ఏజెన్సీలో పెద్దపులి బీభత్సం.. రెండు దూడలను చంపిన పులి, భయంతో వణికుతున్న గ్రామాలు

బుట్టాయిగూడెం: ఏజెన్సీ ప్రాంతంలో పెద్దపులి సంచారం మరోసారి కలకలం రేపింది. అడవిలో ఉండాల్సిన పెద్దపులి గ్రామాల సమీపానికి రావడంతో ప్రజలు తీవ్ర భయాందోళనకు గురవుతున్నారు. తాజాగా బుట్టాయిగూడెం మండలం నిమ్మలగూడెం సమీపంలోని పాలకుంట గ్రామంలో రెండు ఆవు దూడలపై దాడి చేసి చంపడంతో స్థానికుల్లో ఆందోళన మరింత పెరిగింది.

గ్రామానికి చెందిన కూరం వెంకటేష్, సోయం వెంకటేష్‌లకు చెందిన రెండు దూడలను మంగళవారం రాత్రి పెద్దపులి చంపినట్లు భావిస్తున్నారు. బుధవారం ఉదయం స్థానికులు మృతదేహాలను గుర్తించి వెంటనే అటవీశాఖ అధికారులకు సమాచారం అందించారు. సంఘటనా స్థలానికి చేరుకున్న అధికారులు అక్కడ కనిపించిన అడుగుల ముద్రలను పరిశీలించి దాడి చేసింది పెద్దపులేనని నిర్ధారించారు.

ఇటీవలి రోజులుగా పెద్దపులి తరచూ తన సంచార ప్రాంతాన్ని మార్చుకుంటూ ఉండటంతో అది ఎటు వెళ్తుందో అంచనా వేయడం అటవీశాఖ అధికారులకు సవాలుగా మారింది. అడవికే పరిమితం అవుతుందని భావించిన పులి ఇప్పుడు గ్రామాల అంచుల వరకు రావడం ప్రజల్లో తీవ్ర భయాన్ని కలిగిస్తోంది.

పులి భయంతో సాయంత్రం 7 గంటలకే గ్రామాల్లో జన సంచారం తగ్గిపోతోంది. ప్రజలు అవసరం లేకుండా బయటకు రావడం మానేసి ఇళ్లకే పరిమితమవుతున్నారు. రైతులు, కూలీలు పొలాలకు వెళ్లడానికే వెనుకాడుతున్న పరిస్థితి నెలకొంది.

పులి కదలికలను గుర్తించేందుకు అటవీశాఖ ప్రత్యేక బృందాలను రంగంలోకి దించింది. ట్రాక్ కెమెరాలను ఏర్పాటు చేసి పులి జాడలను నిరంతరం పరిశీలిస్తోంది. అలాగే పొలం పనులు లేదా ఇతర అవసరాల కోసం బయటకు వెళ్లే వారు ఒంటరిగా వెళ్లవద్దని అధికారులు హెచ్చరిస్తున్నారు. పులి ఆనవాళ్లు కనిపించినా, అనుమానాస్పద కదలికలు గమనించినా వెంటనే అటవీశాఖకు సమాచారం ఇవ్వాలని ప్రజలకు విజ్ఞప్తి చేశారు.

ఈ ఘటనతో ఏజెన్సీ ప్రాంత ప్రజలు భయాందోళనలో గడుపుతుండగా, పెద్దపులిని తిరిగి అటవీ ప్రాంతంలోకి మళ్లించేందుకు అధికారులు చర్యలు వేగవంతం చేశారు.