ఏపీ వైద్యారోగ్య శాఖలో భారీ మార్పులు.. 26 మంది సివిల్ సర్జన్లకు కొత్త పోస్టింగ్‌లు
అమరావతి: ఆంధ్రప్రదేశ్ ప్రభుత్వం వైద్యారోగ్య శాఖలో కీలక పరిపాలనా మార్పులకు శ్రీకారం చుట్టింది. ప్రభుత్వ ఆస్పత్రులు, జిల్లా వైద్యశాఖలు, ప్రత్యేక వైద్య సంస్థల్లో సేవల సామర్థ్యాన్ని మరింత పెంచే లక్ష్యంతో పెద్ద ఎత్తున బదిలీలు, పదోన్నతులు చేపట్టింది. ఈ మేరకు హెల్త్, మెడికల్ అండ్ ఫ్యామిలీ వెల్ఫేర్ (B1) విభాగం జూలై 12న జి.ఓ.ఆర్.టి. నెం.639 మరియు జి.ఓ.ఆర్.టి. నెం.640లను జారీ చేసింది. ఈ ఉత్తర్వుల ద్వారా మొత్తం 26 మంది వైద్యాధికారులకు కొత్త బాధ్యతలు అప్పగించింది. ఇందులో 10 మంది సివిల్ సర్జన్లకు బదిలీలు, 16 మంది డిప్యూటీ సివిల్ సర్జన్లకు పదోన్నతులతో కూడిన పోస్టింగ్‌లు కల్పించింది.
పరిపాలనా కారణాలతో 10 మంది సివిల్ సర్జన్ల బదిలీ
జి.ఓ. నెం.639 ప్రకారం పరిపాలనా అవసరాల దృష్ట్యా రాష్ట్రంలోని వివిధ జిల్లాల్లో పనిచేస్తున్న 10 మంది సివిల్ సర్జన్లను బదిలీ చేసింది. ఇందులో అనకాపల్లి జిల్లా డీఎంఅండ్‌హెచ్‌వోగా ఉన్న డాక్టర్ ఎం. హైమావతిని విశాఖపట్నంలోని టీబీ అండ్ ఐడీ ఆస్పత్రికి సీఎస్‌ఆర్‌ఎంఓగా నియమించింది. అనంతపురం డీఎంఅండ్‌హెచ్‌వో డాక్టర్ ఈ.బి. దేవికి కడప 300 పడకల సూపర్ స్పెషాలిటీ ఆస్పత్రిలో బాధ్యతలు అప్పగించింది.
అదేవిధంగా శ్రీకాకుళం సీఎస్‌ఆర్‌ఎంఓగా ఉన్న డాక్టర్ కె. అనితను కాకినాడ డీఎంఅండ్‌హెచ్‌వోగా, కాకినాడ డీఎంఅండ్‌హెచ్‌వో డాక్టర్ జె. నరసింహ నాయక్ను రాష్ట్ర నోడల్ అధికారిగా నియమించింది. అలాగే జాయింట్ డైరెక్టర్‌గా ఉన్న డాక్టర్ టి. సుశీలను కాకినాడ ప్రభుత్వాస్పత్రి సీఎస్‌ఆర్‌ఎంఓగా, డాక్టర్ పి. కోమలను రాజమహేంద్రవరం డీఎంఅండ్‌హెచ్‌వోగా బదిలీ చేసింది.
పార్వతీపురం మన్యం జిల్లా డీఎంఅండ్‌హెచ్‌వో డాక్టర్ ఎస్. భాస్కరరావుకు జివీఎంసీ సిఎంఓహెచ్‌గా, గుంటూరు ఆర్టీసీ మహిళా కళాశాల ప్రిన్సిపల్ డాక్టర్ పి. విజయలక్ష్మిని పార్వతీపురం మన్యం డీఎంఅండ్‌హెచ్‌వోగా నియమించింది. అలాగే కృష్ణా జిల్లా డీఎంఅండ్‌హెచ్‌వో డాక్టర్ పి. యుగంధర్ను కడప డీఎంఅండ్‌హెచ్‌వోగా, విశాఖ జివీఎంసీ సిఎంఓహెచ్ డాక్టర్ ఈ.వి. నరేష్ కుమార్ను శ్రీకాకుళం డీఎంఅండ్‌హెచ్‌వోగా పోస్టింగ్ ఇచ్చింది.
