జగన్ తెచ్చిన విద్యాసంస్క‌ర‌ణ‌ల‌ను నాశ‌నం చేసిన లోకేష్ఃజూపూడి
ప్రభుత్వ పాఠశాలలు, సంక్షేమ హాస్టళ్ల పరిస్థితిపై కూటమి సర్కార్‌ను నిలదీసిన వైఎస్సార్సీపీ
ఇంగ్లీష్ మీడియం నుంచి నాడు-నేడు వరకు జగన్ హయాంలో అమలైన పథకాలు ఏమయ్యాయని ప్రశ్న
తాడేపల్లి, జూన్ 30: రాష్ట్రంలో విద్యా వ్యవస్థను అభివృద్ధి పథంలో నడిపించిన మాజీ ముఖ్యమంత్రి వైఎస్ జగన్‌మోహన్ రెడ్డి తీసుకొచ్చిన సంస్కరణలను కూటమి ప్రభుత్వం పూర్తిగా నిర్వీర్యం చేసిందని వైఎస్సార్సీపీ రాష్ట్ర ప్రధాన కార్యదర్శి, అధికార ప్రతినిధి జూపూడి ప్రభాకర్ రావు తీవ్ర ఆరోపణలు చేశారు. ప్రభుత్వ పాఠశాలల అభివృద్ధి, ఇంగ్లీష్ మీడియం, డిజిటల్ క్లాస్‌రూమ్‌లు, విద్యార్థుల సంక్షేమ పథకాలు, హాస్టళ్ల నిర్వహణ వంటి అంశాల్లో గత ప్రభుత్వం తీసుకొచ్చిన మార్పులను కొనసాగించడంలో విద్యాశాఖ మంత్రి నారా లోకేష్ పూర్తిగా విఫలమయ్యారని ఆయన విమర్శించారు.
'నాడు-నేడు'తో మారిన ప్రభుత్వ పాఠశాలల రూపురేఖలు
జగన్ ప్రభుత్వం అధికారంలో ఉన్న సమయంలో 'నాడు-నేడు' కార్యక్రమం ద్వారా వేలాది ప్రభుత్వ పాఠశాలలను ఆధునికీకరించిందని జూపూడి పేర్కొన్నారు. పాఠశాలల్లో మౌలిక సదుపాయాలు కల్పించడం, తరగతి గదుల అభివృద్ధి, మరుగుదొడ్లు, తాగునీటి వసతి, ఫర్నిచర్, డిజిటల్ సౌకర్యాలు వంటి అంశాలపై భారీగా పెట్టుబడులు పెట్టారని గుర్తు చేశారు.
ఆ సమయంలో ప్రభుత్వ పాఠశాలల్లో చేరేందుకు తల్లిదండ్రులు ఆసక్తి చూపారని, ఇప్పుడు అదే పాఠశాలల నుంచి విద్యార్థులు ప్రైవేటు పాఠశాలలకు వెళ్లాల్సిన పరిస్థితి ఏర్పడిందని ఆరోపించారు.
ఇంగ్లీష్ మీడియం, డిజిటల్ క్లాస్‌రూమ్‌లు ఏమయ్యాయి?
జగన్ ప్రభుత్వం ప్రభుత్వ పాఠశాలల్లో ఇంగ్లీష్ మీడియాన్ని ప్రవేశపెట్టిందని, ఆ నిర్ణయాన్ని వ్యతిరేకించిన వారు ఇప్పుడు మౌనంగా ఎందుకు ఉన్నారని జూపూడి ప్రశ్నించారు. ప్రస్తుతం ప్రభుత్వ పాఠశాలల్లో తెలుగు మీడియం కూడా సక్రమంగా లేదని, జగన్ తీసుకొచ్చిన ఇంగ్లీష్ మీడియం కూడా కనిపించడం లేదని అన్నారు.
అలాగే, డిజిటల్ క్లాస్‌రూమ్‌లు, విద్యార్థులకు పంపిణీ చేసిన ట్యాబ్‌లు, ఆధునిక బోధనా విధానాలు ఏమయ్యాయో మంత్రి లోకేష్ సమాధానం చెప్పాలని డిమాండ్ చేశారు.
'పిల్లల మార్కులపై లోకేష్ భవిష్యత్తు'
విద్యాశాఖ మంత్రి నారా లోకేష్ విద్యార్థులు బాగా చదివితేనే తనకు మంచి పేరు వస్తుందని చెబుతున్నారని, కానీ గత ప్రభుత్వం అమలు చేసిన విద్యా సంస్కరణలను కొనసాగించడంలో మాత్రం విఫలమయ్యారని జూపూడి విమర్శించారు.
