డీఎస్సీ వివాదాల వేళ ముస్సోరీకి కోన శశిధర్.. ఇప్పుడు ఏం జరగబోతోంది?

అమరావతి, జూన్ 13: ఆంధ్రప్రదేశ్ ప్రభుత్వంలో కీలక బాధ్యతలు నిర్వహిస్తున్న ఇద్దరు సీనియర్ ఐఏఎస్ అధికారులు కోన శశిధర్, పి.ఎస్. ప్రద్యుమ్న త్వరలో ముస్సోరీలో జరిగే ప్రతిష్ఠాత్మక మిడ్‌కెరీర్ శిక్షణ కార్యక్రమానికి హాజరుకానున్నారు. జూన్ 15 నుంచి జూలై 10 వరకు జరిగే ఈ శిక్షణలో పాల్గొనేందుకు రాష్ట్ర ప్రభుత్వం అధికారికంగా అనుమతి మంజూరు చేసింది. ఈ మేరకు సాధారణ పరిపాలన శాఖ జీఓ ఆర్‌టీ నెం.1163ను జారీ చేసింది.

ముస్సోరీలోని లాల్ బహదూర్ శాస్త్రి నేషనల్ అకాడమీ ఆఫ్ అడ్మినిస్ట్రేషన్ (LBSNAA) దేశంలోని సీనియర్ ఐఏఎస్ అధికారులకు నిర్వహించే 21వ విడత మిడ్‌కెరీర్ ట్రైనింగ్ ప్రోగ్రామ్ (ఎంసీటీపీ) ఫేజ్-4లో పాల్గొనేందుకు వీరు ఎంపికయ్యారు.

ప్రస్తుతం పాఠశాల విద్య, ఉన్నత విద్య, నైపుణ్యాభివృద్ధి మరియు శిక్షణ శాఖల కార్యదర్శిగా కోన శశిధర్, ముఖ్యమంత్రి కార్యదర్శిగా పి.ఎస్. ప్రద్యుమ్న బాధ్యతలు నిర్వహిస్తున్నారు. ప్రభుత్వ యంత్రాంగంలో కీలక స్థానాల్లో ఉన్న ఈ ఇద్దరు అధికారులు నెలరోజులపాటు శిక్షణలో ఉండటం పరిపాలనా వర్గాల్లో చర్చనీయాంశంగా మారింది.

డీఎస్సీ వివాదాల వేళ కోన శశిధర్  శిక్ష‌ణ‌కు...!

కోన శశిధర్ పేరు ఇటీవల రాష్ట్ర రాజకీయాల్లో ప్రత్యేకంగా వినిపించింది. ప్రభుత్వం అత్యంత ప్రతిష్ఠాత్మకంగా నిర్వహించిన మెగా డీఎస్సీ నియామక ప్రక్రియపై వైఎస్సార్‌సీపీ తీవ్ర ఆరోపణలు చేసిన నేపథ్యంలో, వాటికి ప్రభుత్వం తరఫున సాంకేతికంగా, వాస్తవాధారాలతో సమాధానం చెప్పిన అధికారి కోన శశిధర్.

మాజీ ముఖ్యమంత్రి వైఎస్ జగన్‌మోహన్ రెడ్డి డీఎస్సీలో అక్రమాలు జరిగాయని, ఉద్యోగాలు అమ్ముకున్నారని ఆరోపణలు చేసినప్పుడు.. కోన శశిధర్ సుదీర్ఘ ప్రెజెంటేషన్ ద్వారా ఒక్కో ఆరోపణను వివరంగా ఖండించారు. ముఖ్యంగా హారిజాంటల్ రిజర్వేషన్ల అమలు, ఎంపిక ప్రక్రియ, అభ్యర్థుల మెరిట్ వివరాలపై ఆయన ఇచ్చిన వివరణ ప్రభుత్వానికి బలమైన రక్షణగా నిలిచిందనే అభిప్రాయం అధికార వర్గాల్లో వ్యక్తమైంది.

