ఏపీలో అల్పపీడన ప్రభావం.. 18 జిల్లాల్లో వర్షాలు, పిడుగుల హెచ్చరిక

ఆంధ్రప్రదేశ్ రాష్ట్ర విపత్తుల నిర్వహణ సంస్థ ఎండీ ప్రఖర్ జైన్ కీలక వాతావరణ హెచ్చరికలు జారీ చేశారు. ఉత్తర శ్రీలంక తీర ప్రాంతం, నైరుతి బంగాళాఖాతంలో ఏర్పడిన అల్పపీడనం ప్రస్తుతం అదే ప్రాంతంలో కొనసాగుతోందని, రాబోయే 48 గంటల్లో మరింత బలపడే అవకాశం ఉందని తెలిపారు.

18 జిల్లాల్లో వర్షాల సూచన

ఈ అల్పపీడన ప్రభావంతో మంగళవారం ఆంధ్రప్రదేశ్‌లోని పలు జిల్లాల్లో పిడుగులతో కూడిన తేలికపాటి వర్షాలు కురిసే అవకాశం ఉందన్నారు. శ్రీకాకుళం, విజయనగరం, మన్యం, అల్లూరి, పోలవరం, విశాఖపట్నం, అనకాపల్లి, కాకినాడ, కోనసీమ, తూర్పుగోదావరి, పశ్చిమగోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, చిత్తూరు, తిరుపతి జిల్లాల్లో అక్కడక్కడ వర్షాలు నమోదయ్యే అవకాశం ఉందని వెల్లడించారు.

ప్రజలు వర్షం సమయంలో బహిరంగ ప్రదేశాల్లో ఉండకుండా సురక్షిత భవనాల్లో ఆశ్రయం పొందాలని సూచించారు. పిడుగులు పడే అవకాశముండటంతో చెట్ల కింద నిలబడరాదని హెచ్చరించారు.

రైతులు, పశుకాపరులు అప్రమత్తంగా ఉండాలి

రైతులు వ్యవసాయ పనుల సమయంలో తగిన జాగ్రత్తలు తీసుకోవాలని అధికారులు సూచించారు. పొలాల్లో పనిచేస్తున్న రైతులు, పశుకాపరులు ఆకాశం మేఘావృతమై ఉరుములు వినిపించిన వెంటనే సురక్షిత ప్రాంతాలకు వెళ్లాలని తెలిపారు.

పాత భవనాలు, భారీ హోర్డింగ్స్ సమీపంలో నిలబడవద్దని సూచించారు. ముఖ్యంగా గ్రామీణ ప్రాంతాల్లో ప్రజలు మరింత అప్రమత్తంగా ఉండాలని హెచ్చరించారు.

కొన్ని ప్రాంతాల్లో వడగాలుల హెచ్చరిక

మరోవైపు అల్లూరి జిల్లా జీకే వీధి, ముంచింగిపుట్టు, పెదబయలు, పోలవరం జిల్లా చింతూరు, కూనవరం, మారేడుమిల్లి, వరరామచంద్రాపురం, గుర్తేడు మండలాల్లో వడగాలులు వీచే అవకాశం ఉందని అధికారులు తెలిపారు.

కొన్ని జిల్లాల్లో ఎండ తీవ్రత కొనసాగుతుందని పేర్కొన్నారు. సోమవారం నమోదైన గరిష్ఠ ఉష్ణోగ్రతల్లో ఎన్టీఆర్ జిల్లా విజయవాడ తూర్పులో 42.3 డిగ్రీల సెల్సియస్ నమోదైంది. ఏలూరు జిల్లా కుక్కునూరు, పోలవరం జిల్లా కూనవరంలో 42.1°C, కర్నూలు జిల్లా మంత్రాలయంలో 41.5°C ఉష్ణోగ్రతలు నమోదయ్యాయి.

అలాగే ప్రకాశం జిల్లా కొప్పెరపాడు, కడప, తాడేపల్లి, అచ్చంపేట, రాయదుర్గం, పెద్దపారుపూడి, దొర్నిపాడు ప్రాంతాల్లో 40 డిగ్రీలకు పైగా ఉష్ణోగ్రతలు నమోదైనట్లు అధికారులు వెల్లడించారు.