తొమ్మిది మంది డీఎస్పీలకు అదనపు ఎస్పీలుగా పదోన్నతి
విజయవాడ, జూలై 4:
ఆంధ్రప్రదేశ్‌లో తొమ్మిది మంది డిప్యూటీ సూపరింటెండెంట్స్ ఆఫ్ పోలీస్ (సివిల్)కు అదనపు సూపరింటెండెంట్స్ ఆఫ్ పోలీస్ (సివిల్)గా పదోన్నతి కల్పిస్తూ రాష్ట్ర ప్రభుత్వం ఉత్తర్వులు జారీ చేసింది. 2025–26 ప్యానల్ సంవత్సరానికి సంబంధించి వీరికి తక్షణమే పదోన్నతులు అమల్లోకి వస్తాయని పేర్కొంది.
ఈ మేరకు హోం (సర్వీసెస్–1) శాఖ జూలై 4, 2026న జీఓ ఆర్టీ నంబర్ 840 జారీ చేసింది. ఆంధ్రప్రదేశ్ స్టేట్ అండ్ సబార్డినేట్ సర్వీస్ రూల్స్–1996లోని రూల్ 10(ఎ) కింద ఈ పదోన్నతులు కల్పించినట్లు ప్రభుత్వం తెలిపింది. న్యాయస్థానాలు, ట్రైబ్యునళ్లలో పెండింగ్‌లో ఉన్న కేసుల తుది తీర్పులకు లోబడి ఈ పదోన్నతులు ఉంటాయని స్పష్టం చేసింది.
అదనపు ఎస్పీలుగా పదోన్నతి పొందిన వారిలో ఎం. రాజగోపాల్ రెడ్డి, పి. శ్రీకాంత్, టి. శ్రీనివాసులు, జి. శివభాస్కర్ రెడ్డి, డి. సోమన్న, ఏఎస్ చక్రవర్తి, ఎం. అంబికా ప్రసాద్, ఎస్. వాసుదేవ్, ఎ. నరసింహమూర్తి ఉన్నారు.
పదోన్నతి పొందిన తొమ్మిది మంది అధికారులు మంగళగిరిలోని పోలీసు ప్రధాన కార్యాలయంలో రిపోర్టు చేయాలని ప్రభుత్వం ఆదేశించింది. వీరిలో పలువురు పీటీసీ తిరుపతి, పీటీసీ విజయనగరం, ఏసీబీ, విశాఖపట్నం సిటీ తదితర విభాగాల్లో విధులు నిర్వహిస్తుండగా, మరికొందరు పోస్టింగ్ కోసం ఎదురుచూస్తున్నారు.
ఈ పదోన్నతులు పూర్తిగా తాత్కాలిక ప్రాతిపదికన కల్పించినవేనని ప్రభుత్వం స్పష్టం చేసింది. ఎలాంటి కారణం వెల్లడించకుండానే అవసరమైతే అధికారులను తిరిగి కింది స్థాయి పోస్టులకు పంపే అధికారం ప్రభుత్వానికి ఉంటుందని ఉత్తర్వుల్లో పేర్కొంది.
పదోన్నతి ఉత్తర్వులు అందిన 15 రోజుల్లోగా అధికారులు కొత్త పోస్టుల్లో చేరాలని ప్రభుత్వం ఆదేశించింది. నిర్ణీత గడువులోగా విధుల్లో చేరకపోయినా, సెలవుపై వెళ్లి బాధ్యతలు స్వీకరించకుండా తప్పించుకునే ప్రయత్నం చేసినా ప్రస్తుతం, భవిష్యత్తులో పదోన్నతి హక్కును కోల్పోయే అవకాశం ఉంటుందని హెచ్చరించింది.
ఈ ఉత్తర్వుల అమలుకు అవసరమైన తదుపరి చర్యలు చేపట్టాలని ఆంధ్రప్రదేశ్ డైరెక్టర్ జనరల్ ఆఫ్ పోలీస్‌ను ప్రభుత్వం ఆదేశించింది. రాష్ట్ర గవర్నర్ పేరిట ప్రభుత్వ ప్రధాన కార్యదర్శి కుమార్ విశ్వజీత్ ఈ ఉత్తర్వులు జారీ చేశారు.