అభ్యర్థుల వారీగా డేటాను చూపిస్తూ ఎందుకు ఉద్యోగం రాలేదో వివరించిన తీరు కేవలం విద్యాశాఖ అధికారులనే కాదు, రాజకీయ విశ్లేషకులను కూడా ఆకట్టుకుంది. వైఎస్సార్‌సీపీ లేవనెత్తిన అనేక సందేహాలకు కోన శశిధర్ సమాధానాలతో తెరపడిందని కూటమి వర్గాలు పేర్కొన్నాయి.

అయినా కొనసాగుతున్న రాజకీయ పోరు

అయితే కోన శశిధర్ వివరణ తర్వాత కూడా వైఎస్సార్‌సీపీ తన ఆరోపణలను కొనసాగిస్తోంది. జగన్‌మోహన్ రెడ్డి మళ్లీ అదే అంశాలపై ప్రభుత్వాన్ని లక్ష్యంగా చేసుకుని విమర్శలు చేస్తున్నారు. ఈ నేపథ్యంలోనే కోన శశిధర్ మిడ్‌కెరీర్ శిక్షణ కోసం నెలరోజులపాటు అందుబాటులో లేకపోవడం రాజకీయంగా ఆసక్తిని రేకెత్తిస్తోంది.

డీఎస్సీ అంశంపై భవిష్యత్తులో మరిన్ని విమర్శలు వస్తే, వాటికి ప్రభుత్వం తరఫున ఎవరు సమాధానం చెబుతారు? కోన శశిధర్ లేని సమయంలో విద్యాశాఖ స్పందన ఎలా ఉంటుంది? అనే చర్చ అధికార, రాజకీయ వర్గాల్లో సాగుతోంది.

ఇన్‌ఛార్జి బాధ్యతలు ఎవరికంటే?

శిక్షణ కాలంలో కోన శశిధర్ నిర్వహిస్తున్న పాఠశాల విద్య, ఉన్నత విద్య, నైపుణ్యాభివృద్ధి శాఖల బాధ్యతలను రాజకీయ విభాగ ప్రధాన కార్యదర్శి జె. శ్యామలరావు అదనంగా పర్యవేక్షించనున్నారు.

అదేవిధంగా ముఖ్యమంత్రి కార్యదర్శి పి.ఎస్. ప్రద్యుమ్న బాధ్యతల నిర్వహణకు ప్రత్యేక ఇన్‌ఛార్జి ఏర్పాట్లు చేయాలని ప్రభుత్వం ఆదేశించింది. అలాగే ఆయన నిర్వహిస్తున్న ఏపీఎచ్‌ఆర్‌డీఐ జాయింట్ డైరెక్టర్ జనరల్ బాధ్యతలకు కూడా తాత్కాలిక ఏర్పాట్లు చేయనుంది.

ఎందుకు కీలకం ఈ శిక్షణ?

మిడ్‌కెరీర్ ట్రైనింగ్ ప్రోగ్రామ్‌ను దేశంలోని సీనియర్ ఐఏఎస్ అధికారులకు నిర్వహించే అత్యంత ప్రతిష్ఠాత్మక శిక్షణ కార్యక్రమంగా భావిస్తారు. భవిష్యత్తులో ఉన్నతస్థాయి పరిపాలనా బాధ్యతలు చేపట్టే అధికారులకు నాయకత్వం, విధాన రూపకల్పన, పరిపాలనా నైపుణ్యాలపై ప్రత్యేక శిక్షణ ఇస్తారు.

అయితే ఈసారి శిక్షణ కంటే ఎక్కువగా చర్చకు వస్తున్నది డీఎస్సీ వివాదాల మధ్య కోన శశిధర్ ముస్సోరీకి వెళ్లడం. ఆయన గైర్హాజరీలో రాజకీయ ఆరోపణలు, ప్రత్యారోపణల యుద్ధం ఏ మలుపు తిరుగుతుందోనన్న ఆసక్తి రాష్ట్ర రాజకీయాల్లో నెలకొంది.