సాధారణ రోగిలా ఓపీ నమోదు చేసుకున్న కలెక్టర్.. ఆసుపత్రి సేవలపై ప్రశంసలు

ప‌శ్చిమ‌గోదావ‌రి జిల్లా క‌లెక్ట‌ర్ చదలవాడ నాగరాణి కాలు బెనకటంతో భీమవరం ప్రభుత్వ ఆసుపత్రిలో చికిత్స పొందారు. సాధారణ రోగిలాగే ఓపీ నమోదు చేసుకుని ఎక్స్‌రే చేయించుకుని, ఆర్థోపెడిక్ విభాగంలో వైద్య సేవలు పొందడం అక్కడి రోగులు, సిబ్బందిలో చర్చనీయాంశమైంది.

సాధారణ వ్యక్తిలా ఆసుపత్రిలో సేవలు పొందిన కలెక్టర్

భీమవరం ప్రభుత్వ ఆసుపత్రికి వెళ్లిన జిల్లా కలెక్టర్ నాగరాణి ప్రత్యేక ప్రోటోకాల్ లేకుండా సాధారణ రోగిలా వైద్య సేవలు పొందారు. చికిత్స అనంతరం ఆసుపత్రిలోని పలు విభాగాలను ఆమె స్వయంగా పరిశీలించారు. రోగులతో మాట్లాడి అందుతున్న వైద్య సేవలు, మందుల లభ్యత, పరిశుభ్రత, సిబ్బంది వ్యవహార శైలి వంటి అంశాలపై వివరాలు తెలుసుకున్నారు.

అలాగే ఆసుపత్రి పరిసరాలు, వాష్‌రూమ్‌ల పరిశుభ్రత, వైద్య సేవల నాణ్యత, ఎవరైనా డబ్బులు అడుగుతున్నారా వంటి విషయాలపై కూడా రోగులను ప్రశ్నించారు.

ప్రభుత్వ ఆసుపత్రుల్లో మెరుగైన సేవలు: రోగుల అభిప్రాయం

ఆసుపత్రిలో చికిత్స పొందుతున్న రోగులు స్పందిస్తూ గతంతో పోలిస్తే ప్రస్తుతం ప్రభుత్వ ఆసుపత్రుల్లో వైద్య సేవలు గణనీయంగా మెరుగుపడ్డాయని తెలిపారు. అవసరమైన మందులు అందుతున్నాయని, వైద్యులు, సిబ్బంది మర్యాదపూర్వకంగా వ్యవహరిస్తున్నారని చెప్పారు. ఆసుపత్రి పరిశుభ్రత, సౌకర్యాలపై కూడా సంతృప్తి వ్యక్తం చేశారు.

ప్రజలు ప్రభుత్వ వైద్య సేవలు వినియోగించుకోవాలి: కలెక్టర్

ఈ సందర్భంగా కలెక్టర్ నాగరాణి మాట్లాడుతూ జిల్లాలో ప్రభుత్వ ఆసుపత్రుల్లో మెరుగైన మౌలిక వసతుల కల్పనకు చర్యలు తీసుకుంటున్నామని తెలిపారు. ప్రజలకు నాణ్యమైన వైద్య సేవలు అందించేందుకు వైద్యశాఖ పనితీరును నిరంతరం సమీక్షిస్తున్నామని చెప్పారు.

ప్రైవేటు ఆసుపత్రులకు దీటుగా ప్రభుత్వ ఆసుపత్రుల్లో సేవలు అందించడమే లక్ష్యమని పేర్కొన్నారు. ప్రతి నెల వైద్యశాఖ, మహిళా మరియు శిశు సంక్షేమ శాఖలతో సమీక్షలు నిర్వహిస్తూ లోటుపాట్లను వెంటనే సరిదిద్దుతున్నామని తెలిపారు.

ప్రజలు ప్రభుత్వ ఆసుపత్రుల్లో అందుబాటులో ఉన్న వైద్య సేవలను సద్వినియోగం చేసుకోవాలని కలెక్టర్ పిలుపునిచ్చారు. ఆసుపత్రుల్లో ఏవైనా సమస్యలు గమనిస్తే అధికారుల దృష్టికి తీసుకురావాలని సూచించారు.