డేటా డ్రివెన్ గవర్నెన్స్‌పై సీఎం చంద్రబాబు ఫోకస్.. అధికారులకు కీలక ఆదేశాలు
అమరావతి, మే 13: రాష్ట్రాన్ని ఆర్థికంగా మరింత బలోపేతం చేయాలంటే ప్రభుత్వ వ్యవస్థలో సామర్ధ్య పెంపు అత్యంత కీలకమని ముఖ్యమంత్రి నారా చంద్రబాబు నాయుడు అధికారులకు స్పష్టం చేశారు. స్వర్ణాంధ్ర-2047 లక్ష్యాలను సాధించేందుకు రాష్ట్రం కనీసం 15 శాతం ఆర్థిక వృద్ధి సాధించాల్సి ఉంటుందని పేర్కొన్న సీఎం, ఇందుకోసం గణాంకాల సేకరణను వేగవంతం చేయాలని సూచించారు. సాంప్రదాయ పద్ధతుల స్థానంలో రియల్‌టైమ్ డేటా ఆధారిత గవర్నెన్స్‌ను అమలు చేయాల్సిన అవసరం ఉందన్నారు.
సచివాలయంలో బుధవారం ప్రణాళిక శాఖపై నిర్వహించిన సమీక్ష సమావేశంలో సీఎం చంద్రబాబు కీలక ఆదేశాలు జారీ చేశారు. ప్రస్తుతం రాష్ట్ర జీఎస్డీపీ అంచనాలు మూడు నెలలకు ఒకసారి, ఏడాదికోసారి రూపొందుతున్నాయని, దీంతో ఆర్థిక పరిస్థితులపై తక్షణ అవగాహన సాధ్యం కావడం లేదన్నారు. చారిత్రక డేటాపై అధికంగా ఆధారపడటం వల్ల విధాన నిర్ణయాల్లో ఆలస్యం జరుగుతోందని పేర్కొన్నారు. ఈ నేపథ్యంలో ప్రతి నెలా, ప్రతి జిల్లాలో, ప్రతి మండలంలో ఆర్థిక కార్యకలాపాలను ట్రాక్ చేయగలిగే వ్యవస్థను అభివృద్ధి చేయాలని అధికారులను ఆదేశించారు.
జీఎస్డీపీ విధానంపై పూర్తి అవగాహన కల్పించేలా రాష్ట్ర స్థాయి నుంచి మండల స్థాయి వరకు అధికారులకు శిక్షణ ఇవ్వాలని సీఎం సూచించారు. మూడు నెలలపాటు రాష్ట్రవ్యాప్తంగా కెపాసిటీ బిల్డింగ్ కార్యక్రమాలు నిర్వహించాలని చెప్పారు. మొత్తం 5 జోన్లు, 28 జిల్లాలు, 175 నియోజకవర్గాలను కవర్ చేస్తూ ఈ శిక్షణ కార్యక్రమాలను అమలు చేయాలని ఆదేశించారు. రాష్ట్ర స్థాయి వర్క్‌షాప్‌లు, జోనల్ మరియు జిల్లా స్థాయి శిక్షణా కార్యక్రమాలు, నియోజకవర్గ స్థాయి మాస్టర్ ట్రైనర్ల తయారీపై ప్రత్యేక దృష్టి పెట్టాలని పేర్కొన్నారు. ప్రతి నియోజకవర్గం నుంచి ముగ్గురు అధికారులను ఎంపిక చేసి వారికి ప్రత్యేక శిక్షణ ఇవ్వాలని సూచించారు.
రాష్ట్రంలో త్వరలోనే పూర్తి స్థాయిలో డేటా డ్రివెన్ గవర్నెన్స్‌కు శ్రీకారం చుడతామని సీఎం వెల్లడించారు. ఆర్థిక వ్యవస్థపై తక్షణ సమాచారం అందుబాటులో ఉంటే ప్రభుత్వ నిర్ణయాలు వేగంగా తీసుకోవచ్చని అభిప్రాయపడ్డారు. ప్రభుత్వ శాఖల పనితీరును అంచనా వేసేందుకు కేపీఐల (Key Performance Indicators) ఆధారిత ఆడిటింగ్ విధానాన్ని మరింత సమర్థవంతంగా అమలు చేయాలని అధికారులకు సూచించారు.
మరోవైపు వ్యవసాయం, పరిశ్రమలు, సేవారంగాల్లో ఏఐ ఆధారిత ఆర్థిక విశ్లేషణ వ్యవస్థలను అభివృద్ధి చేస్తున్నట్లు అధికారులు సీఎంకు వివరించారు. రాష్ట్ర ఆర్థిక పరిస్థితులను మరింత ఖచ్చితంగా అంచనా వేసేందుకు ఆర్టిఫిషియల్ ఇంటెలిజెన్స్ వినియోగాన్ని పెంచుతున్నామని తెలిపారు. ప్రస్తుతం ట్రాక్ చేయని ఆర్థిక సూచికలను గుర్తించి, వాటిపై ప్రత్యేక దృష్టి పెట్టాలని సీఎం చంద్రబాబు సూచించారు.
రాష్ట్ర అభివృద్ధికి గణాంకాల సేకరణ అత్యంత కీలకమని, గ్రామ స్థాయి నుంచి రాష్ట్ర స్థాయి వరకు డేటా సమగ్రంగా అందుబాటులో ఉంటేనే సమర్థవంతమైన ప్రణాళికలు రూపొందించవచ్చని సీఎం అభిప్రాయపడ్డారు. ప్రజలకు మెరుగైన సేవలు అందించాలంటే టెక్నాలజీ ఆధారిత పరిపాలన తప్పనిసరి అని ఆయన స్పష్టం చేశారు.
