దళిత క్రైస్తవులకు సామాజిక న్యాయం ఎప్పుడు?.. కమిషన్‌కు జూపూడి ప్రభాకర్‌రావు వినతి
దళిత క్రైస్తవులకు షెడ్యూల్డ్ కులాల (ఎస్సీ) హోదా కల్పించాలని కోరుతూ వైఎస్సార్ కాంగ్రెస్ పార్టీ నాయకులు న్యూఢిల్లీలో కీలక అడుగు వేశారు. ఈ మేరకు కేంద్ర ప్రభుత్వం ఏర్పాటు చేసిన కమిషన్ చైర్మన్ జస్టిస్ బాలకృష్ణను కలిసి వైసీపీ రాష్ట్ర ప్రధాన కార్యదర్శి, అధికార ప్రతినిధి, మాజీ ఎమ్మెల్సీ జూపూడి ప్రభాకరరావు నేతృత్వంలోని ప్రతినిధి బృందం వినతిపత్రం సమర్పించింది.
దళిత క్రైస్తవులు మతం మారినప్పటికీ వారి సామాజిక, ఆర్థిక, విద్యాపరమైన వెనుకబాటుతనం తొలగిపోలేదని ప్రతినిధి బృందం కమిషన్ దృష్టికి తీసుకెళ్లింది. రాజ్యాంగం కల్పించిన సామాజిక న్యాయం వారికి కూడా సమానంగా అందాలంటే ఎస్సీ హోదా అవసరమని పేర్కొంది.
విద్య, ఉపాధి, సంక్షేమ పథకాల అమలులో దళిత క్రైస్తవులు ఇంకా అనేక ఇబ్బందులు ఎదుర్కొంటున్నారని వివరించింది. మతం మారడం వల్ల మాత్రమే వారికి రాజ్యాంగపరమైన రక్షణలు, రిజర్వేషన్లు దూరం కావడం సామాజిక న్యాయ స్ఫూర్తికి విరుద్ధమని అభిప్రాయపడింది.
దళిత క్రైస్తవులకు ఎస్సీ హోదా కల్పిస్తే విద్యా అవకాశాలు, ప్రభుత్వ ఉద్యోగాల్లో రిజర్వేషన్లు, సంక్షేమ పథకాల ప్రయోజనాలు మరింత అందుబాటులోకి వస్తాయని పేర్కొంది. ఇది దేశంలో సామాజిక సమానత్వం సాధనకు కీలక నిర్ణయంగా నిలుస్తుందని వెల్లడించింది.
ఈ అంశాన్ని కేంద్ర ప్రభుత్వం సానుకూలంగా పరిశీలించి తగిన నిర్ణయం తీసుకోవాలని కమిషన్ ద్వారా విజ్ఞప్తి చేసింది. జూపూడి ప్రభాకరరావుతో పాటు ఎంపీలు గురుమూర్తి, బాబురావు, ఎమ్మెల్సీ అరుణ్ కుమార్, ఎమ్మెల్యే చంద్రశేఖర్, మాజీ ఎంపీ నందిగామ సురేష్, నాయకులు ఎం. నాగార్జున తదితరులు ఈ ప్రతినిధి బృందంలో పాల్గొన్నారు.
దళిత క్రైస్తవులకు ఎస్సీ హోదా కల్పించే అంశం దేశవ్యాప్తంగా చర్చనీయాంశంగా మారుతున్న వేళ, వైసీపీ చేసిన ఈ వినతి రాజకీయ, సామాజిక వర్గాల్లో ఆసక్తిని రేకెత్తిస్తోంది.
