మెగా డీఎస్సీపై ఆరోపణలు అవాస్తవం.. ఆధారాలతో క్లారిటీ ఇచ్చిన విద్యాశాఖ

మెగా డీఎస్సీ-2025 నిర్వహణపై ఇటీవల కొన్ని పత్రికల్లో వచ్చిన ఆరోపణలను ఏపీ విద్యాశాఖ తీవ్రంగా ఖండించింది. విద్యాశాఖ కార్యదర్శి కోన శశిధర్ మీడియా సమావేశం నిర్వహించి డీఎస్సీ ప్రక్రియకు సంబంధించిన ప్రతి అంశాన్ని ఆధారాలతో సహా వివరించారు. డీఎస్సీని అత్యంత పారదర్శకంగా, నిబంధనల ప్రకారం నిర్వహించామని స్పష్టం చేశారు.

2018 తర్వాత రాష్ట్రంలో మళ్లీ 2025లో డీఎస్సీ నోటిఫికేషన్ విడుదల చేశామని, కేవలం 148 రోజుల్లో మొత్తం నియామక ప్రక్రియను పూర్తి చేయడం ఒక రికార్డుగా నిలిచిందని తెలిపారు. అభ్యర్థులు కష్టపడి చదివి ఉద్యోగాలు సాధించారని, వారి కృషిని ప్రశ్నించేలా అవాస్తవ ప్రచారాలు చేయడం బాధాకరమన్నారు.

డీఎస్సీ నిర్వహణను అడ్డుకునేందుకు మొత్తం 241 కేసులు దాఖలయ్యాయని, అయినప్పటికీ అన్ని న్యాయపరమైన అంశాలను ఎదుర్కొని పరీక్షలను విజయవంతంగా నిర్వహించామని చెప్పారు. ఎస్సీ వర్గీకరణ, హారిజాంటల్ రిజర్వేషన్లు, టెట్ అర్హతలు వంటి అంశాలన్నింటినీ నిబంధనల ప్రకారం అమలు చేశామని వివరించారు.

పరీక్షల నిర్వహణలో అత్యాధునిక సాంకేతికతను వినియోగించినట్లు కోన శశిధర్ తెలిపారు. రాష్ట్రవ్యాప్తంగా 154 టీసీఎస్ ఐయాన్ కేంద్రాల్లో కంప్యూటర్ బేస్డ్ టెస్ట్ (సీబీటీ) విధానంలో పరీక్షలు నిర్వహించామని చెప్పారు. ఒకే సబ్జెక్టుకు వేర్వేరు తేదీల్లో పరీక్షలు జరిగినందున ప్రశ్నాపత్రాలు కూడా వేర్వేరుగా ఉండటం సహజమన్నారు. ప్రతి సబ్జెక్టుకు దాదాపు 3 వేల ప్రశ్నలతో ప్రశ్నల బ్యాంక్ రూపొందించామని, దానికి కేవలం ఇద్దరు శాశ్వత ఉద్యోగులకు మాత్రమే పరిమిత యాక్సెస్ ఉండేదని వెల్లడించారు.

డీఎస్సీ స్కోర్లు, టెట్ మార్కులు, ఎంపికల జాబితాలు సహా అన్ని వివరాలను వెబ్‌సైట్లలో అందుబాటులో ఉంచామని చెప్పారు. స్కోర్లు వెల్లడించలేదన్న ఆరోపణల్లో ఎలాంటి నిజం లేదని స్పష్టం చేశారు. నార్మలైజేషన్ ప్రక్రియ గురించి కూడా ముందుగానే అభ్యర్థులకు వివరించినట్లు తెలిపారు.

ఇటీవల చర్చకు వచ్చిన నవీన్ వ్యవహారంపైనా విద్యాశాఖ స్పందించింది. నవీన్ రెండు పరీక్షలు రాసి ఒకదాంట్లో మొదటి ర్యాంకు, మరోదాంట్లో ఆరో ర్యాంకు సాధించినప్పటికీ సర్టిఫికేట్ వెరిఫికేషన్‌కు హాజరు కాలేదని పేర్కొన్నారు. నిబంధనల ప్రకారం వెరిఫికేషన్‌కు రాని అభ్యర్థిని నియమించలేమని, ఈ విషయంలో కోర్టు కూడా ప్రభుత్వ వాదనను సమర్థించిందని చెప్పారు.

హారిజాంటల్ రిజర్వేషన్ల అమలుపై వస్తున్న విమర్శలు అవగాహన లోపం వల్లనే వస్తున్నాయని కోన శశిధర్ అభిప్రాయపడ్డారు. మహిళలు, దివ్యాంగులు, మాజీ సైనికులు, క్రీడాకారులకు వర్తించే రిజర్వేషన్లను పూర్తిగా నిబంధనల ప్రకారం అమలు చేశామని వివరించారు. స్పోర్ట్స్ కోటాలో ఎంపికైన అభ్యర్థులు కూడా ప్రతిభతోనే ఉద్యోగాలు సాధించారని తెలిపారు.

డీఎస్సీ నిర్వహణలో చిన్న పొరపాటు కూడా జరగకుండా అన్ని జాగ్రత్తలు తీసుకున్నామని పేర్కొన్న కోన శశిధర్, ఎవరైనా నిజమైన లోపాలను చూపిస్తే వాటిని స్వీకరించి సరిదిద్దేందుకు సిద్ధంగా ఉన్నామని చెప్పారు. అయితే వాస్తవాలు లేకుండా ఆరోపణలు చేయడం వల్ల కష్టపడి ఉద్యోగాలు సాధించిన వేలాది మంది అభ్యర్థుల మనోభావాలు దెబ్బతింటాయని హెచ్చరించారు.

టెట్-డీఎస్సీ సమన్వయం, సాంకేతిక పారదర్శకత, న్యాయపరమైన ప్రమాణాల కారణంగానే మెగా డీఎస్సీ-2025 విజయవంతమైందని విద్యాశాఖ స్పష్టం చేసింది. ప్రస్తుతం ప్రచారంలో ఉన్న అనేక కథనాలు వాస్తవాలకు విరుద్ధమని, నిజాల ఆధారంగానే చర్చ జరగాలని కోరింది.