"జగన్ గారు తీసుకొచ్చిన విధానాలు ఎక్కడికి పోయాయి? అవి లేకపోతే వాటి విధ్వంసం ఎవరిది?" అని ప్రశ్నించారు.
హాస్టళ్లలో కనీస వసతులు కూడా లేవు
రాష్ట్రంలోని సంక్షేమ హాస్టళ్లలో విద్యార్థులు తీవ్ర ఇబ్బందులు పడుతున్నారని జూపూడి ఆరోపించారు. చింతలపూడి నియోజకవర్గంలో దుప్పటి కావాలని అడిగిన ఎనిమిదో తరగతి విద్యార్థినిని అర్ధరాత్రి హాస్టల్ నుంచి పంపించిన ఘటనను ఆయన ప్రస్తావించారు.సోషల్ వెల్ఫేర్ హాస్టళ్లలో విద్యార్థులకు చలికాలంలో కప్పుకోవడానికి దుప్పట్లు కూడా లేని పరిస్థితి ఏర్పడిందని, సంక్షేమ శాఖ మంత్రి డోలా బాల వీరాంజనేయ స్వామి ఈ అంశాలపై స్పందించడం లేదని విమర్శించారు.
రూ.8,524 కోట్ల నుంచి రూ.544 కోట్లకు పడిపోయిన వ్యయం
'నాడు-నేడు' కార్యక్రమం కోసం జగన్ ప్రభుత్వం రెండు దశల్లో రూ.8,524 కోట్లు ఖర్చు చేసిందని జూపూడి తెలిపారు. అయితే కూటమి ప్రభుత్వం గత రెండేళ్లలో కేవలం రూ.544 కోట్లు మాత్రమే వెచ్చించిందని ఆరోపించారు.
ఇది ప్రభుత్వ పాఠశాలల పట్ల కూటమి ప్రభుత్వ నిర్లక్ష్యానికి నిదర్శనమని ఆయన పేర్కొన్నారు.
విద్యా పథకాల అమలులో నిర్లక్ష్యం
విద్యాదీవెన, వసతి దీవెన, ఫీజు రీయింబర్స్‌మెంట్ వంటి పథకాల బకాయిలు చెల్లించకుండా ప్రభుత్వం నిర్లక్ష్యం చేస్తోందని జూపూడి ఆరోపించారు. స్కూళ్లు ప్రారంభమై నెలరోజులు గడిచినా విద్యార్థులకు యూనిఫారాలు, పుస్తకాలు, బెల్టులు, టైలు కూడా అందలేదన్నారు.
ప్రభుత్వ పాఠశాలల్లో ఉపాధ్యాయుల కొరత, హాస్టళ్లలో మౌలిక వసతుల లేమి కారణంగా విద్యార్థులు ప్రైవేటు విద్యాసంస్థల వైపు వెళ్లాల్సి వస్తోందని ఆయన అన్నారు.
29 మంది హాస్టల్ విద్యార్థుల మృతి
గత రెండేళ్లలో సంక్షేమ హాస్టళ్లలో 29 మంది విద్యార్థులు మరణించారని జూపూడి ఆరోపించారు. హాస్టల్ విద్యార్థులను జగన్ ప్రభుత్వం సొంత పిల్లల్లా చూసుకుందని, ఇప్పుడు వారి సంక్షేమాన్ని ప్రభుత్వం పూర్తిగా విస్మరించిందన్నారు.
'ప్రజలు సమాధానం అడిగే రోజు దగ్గర్లోనే ఉంది'
రాష్ట్రంలో 87.41 లక్షల మంది విద్యార్థులకు అందాల్సిన సంక్షేమ పథకాలలో దాదాపు 20 లక్షల మందిని ప్రభుత్వం దూరం చేసిందని జూపూడి ఆరోపించారు. జగన్ ప్రభుత్వం విద్యపై పెట్టిన వ్యయాన్ని భవిష్యత్తుపై పెట్టుబడిగా భావించిందని, కానీ ప్రస్తుత ప్రభుత్వం దాన్ని కేవలం ఖర్చుగా చూస్తోందని అన్నారు.
ప్రభుత్వం విద్యా రంగంపై తీసుకుంటున్న నిర్ణయాలపై వైఎస్సార్సీపీ ప్రశ్నిస్తూనే ఉంటుందని స్పష్టం చేసిన ఆయన, "వైఎస్సార్సీపీ నోరు మూస్తే ప్రజలు ప్రశ్నిస్తారు... ప్రజల నోరు మూయిస్తే విద్యార్థులు ప్రశ్నిస్తారు" అని హెచ్చరించారు.
