33 సంక్షేమ హాస్టళ్లకు దరఖాస్తులు ఆహ్వానం.. విద్యార్థులకు గుడ్‌న్యూస్

ఎన్‌టీఆర్ జిల్లాలోని సాంఘిక సంక్షేమ బాలురు, బాలికల వసతి గృహాల్లో 2026-27 విద్యా సంవత్సరానికి గాను ప్రవేశాల ప్రక్రియ ప్రారంభమైనట్లు జిల్లా ఎస్‌సీ సంక్షేమం, సాధికారిత అధికారి కేఎల్ హర్షిత తెలిపారు. మూడో తరగతి నుంచి పదో తరగతి వరకు చదివే విద్యార్థులతో పాటు ఇంటర్, డిగ్రీ, ఇంజనీరింగ్, డిప్లొమా, ఫార్మసీ, మెడికల్, పీజీ, నర్సింగ్, పారామెడికల్ కోర్సులు చదివే విద్యార్థుల నుంచి దరఖాస్తులు ఆహ్వానిస్తున్నట్లు వెల్లడించారు.

జిల్లాలో 33 సంక్షేమ హాస్టళ్లు

జిల్లాలో మొత్తం 33 సాంఘిక సంక్షేమ హాస్టళ్లు అందుబాటులో ఉన్నాయని అధికారులు తెలిపారు. ప్రి మెట్రిక్ విభాగంలో బాలురకు 10, బాలికలకు 11 హాస్టళ్లు ఉండగా, పోస్టు మెట్రిక్ విభాగంలో బాలురకు 6, బాలికలకు 6 హాస్టళ్లు ఉన్నట్లు పేర్కొన్నారు.

విజయవాడ రెవెన్యూ డివిజన్ పరిధిలో 9, నందిగామ పరిధిలో 13, తిరువూరు పరిధిలో 11 హాస్టళ్లు ఉన్నాయని తెలిపారు. ప్రతి హాస్టల్‌లో 100 మంది విద్యార్థులకు ప్రవేశం కల్పించనున్నట్లు చెప్పారు.

ఎస్సీలకు 70 శాతం రిజర్వేషన్

ప్రతి హాస్టల్‌లో ఎస్సీ విద్యార్థులకు 70 శాతం సీట్లు కేటాయించగా, మిగిలిన 30 శాతం ఇతర వర్గాల విద్యార్థులకు ఇవ్వనున్నట్లు తెలిపారు. ఎస్సీ, ఎస్టీ, బీసీ, ఓబీసీ విద్యార్థులు పోస్టు మెట్రిక్ హాస్టళ్లకు దరఖాస్తు చేసుకోవచ్చని సూచించారు.

ఆధునిక సౌకర్యాలతో హాస్టళ్లు

సాంఘిక సంక్షేమ హాస్టళ్లను ప్రభుత్వం ఆధునికీకరించినట్లు అధికారులు తెలిపారు. విద్యార్థులకు ఆర్‌వో ప్లాంట్ల ద్వారా శుభ్రమైన తాగునీరు, మెనూ ప్రకారం పౌష్టికాహారం, సీసీ కెమెరాలతో భద్రతా ఏర్పాట్లు కల్పించినట్లు వెల్లడించారు.

అదనంగా కాస్మెటిక్స్ ఛార్జీలు, క్రీడా సామగ్రి, ఇతర అవసరమైన వస్తువులు ఉచితంగా అందించనున్నట్లు పేర్కొన్నారు. పదో తరగతి విద్యార్థులకు ప్రత్యేక ట్యూటర్లు కూడా అందుబాటులో ఉంటారని తెలిపారు.

ఎలా దరఖాస్తు చేసుకోవాలి..?

విద్యార్థులు తమ గ్రామంలోని స్వర్ణ గ్రామం, స్వర్ణ వార్డు వెల్ఫేర్ అండ్ ఎడ్యుకేషన్ అసిస్టెంట్ ద్వారా లేదా నేరుగా సమీప హాస్టల్ వార్డెన్, సహాయ సాంఘిక సంక్షేమ అధికారిని సంప్రదించి దరఖాస్తు చేసుకోవచ్చని అధికారులు సూచించారు.

మరిన్ని వివరాల కోసం విజయవాడ పటమటలోని జిల్లా సాంఘిక సంక్షేమశాఖ కార్యాలయాన్ని సందర్శించవచ్చని తెలిపారు. అలాగే ఉదయం 10.30 గంటల నుంచి సాయంత్రం 5.30 గంటల వరకు 87907 52259, 94925 83600 నంబర్లను సంప్రదించి సమాచారం పొందవచ్చని ఎస్‌సీ సంక్షేమం, సాధికారిత అధికారి కేఎల్ హర్షిత తెలిపారు.