలపై అవగాహన
న్యూరాలజిస్టు డాక్టర్ బి. ఉషాకిరణ్ వెర్టిగో (తల తిరగడం) సమస్యల కారణాలు, చికిత్స గురించి వివరించారు. న్యూరాలజిస్టు డాక్టర్ అనూష మూర్ఛ (ఎపిలెప్సీ) వ్యాధిపై ప్రజల్లో ఉన్న అపోహలను తొలగిస్తూ, ఇది పూర్తిగా చికిత్స చేయగలిగే వ్యాధి అని చెప్పారు. మందులను క్రమం తప్పకుండా వాడటం ఎంతో ముఖ్యమని సూచించారు.
న్యూరోసర్జన్ డాక్టర్ సుజన మెడ, నడుము స్పాండిలోసిస్ సమస్యలపై మాట్లాడుతూ.. సరైన భంగిమ, ఎర్గోనామిక్స్, రోజువారీ వ్యాయామం, ప్రారంభ దశలో చికిత్స తీసుకోవడం ద్వారా దీర్ఘకాలిక వెన్నెముక సమస్యలను నివారించవచ్చని వివరించారు.
ప్రజల సందేహాలకు వైద్యుల సమాధానాలు
కార్యక్రమం చివర్లో నిర్వహించిన ప్రశ్నోత్తరాల సమావేశంలో ప్రజలు న్యూరాలజిస్టులు, న్యూరోసర్జన్లు, సైకియాట్రిస్ట్‌లను వివిధ నాడీ సంబంధిత వ్యాధులు, నివారణ మార్గాలు, చికిత్సలపై ప్రశ్నలు అడిగి తమ సందేహాలను నివృత్తి చేసుకున్నారు.