16 మంది డిప్యూటీ సివిల్ సర్జన్లకు పదోన్నతులు
మరోవైపు జి.ఓ. నెం.640 ద్వారా 2025-26 ప్యానెల్ సంవత్సరానికి ఎంపికైన 16 మంది డిప్యూటీ సివిల్ సర్జన్లకు సివిల్ సర్జన్ (జనరల్ లైన్) హోదాలో తాత్కాలిక పదోన్నతులు కల్పించింది. వీరికి రాష్ట్రంలోని వివిధ జిల్లా ఆస్పత్రులు, వైద్య విద్యా సంస్థలు, శిక్షణ కేంద్రాలు, జిల్లా వైద్యాధికారుల కార్యాలయాల్లో కీలక బాధ్యతలు అప్పగించింది.
పదోన్నతి పొందిన వారిలో డాక్టర్ ఎ. నాగసశి భూషణ్ రెడ్డి, డాక్టర్ ఎ. శ్రావణ బాబు, డాక్టర్ తంజావూరి వనిశ్రీ, డాక్టర్ సి. హనుమంతరావు, డాక్టర్ కట్టా వెంకటేశ్వర్లు, డాక్టర్ పి. లోకనాథం దయాకర్, డాక్టర్ వై. సుబ్రహ్మణ్యం, డాక్టర్ మక్కెన పద్మావతి, డాక్టర్ ఎ. ఉమామహేశ్వరి, డాక్టర్ ఓ. శ్రీనివాస రెడ్డి, డాక్టర్ ఎ. ఉమామహేశ్వర కుమార్, డాక్టర్ ఉడతా శోభ, డాక్టర్ బి.బి.ఎస్. రోహిణి రత్న శ్రీ, డాక్టర్ ఆర్. అచ్చుత కుమారి, డాక్టర్ వై. నళిని దేవి, డాక్టర్ బెండి పద్మజ ఉన్నారు.
15 రోజుల్లోగా విధుల్లో చేరాలని ఆదేశం
పదోన్నతి పొందిన అధికారులు ఉత్తర్వులు అందిన 15 రోజులలోపు కొత్త విధుల్లో చేరాలని ప్రభుత్వం స్పష్టం చేసింది. గడువులోగా బాధ్యతలు స్వీకరించకపోతే ప్రస్తుత ప్యానెల్ సంవత్సరానికి సంబంధించిన పదోన్నతి హక్కును కోల్పోయే అవకాశం ఉంటుందని ఉత్తర్వుల్లో హెచ్చరించింది. అలాగే ఈ పదోన్నతులు రాష్ట్రంలోని వివిధ న్యాయస్థానాల్లో పెండింగ్‌లో ఉన్న కేసుల తుది తీర్పులకు లోబడి ఉంటాయని కూడా ప్రభుత్వం స్పష్టం చేసింది.
వైద్య సేవల బలోపేతమే లక్ష్యం
రాష్ట్రవ్యాప్తంగా ప్రభుత్వ వైద్యసేవలను మరింత సమర్థవంతంగా నిర్వహించడం, పరిపాలనా వ్యవస్థను బలోపేతం చేయడం, ఖాళీ పోస్టులను భర్తీ చేయడం, జిల్లా స్థాయిలో వైద్య సేవల పర్యవేక్షణను మెరుగుపరచడం వంటి లక్ష్యాలతో ఈ బదిలీలు, పదోన్నతులు చేపట్టినట్లు అధికారులు పేర్కొంటున్నారు. ఇటీవల ఆరోగ్యశాఖలో చేపడుతున్న సంస్కరణల్లో భాగంగానే ఈ నిర్ణయం తీసుకున్నట్లు సమాచారం. కొత్తగా నియమితులైన అధికారులు బాధ్యతలు స్వీకరించిన తర్వాత జిల్లాల్లో ప్రజారోగ్య సేవల నిర్వహణ మరింత వేగవంతం కానుందని వైద్యశాఖ వర్గాలు ఆశాభావం వ్యక్తం చేస్తున్నాయి.
