రూ.2 కోట్ల కోసం కిడ్నాప్.. అంతర్రాష్ట్ర గ్యాంగ్ గుట్టురట్టు, 11 మంది అరెస్ట్.. రూ.22 లక్షల బంగారం స్వాధీనం

పలమనేరు, జూన్ 24: చిత్తూరు జిల్లా పలమనేరు పోలీసులు సంచలన కిడ్నాప్ కేసును ఛేదించి అంతర్రాష్ట్ర నేర ముఠాను అరెస్ట్ చేశారు. కేరళ, ఆంధ్రప్రదేశ్, తెలంగాణ రాష్ట్రాలకు చెందిన సభ్యులతో ఏర్పడిన ఈ ముఠాలో 11 మంది నిందితులను అరెస్ట్ చేసి, రూ.22 లక్షల విలువైన బంగారు ఆభరణాలు, మూడు కార్లు, 12 మొబైల్ ఫోన్లు, హ్యాండ్‌కఫ్స్, నకిలీ పోలీస్ ఐడీ కార్డులను స్వాధీనం చేసుకున్నారు. మరికొందరు నిందితులు పరారీలో ఉండగా వారి కోసం గాలింపు కొనసాగుతోంది.

చిత్తూరు జిల్లా ఎస్పీ తుషార్ దూడే ఆదేశాల మేరకు, పలమనేరు డీఎస్పీ డేగల ప్రభాకర్ ఆధ్వర్యంలో ఈ కేసును ప్రత్యేకంగా దర్యాప్తు చేశారు. పలమనేరు అర్బన్ సీఐ మోహన్ రెడ్డి పర్యవేక్షణలో ప్రత్యేక బృందం సాంకేతిక ఆధారాల సహాయంతో కేసును ఛేదించింది.

కిడ్నాప్ ఎలా జరిగింది?

గంగవరం మండలానికి చెందిన 47 ఏళ్ల రవి ఈ నెల 7న పలమనేరు–గుడియాత్తం రహదారిలోని టీ.వడ్డూరు క్రాస్ వద్ద కిడ్నాప్‌కు గురయ్యాడు. అనంతరం అతడిని పులివెందుల ప్రాంతానికి తరలించిన నిందితులు, బాధితుడి కుటుంబ సభ్యులకు ఫోన్ చేయించి రూ.2 కోట్లు ఇవ్వాలని, లేకపోతే చంపేస్తామని బెదిరించారు.

మరుసటి రోజు చిక్కబళ్లాపురం హైవేపై బాధితుడి బంధువుల నుంచి రూ.1 కోటి నగదు తీసుకున్న నిందితులు, బాధితుడి వద్ద ఉన్న సుమారు 900 గ్రాముల బంగారు ఆభరణాలను కూడా బలవంతంగా లాక్కొని అతడిని అక్కడే వదిలేసి పరారయ్యారు.

కేరళ గ్యాంగ్‌తో స్థానికుల కుమ్మక్కు

దర్యాప్తులో కేరళకు చెందిన రోషన్ గ్యాంగ్ ఈ నేరానికి సూత్రధారిగా ఉన్నట్లు తేలింది. ఏపీ, తెలంగాణకు చెందిన కొందరు స్థానికులు బాధితుడి కదలికలపై సమాచారాన్ని అందించగా, రోషన్ గ్యాంగ్ సభ్యులు గంగవరంలోని ఓ లాడ్జిలో బస చేసి ముందస్తు ప్రణాళిక ప్రకారం కిడ్నాప్‌ను అమలు చేశారు.

సాంకేతిక ఆధారాలతో కేసు ఛేదన

సీసీటీవీ ఫుటేజ్, మొబైల్ కాల్ డేటా, వాహనాల కదలికలు, ఇతర శాస్త్రీయ ఆధారాలను విశ్లేషించిన పోలీసులు కేరళకు చెందిన ఏడుగురు, ఆంధ్రప్రదేశ్‌కు చెందిన నలుగురు నిందితులను అరెస్ట్ చేశారు. గంగవరం మండలం గండ్రాజుపల్లి చెక్‌పోస్ట్ వద్ద మూడు కార్లను స్వాధీనం చేసుకున్నారు.

నిందితుల వద్ద నుంచి రూ.22 లక్షల విలువైన బంగారు ఆభరణాలు, 12 మొబైల్ ఫోన్లు, హ్యాండ్‌కఫ్స్, నకిలీ పోలీస్ ఐడీ కార్డులు, మూడు కార్లు స్వాధీనం చేసుకున్నారు. అరెస్టు చేసిన నిందితులను కోర్టులో హాజరుపరచి రిమాండ్‌కు తరలించనున్నట్లు పోలీసులు తెలిపారు.

కేసు ఛేదనలో కీలక పాత్ర పోషించిన పోలీసు బృందం

ఈ కేసు దర్యాప్తులో పలమనేరు డీఎస్పీ డేగల ప్రభాకర్, పలమనేరు అర్బన్ సీఐ మోహన్ రెడ్డి నేతృత్వంలో ప్రత్యేక బృందం పనిచేసింది. బృందంలో పరుశురాముడు (సీఐ, పలమనేరు రూరల్), శ్రీనివాసులు (ఎస్సై, బంగారుపాళ్యం), లోకేష్ రెడ్డి (ఎస్సై, పలమనేరు అర్బన్), చంద్రశేఖర్ (హెడ్ కానిస్టేబుల్), గణేష్, నరేష్, భాస్కర్ (పోలీస్ కానిస్టేబుళ్లు), శశికుమార్ (టెక్నికల్ టీమ్) కీలక పాత్ర పోషించారు.

సాంకేతిక ఆధారాల ఆధారంగా అంతర్రాష్ట్ర గ్యాంగ్‌ను అరెస్ట్ చేసి కేసును విజయవంతంగా ఛేదించిన ఈ పోలీసు బృందాన్ని చిత్తూరు జిల్లా ఎస్పీ తుషార్ దూడే ప్రత్యేకంగా అభినందించారు. పోలీసులు పరారీలో ఉన్న మిగిలిన నిందితుల కోసం గాలింపు కొనసాగిస్తున్నారు.